6 ວຽກງານຈຸດສຸມຂະແໜງອຸດສາຫະກຳ ແລະ ການຄ້າ ເພື່ອແກ້ໄຂບັນຫາຫຍຸ້ງຍາກທາງດ້ານເສດຖະກິດ-ການເງິນ

ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ ມີຄຳເຫັນໃນກອງປະຊຸມປຶກສາຫາລືກ່ຽວກັບການຈັດຕັ້ງຜັນຂະຫຍາຍວຽກງານ ຂອງຄະນະ 19/ກມສພ  ໃນຂະແໜງອຸດສາຫະກຳ ແລະ ການຄ້າ 3 ເດືອນຜ່ານມາ ແລະ ທິດທາງໃນຕໍ່ໜ້າ ໃນການປະກອບສ່ວນແກ້ໄຂບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ຕາມມະຕິຕົກລົງ ເລກທີ 19/ກມສພ ກໍຄືການແກ້ໄຂບັນຫາຫຍຸ້ງຍາກທາງດ້ານເສດຖະກິດ-ການເງິນ ຊຶ່ງເປັນບັນຫາເຄັ່ງຮ້ອນ ທີ່ປະເທດເຮົາ ກໍາລັງປະເຊີນຢູ່ທີ່ຈັດຂຶ້ນ ວັນທີ  27 ຕຸລາ 2023, ພ້ອມທັງເນັ້ນໃຫ້ຜູ້ຊີ້ນໍາແຕ່ລະກຸ່ມມາດຕະການສືບຕໍ່ເອົາໃຈໃສ່ນຳພາ–ຊີ້ນໍາ ລົງເລິກລະອຽດແຕ່ລະກຸ່ມມາດຕະການ ຄື:

1. ສືບຕໍ່ປະສານສົມທົບ ແລະ ເຮັດວຽກຮ່ວມກັນ ລະຫວ່າງ ບັນດາກຸ່ມມາດຕະການ ແລະ ສະພາການຄ້າ ແລະ ອຸດສາຫະກໍາ ແຫ່ງຊາດລາວ ໃນການຄົ້ນຄວ້າຈັດຕັ້ງປະຕິບັດແຕ່ລະກຸ່ມມາດຕະການໃຫ້ມີປະສິດທິຜົນສູງ.
2. ສືບຕໍ່ຄົ້ນຄວ້າແຫລ່ງທຶນ ແລະ ຜູ້ສະໜັບສະໜູນ ໂດຍສະເພາະພາກທຸລະກິດຜູ້ທີ່ມີທ່າແຮງ ຈັດໂຄງການຂາຍສິນຄ້າລາຄາປະຢັດ ເພື່ອຊ່ວຍຫລຸດຜ່ອນຜົນກະທົບຕໍ່ຊີວິດການເປັນຢູ່ຂອງຜູ້ທີ່ມີລາຍຮັບຕ່ຳ ກໍຄືຊ່ວຍເຫລືອສັງຄົມໃຫ້ເປັນຂະບວນຟົດຟື້ນກວ່າເກົ່າ.
3. ສົມທົບກັບຂະແໜງການກ່ຽວຂ້ອງ ໃນການມາດຕະການທາງດ້ານການຄ້າທີ່ບໍ່ແມ່ນພາສີ ເພື່ອຈຳກັດການນຳເຂົ້າສິນຄ້າຟູມເຟືອຍ ແລະ ສິນຄ້າທີ່ສາມາດຜະລິດ ແລະ ສະໜອບພາຍໃນ ລວມທັງການຄົ້ນຄວ້າໂຄງປະກອບການນໍາເຂົ້າສິນຄ້າ ເພື່ອກໍານົດປະເພດສິນຄ້ານໍາເຂົ້າທີ່ຈະສາມາດຜະລິດທົດເເທນການນໍາເຂົ້າ.
4. ໃຫ້ປະສົມທົບ ແລະ ຊຸກຍູ້ຂະແໜງການກ່ຽວຂ້ອງ ໃນການຕິດອຳນວຍຄວາມສະດວກທາງດ້ານການຄ້າ ແລະ ການຂົນສົ່ງ ເພື່ອແກ້ໄຂບັນຫາຄວາມຫຍຸ້ງຍາກຕ່າງໆ ຂອງພາກທຸລະກິດ.
5. ຊຸກຍູ້ສົ່ງເສີມການຜະລິດພາຍໃນເປັນສິນຄ້າ ແລະ ສົ່ງເສີມການຊົມໃຊ້ຜະລິດຕະພັນພາຍໃນ ໂດຍສະເພາະ ເພີ່ມທະວີການໂຄສະນາໃຫ້ປະຊາຊົນ ຮັບຮູ້ ແລະ ຫັນມາຊົມໃຊ້ຜະລິດຕະພັນພາຍໃນໃຫ້ຫລາຍຂຶ້ນ ຕາມມາດຕະການທີ່ວາງໄວ້ໃຫ້ມີໝາກຜົນຕົວຈິງ.
6. ເພີ່ມທະວີເອົາໃຈໃສ່ວຽກງານໂຄສະນາປະຊາສໍາພັນ, ຊີ້ແຈງຂໍ້ມູນທີ່ຖືກຕ້ອງ ແລະ ຊັດເຈນ ໃຫ້ສັງຄົມຮັບຊາບ ແລະ ເຂົ້າໃຈ ດ້ວຍຫລາຍແບບ ຫລາຍສີສັນ ແລະ ຫລາຍຊ່ອງທາງ.