ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຊີ້ແຈງຕອບຄຳຊັກຖາມຂອງສະພາແຫ່ງຊາດ ແລະ ຄຳຖາມເຈາະຈີ້ມ ຂອງສະມາຊິກສະພາແຫ່ງຊາດ

1. ໃນນັ້ນ, ສາເຫດຕົ້ນຕໍ ຈຳນວນໜຶ່ງຄາດວ່າ ເກີດຂຶ້ນຍ້ອນເງິນເຟີ້ ເຮັດໃຫ້ລາຄາສິນຄ້າເພີ່ມຂຶ້ນຕາມເວລາ, ຍ້ອນເງິນກີບອ່ອນຄ່າ ທຽບໃສ່ເງິນຕາຕ່າງປະເທດ ເຮັດໃຫ້ລາຄາສິນຄ້ານຳເຂົ້າເພີ່ມຂຶ້ນ, ລາຄາຂາຍກໍເພີ່ມຂຶ້ນເປັນເງົາຕາມຕົວ, ຍ້ອນຕົ້ນທຶນການຜະລິດ ເປັນຕົ້ນ ວັດຖຸດິບ, ແຮງງານ, ໄຟຟ້າ, ຄ່າຂົນສົ່ງ (ນໍ້າມັນ), ຄ່າບໍລິການ ເເລະ ສ່ວນປະກອບອື່ນໆຂອງການຜະລິດ;

2. ຜູ້ຜະລິດ (ຝຸ່ນ ຫຼື ຫົວອາຫານ) ສົ່ງຕໍ່ຕົ້ນທຶນດັ່ງກ່າວ ໄປໃຫ້ຜູ້ບໍລິໂພກ ດ້ວຍການຂຶ້ນລາຄາສິນຄ້າ ແລະ ຍ້ອນຄວາມຄາດຫວັງ ຜູ້ນຳເຂົ້າ ແລະ ຜູ້ຜະລິດ ອາດຄາດຄະເນລາຄາສິນຄ້າ ຈະເພີ່ມຂຶ້ນໃນອະນາຄົດ ເເລ້ວປັບລາຄາ, ເພື່ອຮັບມື ຫລື ຫລຸດຄວາມສ່ຽງຂອງຕົນ ເເລະ ສາເຫດອື່ນໆຕື່ມອີກ ເຊິ່ງເປັນບັນຫາທີ່ພາກລັດ ພະຍາຍາມກວດກາ ແລະ ຄວບຄຸມ;

3. ປັດຈຸບັນ ລັດຖະບານ ໄດ້ວາງຫລາຍມາດຕະການ ເພື່ອຄວບຄຸມລາຄາສິນຄ້າ ໃຫ້ກັບສູ່ສະພາບປົກກະຕິໂດຍໄວ ເປັນຕົ້ນ, ໄດ້ກຳນົດໂຄງປະກອບລາຄາ, ກຳນົດລາຄາສູງສຸດ, ລາຄາຕໍ່າສຸດ ຫລື ຂອບລາຄາ, ຄວບຄຸມສິນຄ້າ ໃນຄັງເເຮສຳຮອງ, ຖົມຂຸມສິນຄ້າ ແລະ ການບໍລິການ, ການດັດສົມການສະໜອງ ເເລະ ຄວາມຕ້ອງການ, ພ້ອມທັງອອກບົດເເນະນຳການຈັດຕັ້ງປະຕິບັດໃຫ້ຂັ້ນແຂວງ ເປັນຜູ້ຄຸ້ມຄອງ, ຄິດໄລ່ລາຄາສິນຄ້າ ຕາມໂຄງປະກອບລາຄາສິນຄ້າ ທີ່ສູນກາງກໍານົດ ແລະ ຮ່ວມມືກັບພາກທຸລະກິດ ເພື່ອຂາຍສິນຄ້າຫລຸດລາຄາ ເພື່ອໃຫ້ປະຊາຊົນຜູ້ມີລາຍຮັບຕ່ຳ ໄດ້ຊື້ສິນຄ້າໃນລາຄາທີ່ເໝາະສົມ;

4. ສຳລັບ ແຜນການໃນຕໍ່ໜ້າ, ຈະສືບຕໍ່ປະສານສົມທົບກັບຂະແໜງການ ແລະ ອົງການປົກຄອງທ້ອງຖິ່ນ ຄົ້ນຄວ້າ ແລະ ກຳນົດໂຄງສ້າງລາຄາສິນຄ້າ ທີ່ຈຳເປັນ, ທັງຢູ່ໃນ ບັນຊີ (ກ) ເເລະ ບັນຊີ (ຂ) ເພື່ອໃຫ້ມີລາຄາທີ່ສົມເຫດສົມຜົນ;

5. ພ້ອມທັງຕິດຕາມການເໜັງຕີງລາຄາ ເເລະ ໃຊ້ມາດຕະການຕໍ່ຜູ້ລະເມີດຂຶ້ນລາຄາສິນຄ້າ ທີ່ບໍ່ສອດຄ່ອງ ແລະ ຈະປະສານສົມທົບກັບກະຊວງການເງິນ ເເລະ ທະນາຄານແຫ່ງ ສປປລາວ ເພື່ອຄົ້ນຄວ້າ, ກໍານົດນະໂຍບາຍເງິນຕາ ແລະ ນະໂຍບາຍການເງິນ ທີ່ເໝາະສົມ ເພື່ອຫລຸດອັດຕາເງິນເຟີ້ ເເລະ ຄຸ້ມຄອງອັດຕາເເລກປ່ຽນ ໃຫ້ມີຄວາມໝັ້ນທ່ຽງ;

6. ພ້ອມນີ້, ຍັງຈະປະສານສົມທົບກັບຂະແໜງການກະສິກຳ ແລະ ປ່າໄມ້, ຂະເເໜງພະລັງງານ ແລະ ບໍ່ແຮ່, ຂະແໜງການທີ່ກ່ຽວຂ້ອງ ແລະ ອົງການປົກຄອງທ້ອງຖິ່ນ ເພື່ອພ້ອມກັນຄົ້ນຄວ້າ ເພື່ອຫລຸດຜ່ອນຕົ້ນທຶນການຜະລິດ ເປັນຕົ້ນ: ການສົ່ງເສີມການຜະລິດຝຸ່ນ, ຫົວອາຫານ, ເຄື່ອງມື-ເຕັກນິກການຜະລິດ, ການໃຫ້ຄວາມຮູ້-ສ້າງຄວາມເຂັ້ມແຂງໃຫ້ແກ່ຜູ້ປະກອບການ ແລະ ອື່ນໆ;

7. ນອກນັ້ນ, ຍັງຈະປັບປຸງຂໍ້ຄົງຄ້າງ ໃນການຊຸກຍູ້-ສົ່ງເສີມ ໃຫ້ພາກທຸລະກິດ ທີ່ເຮັດແທ້ທຳຈິງ ສາມາດເຂົ້າເຖິງເເຫລ່ງທຶນ ເພື່ອການຜະລິດເປັນສິນຄ້າ ໂດຍສະເພາະສິນຄ້າ ທີ່ມີຜົນກະທົບແຮງ, ຈຳເປັນຕໍ່ຊີວິດການເປັນຢູ່ຂອງປະຊາຊົນ ແລະ ຈະເລັ່ງຄົ້ນຄວ້າປັບປຸງບັນດານິຕິກຳ ທີ່ຕິດພັນກັບວຽກລາຄາ ເປັນຕົ້ນການຍົກລະດັບດໍາລັດ ວ່າດ້ວຍລາຄາສິນຄ້າ ເເລະ ຄ່າບໍລິການ, ບັນຊີຄວບຄຸມ, ຄຳແນະນຳ ກ່ຽວກັບການກຳນົດໂຄງສ້າງລາຄາ ເເລະ ອື່ນໆ ເພື່ອໃຫ້ຕອບສະໜອງຕາມຄວາມຮຽກຮ້ອງຕ້ອງການຕົວຈິງ;

8. ພ້ອມດຽວກັນນີ້, ຈະປຶກສາຫາລື ເເລະ ປັບປຸງກົນໄກການປະສານງານ ແລະ ແບບແຜນວິທີການເຮັດວຽກຂອງຄະນະຄຸ້ມຄອງລາຄາ ທັງຂັ້ນສູນກາງ ແລະ ຂັ້ນທ້ອງຖິ່ນໃຫ້ມີປະສິດທິພາບ ແລະ ປະສິດທິຜົນສູງຂຶ້ນຕື່ມ;

9. ພ້ອມທັງ, ຈະມີການປະສານສົມທົບ ກັບຄະນະກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ເພື່ອແລກປ່ຽນຂໍ້ມູນ, ຄໍາຄິດເຫັນ ແລະ ຄຳສະເໜີ ຂອງ ສສຊ ແລະ ປະຊາຊົນ ເພື່ອປັບປຸງການປະຕິບັດວຽກງານຄຸ້ມຄອງລາຄາສິນຄ້າຂອງລັດຖະບານ ໃຫ້ນັບມື້ນັບດີຂຶ້ນ.