ລາວ-ຫວຽດນາມ ແລກປ່ຽນບົດຮຽນຕ້ານການຄ້າຂາຍຢາເສບຕິດ ຢູ່ບໍລິເວນຊາຍແດນ

ກອງປະຊຸມຮ່ວມມືແລກປ່ຽນບົດຮຽນ ລະຫວ່າງ ກົມໃຫຍ່ຕໍາຫລວດ ກະຊວງປ້ອງກັນຄວາມສະຫງົບ ສປປ ລາວ ກັບ ກອງບັນຊາການທະຫານຊາຍແດນ ກະຊວງປ້ອງກັນປະເທດ ສສ ຫວຽດນາມ ດຳເນີນໄປໃນວັນທີ 26 ຕຸລາ 2023, ໂດຍການເປັນປະທານຮ່ວມ ຝ່າຍລາວນຳໂດຍ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ສປປ ລາວ, ຝ່າຍ ສສ ຫວຽດນາມນຳໂດຍ ພົນຕີ ເລ ດຶກ ຖ້າຍ ຫົວໜ້າກອງບັນຊາການທະຫານຊາຍແດນ ກະຊວງປ້ອງກັນປະເທດ ສສ ຫວຽດນາມ.

ກອງປະຊຸມ ໄດ້ຟັງການລາຍງານຫຍໍ້ຕີລາຄາສະພາບການຮ່ວມມື ໃນໄລຍະຜ່ານມາ  ເປັນຕົ້ນແມ່ນໄດ້ຮ່ວມກັນເອົາໃຈໃສ່ເຄື່ອນໄຫວເຮັດວຽກງານສະກັດກັ້ນ ແລະ ຕ້ານປະກົດການຫຍໍ້ທໍ້ໃນສັງຄົມ ຢູ່ລຽບຊາຍແດນຂອງສອງປະເທດຢ່າງຕັ້ງໜ້າດ້ວຍຫຼາຍວິທີການ, ຍາດໄດ້ຜົນງານຫຼາຍດ້ານ, ສາມາດຮັກສາໄດ້ສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍໃນສັງຄົມໄດ້ໂດຍພື້ນຖານ, ອັນທີ່ພົ້ນເດັ່ນແມ່ນ ໄດ້ປະສານສົມທົບກັບພາກສ່ວນທີ່ກ່ຽວ ຂ້ອງ ເພື່ອສະກັດກັ້ນ ແລະ ມ້າງກຸ່ມແກ້ງພວກລັກລອບຄ້າຂາຍຢາເສບຕິດ ຢູ່ບໍລິເວນຊາຍແດນ ດ້ວບການລົງຕິດຕາມເປົ້າໝາຍລັກລອບຄ້າຂາຍຢາເສບຕິດ 12 ຄັ້ງ, ມ້າງຄະດີໄດ້ 12 ເລື່ອງ, ກັກຕົວຜູ້ຖືກຫາໄດ້ 14 ຄົນ ຍິງ 4 ຄົນ, ຢຶດຂອງກາງປະເພດຢາບ້າໄດ້ ຫຼາຍກວ່າ235.000 ເມັດ, ເຮໂຣອິນ 1 ແທງ, ຝິ່ນ 2 ກ້ອນ ນ້ຳໜັກ 1ກິໂລກວ່າ, ອາວຸດລ່າເນື້ອ 6 ກະບອກ, ລູກປືນ 6 ລູກ, ລົດໃຫຍ່ 2 ຄັນ, ລົດຈັກ 5 ຄັນ ແລະ ອື່ນໆ.

ໄດ້ຮ່ວມກັນລົງສໍາຫຼວດ ແລະ ຂຶ້ນສຳມະໂນຄົວໃຫ້ປະຊາຊົນ ຢູ່ບໍລິເວນຊາຍແດນ, ເອົາໃຈໃສ່ໂຄສະນາສຶກສາອົບຮົມພໍ່-ແມ່ປະຊົນ ຢູ່ບໍລິເວນຊາຍແດນທັງສອງປະເທດ ໃຫ້ຮັບຮູ້ເຖິງຜົນຮ້າຍຂອງຢາເສບຕິດ ແລະ ຮູ້ແຈ້ງກ່ຽວກັບລະບຽບກົດໝາຍ, ຊ່ວຍກັນເປັນຫູເປັນຕາຕິດຕາມເກັບກຳສະພາບການເຄື່ອນໄຫວ ຂອງກຸ່ມຄົນບໍ່ດີ ແລ້ວລາຍງານຕໍ່ເຈົ້າໜ້າທີ່ ລົງແກ້ໄຂໃຫ້ທັນກັບສະພາບການ ແລະ ໃນຕໍ່ໜ້າ ສອງຝ່າຍຈະສືບຕໍ່ຊີ້ນຳກົມວິຊາສະເພາະທີ່ກ່ຽວຂ້ອງ ໃຫ້ເອົາໃຈໃສ່ຈັດຕັ້ງຜັນຂະຫຍາຍຂໍ້ຕົກລົງການຮ່ວມມືທີ່ໄດ້ເຊັນຮ່ວມກັນ ໃຫ້ປະກົດຜົນເປັນຈິງ ແລະ ສືບຕໍ່ຜັດປ່ຽນກັນເປັນເຈົ້າພາບຈັດກອງປະຊຸມແລກປ່ຽນບົດຮຽນ.