ຄະນະປະຈໍາສະພາແຫ່ງຊາດ ຕີລາຄາ 6 ຜົນສຳເລັດພົ້ນເດັ່ນ ການຈັດຕັ້ງປະຕິບັດວຽກງານຂອງລັດຖະບານ

ທ່ານ ສົມມາດ ພົນເສນາ ຮອງປະທານສະພາແຫ່ງຊາດ ຜູ້ຊີ້ນໍາວຽກງານເສດຖະກິດ ໄດ້ຕາງໜ້າ ຄະນະປະຈໍາສະພາແຫ່ງຊາດ ຂຶ້ນມີຄໍາເຫັນຕໍ່ບົດລາຍງານການສະຫຼຸບຜົນການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ກາງສະໄໝ 5 ປີ (2021-2025), ທິດທາງແຜນການທ້າຍສະໄໝ ຮອດປີ 2025, ການເຄື່ອນໄຫວວຽກງານປະຈໍາປີ 2023 ແລະ ແຜນການ ປະຈໍາປີ 2024 ທີ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 31 ຕຸລາ ນີ້ວ່າ:

ຄະນະປະຈໍາສະພາແຫ່ງຊາດ ເຫັນດີຕໍ່ບົດລາຍງານຂອງລັດຖະບານ ຊຶ່ງສະແດງເຖິງຄວາມພະຍາຍາມສູ້ຊົນ ຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ ໃນເຄິ່ງສະໄໝ ຂອງແຜນ 5 ປີ ໃນທ່າມກາງສະພາບເສດຖະກິດຂອງພາກພື້ນ ແລະ ສາກົນ ພວມມີຄວາມຜັນແປຢ່າງສັບສົນ, ໂດຍສະເພາະບັນຫາ ເງິນເຟີ້, ລາຄານໍ້າມັນ, ອັດຕາແລກປ່ຽນ ແລະ ຂໍ້ຂັດແຍ່ງທາງດ້ານເສດຖະກິດ, ການທະຫານ-ການເມືອງ, ການແຜ່ລະບາດຂອງພະຍາດໂຄວິດ-19 ບວກກັບຂໍ້ຫຍຸ້ງຍາກ ດ້ານເສດຖະກິດ-ການເງິນ ແລະ ປະກົດການຫຍໍ້ທໍ້ຂອງສັງຄົມ, ແຕ່ລັດຖະບານກໍຍັງໄດ້ນໍາພາຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມ ເຄິ່ງສະໄໝ ຊຶ່ງສາມາດຍາດໄດ້ຜົນສໍາເລັດທີ່ພົ້ນເດັ່ນບາງດ້ານ ດັ່ງນີ້:

1). ການເຕີບໂຕເສດຖະກິດ ໃນ 2 ປີ ເຄິ່ງຜ່ານມາ ສະເລ່ຍ ໃນລະດັບ 4,03% (ມະຕິສະພາ 4%), ການເຕີບໂຕຂອງຂະແໜງການ ແລະ ການຫັນປ່ຽນໂຄງປະກອບເສດຖະກິດ ສາມາດປະຕິບັດໄດ້ລື່ນຄາດໝາຍທີ່ກໍານົດໃນມະຕິກອງ ປະຊຸມສະພາແຫ່ງຊາດ;

2). ການສົ່ງເສີມການລົງທຶນພາຍໃນ ແລະ ຕ່າງປະເທດ ໄດ້ຮັບການຈັດຕັ້ງປະຕິບັດສໍາເລັດໃນຫຼາຍຂົງເຂດການຜະລິດ ແລະ ບໍລິການ ທີ່ເປັນພື້ນຖານສໍາຄັນໃຫ້ແກ່ການເຕີບໂຕເສດຖະກິດໃນໄລຍະກາງ ແລະ ໄລຍະຍາວ;

3). ສາມາດເກັບລາຍຮັບເຂົ້າງົບປະມານແຫ່ງລັດໄດ້ລື່ນຄາດໝາຍ, ລາຍຮັບພາຍໃນສາມາດກຸ້ມລາຍຈ່າຍປົກກະຕິ ແລະ ມີສ່ວນເຫຼືອເພື່ອຊໍາລະໜີ້ສິນ, ປະຕິບັດນະໂຍບາຍປະຢັດ ແລະ ຕ້ານການຟຸ່ມເຟືອຍ;

4). ການປະຕິບັດນະໂຍບາຍເງິນຕາມີຄວາມຄືບໜ້າ ເປັນຕົ້ນການສ້າງຄວາມເຂັ້ມແຂງຄັງແຮສໍາຮອງເງິນຕາ, ການລະດົມເງິນຝາກ, ການປ່ອຍສິນເຊື່ອ ແລະ ການຄຸ້ມຄອງໜີ້ສິນທີ່ບໍ່ເກີດດອກອອກຜົນ ກໍມີຄວາມຄືບໜ້າດີພໍສົມຄວນ;

5). ການຈັດຕັ້ງປະຕິບັດ 45 ຄາດໝາຍໃນຂົງເຂດວັດທະນະທໍາ-ສັງຄົມ ມີ 21 ຄາດໝາຍສາມາດບັນລຸອັນພົ້ນເດັ່ນ ແມ່ນອັດຕາການຈົບຊັ້ນປະຖົມສຶກສາ, ການຝຶກອົບຮົມຄູຊັ້ນປະຖົມ, ມັດທະຍົມ; ການສ້າງບ້ານສາທາລະນະສຸກແບບຢ່າງເພີ່ມຂຶ້ນ, ອັດຕາການຕາຍຂອງເດັກ ລຸ່ມ 1 ປີ, 5 ປີ ແລະ ອັດຕາການຕາຍຂອງແມ່ຫຼຸດລົງ; ການຝຶກອົບຮົມ ແລະ ພັດທະນາສີມືແຮງງານຕາມສາຂາວິຊາຊີບຕ່າງໆ; ການຂະຫຍາຍລະບົບໂທລະໂຄງຢູ່ຂັ້ນບ້ານ ເພີ່ມຂຶ້ນ;

6). ການປະຕິບັດຄາດໝາຍໃນຂົງເຂດຊັບພະຍາກອນທໍາມະຊາດ, ສິ່ງແວດລ້ອມ, ການພັດທະນາຊົນນະບົດ, ແກ້ໄຂຄວາມທຸກຍາກ ແລະ ການຄຸ້ມຄອງບໍລິຫານລັດ ກໍໄດ້ມີຄວາມຄືບໜ້າຫຼາຍດ້ານ.

ນອກຈາກນີ້, ຄະນະປະຈໍາສະພາແຫ່ງຊາດ ກໍຍັງໄດ້ເຫັນວ່າມີຫຼາຍຄາດໝາຍ ທີ່ມີຄວາມສ່ຽງ ທີ່ຈະບໍ່ບັນລຸໄດ້ຕາມແຜນການ; ພ້ອມນີ້, ກໍເຫັນດີຕໍ່ທິດທາງແຜນການທ້າຍສະໄໝ ຮອດປີ 2025 ແລະ ແຜນການປະຈໍາປີ 2024 ຂອງລັດຖະບານ, ແຕ່ເພື່ອຮັບປະກັນໃຫ້ແກ່ການຈັດຕັ້ງປະຕິບັດດັ່ງກ່າວ ກໍຍັງໄດ້ສະເໜີບາງມາດຕະການເພີ່ມຕື່ມ ເປັນຕົ້ນແມ່ນສືບຕໍ່ປະຕິບັດທິດທາງລວມ, ເປົ້າໝາຍລວມ ແລະ ແຜນວຽກຈຸດສຸມຂອງລັດຖະບານ ຕາມທີ່ໄດ້ກຳນົດໄວ້ໃນມະຕິກອງປະຊຸມສະພາແຫ່ງຊາດ ໃຫ້ປະກົດຜົນເປັນຈິງ, ມີປະສິດທິພາບ ແລະ ປະສິດທິຜົນ, ປະຕິບັດຕາມຈິດໃຈຂອງກອງປະຊຸມສູນກາງພັກ ກໍຄືກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ XI.