ລັດຖະບານ ກຳນົດຫລາຍມາດຕະການ ສົ່ງເສີມການຜະລິດພາຍໃນ ທົດແທນການນຳເຂົ້າສິນຄ້າ

ທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້ ຊີ້ແຈງຕໍ່ຄຳຊັກຖາມຂອງສະພາແຫ່ງຊາດ ແລະ ຄຳຖາມເຈາະຈີ້ມຂອງສະມາຊິກສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 2 ພະຈິກ 2023 ນີ້ວ່າ:

ເພື່ອຊຸກຍູ້ສົ່ງເສີມການຜະລິດຢູ່ພາຍໃນປະເທດ ທົດແທນການນຳເຂົ້າ ແລະ ເປັນສິນຄ້າສົ່ງອອກ ລັດຖະບານ ກໍຄື ຂະແໜງກະສິກຳ ແລະ ປ່າໄມ້ ໄດ້ກຳນົດ ມາດຕະການສົ່ງເສີມການຜະລິດພາຍໃນ ໄປຄວບຄູ່ກັບ ມາດຕະການຄວບຄຸມການນຳເຂົ້າ ບັນດາສິນຄ້າທີ່ສາມາດຜະລິດໄດ້ຢູ່ພາຍໃນ ເປັນ 2 ລາຍການໃຫຍ່ ຄື: ລາຍການສິນຄ້າກະສິກຳ ທີ່ຕ້ອງມີມາດຕະການເກືອດຫ້າມນຳເຂົ້າ ແລະ ລາຍການສິນຄ້າກະສິກຳ ທີ່ຕ້ອງການໃຫ້ຫລຸດຜ່ອນການນຳເຂົ້າ.

ສຳລັບມາດຕະການທີ່ຕ້ອງຄວບຄຸມ ແລະ ເກືອດຫ້າມນຳເຂົ້າສິນຄ້າ ທີ່ສາມາດຜະລິດໄດ້ພາຍໃນ ປະກອບມີ: ເຂົ້າ, ກາເຟ (ເມັດ, ບົດ, ສຳເລັດຮູບ), ຊາ; ພືດກິນໃບ ປະກອບມີ: ຜັກກາດ ທຸກປະເພດ, ຜັກກະລໍ່າປີ, ຜັກສະຫລັດ, ຜັກຫົມ, ຜັກຫອມປ້ອມ, ຜັກຊີ, ຜັກບົ້ງ, ຜັກບົ່ວໃບ, ຫອມລາບ, ຫອມເປ, ຫອມແພວ, ບົວລະພາ, ໃບຂີ້ຫູດ; ພືດກິນຫົວ ປະກອບມີ: ຫົວຂີງ, ຂ່າ, ຫົວສີໃຄ, ເຜືອກ, ມັນດ້າງ, ມັນເພົາ, ມັນຕົ້ນ, ມັນສາຄູ, ຖົ່ວດິນ; ພືດກິນໝາກ ປະກອບມີ: ໝາກເຂືອ, ຖົ່ວຝັກຍາວ, ຖົ່ວເບີ, ຖົ່ວແຂກ, ໝາກແຕງ, ໝາກອຶ, ໝາກນໍ້າ, ໝາກໂຕນ, ໝາກເຜັດນ້ອຍ, ສາລີແອ້ (ສາລີອ່ອນ), ໝາກໂມ, ໝາກບວບ, ໝາກແຄ້ງ, ຖົ່ວພູ; ປະເພດເຫັດ ປະກອບມີ: ເຫັດນາງລົມ, ເຫັດເຟືອງ, ເຫັດປວກ, ເຫັດເຜາະ, ເຫັດບົດ, ເຫັດລະໂງກ. ສ່ວນປະເພດ ສັດ ແລະ ຜະລິດຕະພັນສັດ ມີ: ງົວ, ໝູ, ແບ້, ໄກ່ພັນຊີ້ນ, ໄກ່ສຸດໄຂ່, ໄກ່ລາດ, ໄກ່ສາມສາຍພັນ, ເປັດ, ຫ່ານ. ສຳລັບ ຜະລິດຕະພັນສັດ ມີ ໄຂ່ໄກ່, ຊີ້ນໝູ, ຊີ້ນງົວ, ຊີ້ນແບ້, ຊີ້ນເປັດ, ຊີ້ນໄກ່, ຊີ້ນຫ່ານ, ປາແດກ, ຊິ້ນສ່ວນ ແລະ ເຄື່ອງໃນສັດ ທຸກປະເພດ; ປານໍ້າຈືດ ແລະ ຜະລິດຕະພັນປານໍ້າຈືດທຸກຊະນິດ.

ສຳລັບ ລາຍການສິນຄ້າກະສິກຳ ທີ່ຕ້ອງການໃຫ້ຫລຸດຜ່ອນການນຳເຂົ້າ ປະກອບມີ:ຜັກກະລ່ຳປີດອກຂຽວ (ຜັກບລ໋ອກເຄີລີ), ຜັກກະລໍ່າປີດອກຂາວ, ຫົວຜັກທຽມ, ຫົວຜັກບົ່ວ, ຜັກເຊີນາລີ, ໝາກເຜັດໃຫຍ່, ໝາກເລັ່ນ, ຫົວຜັກກາດຂາວ, ຫົວກະລົດ, ມັນຝຣັ່ງ ແລະ ຫົວບີທຣຸດ. ສ່ວນປະເພດສັດ ແລະ ຜະລິດຕະພັນສັດ ມີ: ຊີ້ນເກຣດດີ ຂອງຊີ້ນງົວ, ຊີ້ນແກະ, ຊີ້ນນົກກະຈອກເທດ ເພື່ອມາຮັບໃຊ້ພັດຕະຄານ ຫລື ໂຮງແຮມໃຫຍ່, ຕ່ອນນ້ຳມັນໝູ, ໜັງໝູ, ຊີ້ນກ້ອນ ເພື່ອນຳມາປຸງແຕ່ງ ຮັບໃຊ້ ບໍລິສັດ ຫລື ໂຄງການສະເພາະໃດໜຶ່ງ. ສຳລັບ ອາຫານທະເລ ແມ່ນອະນຸຍາດໃຫ້ນຳເຂົ້າ ແຕ່ໃຫ້ມີມາດຕະການຄຸ້ມຄອງ ຮ່ວມກັບ ບັນດາແຂວງ ໃຫ້ຮັດກຸມ ໂດຍການພິຈາລະນາ ອະນຸຍາດ ກຳນົດເປັນໂຄຕາສະເພາະ ແລະ ເປັນແຕ່ລະໄລຍະ ຕາມແຜນ ແລະ ຄວາມຈຳເປັນຕົວຈິງ ເທົ່ານັ້ນ.

ສຳລັບ ມາດຕະການໃນຕໍ່ໜ້າ ຂະແໜງກະກຳ ຈະສືບຕໍ່ ດໍາເນີນມາດຕະການຄຸ້ມຄອງການນຳເຂົ້າຄວບຄູ່ກັບການ ສົ່ງເສີມການຜະລິດພາຍໃນ ເພື່ອຫລຸດຜ່ອນຕົ້ນທຶນຂອງປັດໄຈການຜະລິດ ໃຫ້ສາມາດແຂ່ງຂັນກັບສິນຄ້ານຳເຂົ້າໄດ້, ພ້ອມທັງ ຈະເລັ່ງເຈລະຈາເປີດຕະຫລາດສິນຄ້າ ທີ່ມີທ່າແຮງ, ມີຜົນຜະລິດຫລາຍ ແລະ ໄດ້ກຳນົດເປັນສິນຄ້າປາຍແຫລມແລ້ວ ເປັນຕົ້ນ, ກາເຟ, ຢາງພາລາ, ຖົ່ວລຽນ, ໝາກມີ້, ອ້ອຍ, ຖົ່ວດິນ. ສືບຕໍ່ປັບປຸງ ບັນດາ ນິຕິກຳ, ຂັ້ນຂອດບໍລິການ, ກົນໄກປະສານງານ, ສ້າງສະພາບແວດລ້ອມທີ່ເອື້ອອຳນວຍ ໃຫ້ແກ່ການດຳເນີນທຸລະກິດ ເພື່ອສົ່ງເສີມ, ດຶງດູດການລົງທຶນ ທັງພາຍໃນ ແລະ ຕ່າງປະເທດ ເຂົ້າໃນການຜະລິດສິນຄ້າ ໃຫ້ຫລາຍຂຶ້ນ. ພ້ອມນັ້ນ ຈະໄດ້ເຂັ້ມງວດປະຕິບັດມາດຕະການ ທີ່ບໍ່ແມ່ນພາສີ ຄື ມາດຕະຖານຫຸ້ມຫໍ່ສິນຄ້າ, ມາດຕະການດ້ານສຸຂະນາໄມ ພືດ-ສັດ (SPS) ເພື່ອຫ້າມ ແລະ ຈຳກັດການນຳເຂົ້າສິນຄ້າ ທີ່ສາມາດຜະລິດພາຍໃນໄດ້ ແລະ ຈະສົມທົບກັບບັນດາກະຊວງ, ບັນດາທ້ອງຖິ່ນກ່ຽວຂ້ອງໃນການຕິດຕາມ, ກວດກາ, ສະກັດກັ້ນ ການນຳເຂົ້າ ສິນຄ້າກະສິກຳ ທີ່ຜິດກົດໝາຍ ແລະ ອື່ນໆ ຢ່າງເຂັ້ມງວດ.