ລາວ-ອົສຕຣາລີ ລົງນາມບົດບັນທຶກຄວາມເຂົ້າໃຈວ່າດ້ວຍການສ້າງຕັ້ງສະມາຄົມມິດຕະພາບ ເພື່ອສົ່ງເສີມສາຍພົວພັນການທູດລະຫວ່າງປະຊາຊົນກັບປະຊາຊົນ

ໂດຍຕອບສະໜອງຕາມການເຊື້ອເຊີນຂອງກະຊວງການຕ່າງປະເທດ ແຫ່ງ ອົສຕຣາລີ, ທ່ານ ທອງສະຫວັນ ພົມວິຫານ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມມິດຕະພາບ ແລະ ເຮັດວຽກ ຢູ່ ອົສຕຣາລີ ໃນລະຫວ່າງວັນທີ 28 ຕຸລາ-1 ພະຈິກ 2023 ເພື່ອເສີມຂະຫຍາຍສາຍພົວພັນດ້ານການທູດປະຊາຊົນລະຫວ່າງ ລາວ-ອົສຕຣາລີ.

ໃນໂອກາດຢ້ຽມຢາມດັ່ງກ່າວ, ທ່ານ ທອງສະຫວັນ ພົມວິຫານ ໄດ້ພົບປະສອງຝ່າຍກັບການນໍາຂັ້ນສູງຂອງປະເທດອົສຕຣາລີ ເປັນຕົ້ນແມ່ນໄດ້ພົບປະເຮັດວຽກສອງຝ່າຍກັບ ທ່ານ ນາງ ເພັນນີ ວ່ອງ ສະມາຊິກວຸດທິສະພາ ທັງເປັນລັດຖະມົນຕີກະຊວງການຕ່າງປະເທດ ແຫ່ງ ອົສຕຣາລີ; ໄດ້ພົບປະກັບ ທ່ານ ແພດ ຄອນຣອຍ ສະມາຊິກສະພາແຫ່ງຊາດ ທັງເປັນລັດຖະມົນຕີກະຊວງອຸດສາຫະກໍາປ້ອງກັນປະເທດ ລັດຖະມົນຕີກະຊວງພັດທະນາສາກົນ ແລະ ວຽກງານຂົງເຂດປາຊີຟິກ ແຫ່ງ ອົສຕຣາລີ. ໃນການພົບປະ, ທັງສອງຝ່າຍໄດ້ຕີລາສູງຕໍ່ສາຍພົວພັນມິດຕະພາບອັນເປັນມູນເຊື້ອຍາວນານ ລະຫວ່າງ ລາວ ແລະ ອົສຕຣາລີ ຕະຫຼອດໄລຍະເວລາຫຼາຍກວ່າ 70 ປີ ແຫ່ງສາຍພົນພັນທາງການທູດນໍາກັນ ຊຶ່ງໄດ້ປະກອບສ່ວນຢ່າງສໍາຄັນເຂົ້າໃນການສ້າງສາພັດທະນາ ສປປ ລາວ ໂດຍຜ່ານບັນດາໂຄງການຮ່ວມມື ແລະ ຊ່ວຍເຫຼືອຕ່າງໆ ເປັນຕົ້ນແມ່ນການພັດທະນາຊັບພະຍາກອນມະນຸດ, ການກໍ່ສ້າງພື້ນຖານໂຄງລ່າງ, ການຫຼຸດຜ່ອນຄວາມທຸກຍາກ ແລະ ອື່ນໆ; ທັງສອງຝ່າຍໄດ້ແລກປ່ຽນສະພາບການພັດທະນາເສດຖະກິດ-ສັງຄົມໃຫ້ກັນຊາບ; ເຫັນດີເປັນເອກະພາບກັນໃນການສືບຕໍ່ເສີມຂະຫຍາຍສາຍພົວພັນທາງດ້ານເສກຖະກິດ, ການຄ້າ, ການລົງທຶນ, ການທ່ອງທ່ຽວ, ຍິນດີສືບຕໍ່ສະໜັບສະໜູນຍຸດທະສາດການຫັນ ສປປ ລາວ ເປັນປະເທດເຊື່ອມຍົງເຊື່ອມຈອດກັບພາກພື້ນ ແລະ ສາກົນ ພ້ອມທັງຊອກຫາທ່າແຮງບົ່ມຊ້ອນຕ່າງໆໃນການຮ່ວມມືສອງຝ່າຍ ລາວ-ອົສຕຣາລີໃຫ້ຫຼາຍຂຶ້ນໄປເລື້ອຍໆ. ໃນການພົບປະຄັ້ງນີ້, ຝ່າຍລາວໄດ້ສະແດງຄວາມຂອບໃຈຕໍ່ການສະໜັບສະໜູນ ແລະ ການຊ່ວຍເຫຼືອຕ່າງໆໃນຂອບສອງຝ່າຍ ແລະ ຫຼາຍຝ່າຍຂອງອົສຕຣາລີຕໍ່ ສປປ ລາວ. ພ້ອມນັ້ນ, ໃນໂອກາດທີ່ ສປປ ລາວ ຈະເປັນປະທານໝູນວຽນອາຊຽນ ໃນປີ 2024 ຝ່າຍອົສຕຣາລີ ຍັງໄດ້ໃຫ້ຄຳໝາຍໝັ້ນຈະສະໜັບສະໜູນ ສປປ ລາວ ໃນການເປັນປະທານອາຊຽນໃຫ້ໄດ້ຮັບຜົນສໍາເລັດຢ່າງຈົບງາມ.

ພິເສດໃນການຢ້ຽມຢາມອົສຕຣາລີຄັ້ງປະຫວັດສາດຂອງຄະນະຜູ້ແທນຄະນະພົວພັນຕ່າງປະເທດສູນກາງພັກໃນຄັ້ງນີ້, ທ່ານ ທອງສະຫວັນ ພົມວິຫານ ໄດ້ຮ່ວມກັບ ທ່ານ ນາງ ເພັນນີ ວ່ອງ ລົງນາມໃນບົດບັນທຶກຄວາມເຂົ້າໃຈວ່າດ້ວຍການສ້າງຕັ້ງສະມາຄົມມິດຕະພາບ ລາວ-ອົສຕຣາລີ ແລະ ອົສຕຣາລີ-ລາວ ເພື່ອສົ່ງເສີມສາຍພົວພັນການທູດລະຫວ່າງປະຊາຊົນກັບປະຊາຊົນ, ເພີ່ມທະວີຄວາມເຂົ້າໃຈ, ຄວາມໄວ້ເນື້ອເຊື່ອໃຈໃນການຮ່ວມມືສອງຝ່າຍ ແລະ ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການຮ່ວມມືດ້ານລັດໃນຕໍ່ໜ້າ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ກໍຄື ເພື່ອສົ່ງເສີມສັນຕິພາບ, ມິດຕະພາບ, ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກ