ຜູ້ທີ່ຖືກເຄາະຮ້າຍຈາກລະເບີດບໍ່ທັນແຕກ ຢູ່ ເມືອງແອດ ແຂວງຫົວພັນ ໄດ້ຮັບງົວ 38 ໂຕ ເພື່ອຟື້ນຟູຄຸນນະພາບຊີວິດ

ວັນທີ 25 ຕຸລາ 2023, ພິທີມອບ-ຮັບງົວໃຫ້ຜູ້ທີ່ຖືກເຄາະຮ້າຍຈາກລະເບີດບໍ່ທັນແຕກທີ່ຕົກຄ້າງມາແຕ່ສະໄໝສົງຄາມ ເພື່ອຊ່ວຍເຫລືອ ແລະ ຟື້ນຟູຄຸນນະພາບຊີວິດຂອງຜູ້ຖືກເຄາະຮ້າຍ, ເຊິ່ງມີ 19 ຄອບຄົວ ໃນ 9 ບ້ານຂອງເມືອງແອດ ແຂວງຫົວພັນ,ກ່າວມອບໂດຍ ທ່ານ ອົມ ພົມບຸນມີໄຊ ຄະນະພະແນກແຮງງານ ແລະ ສະຫວັດດີການສັງຄົມ, ທ່ານ ວົງສັກດາ ຮອງຫົວໜ້າຫ້ອງການຄະນະກຳມະການແກ້ໄຂລະເບີດບໍ່ທັນແຕກແຂວງຫົວພັນ ເຊິ່ງເປັນຜູ້ຕາງໜ້າໃຫ້ອົງການຄິວລາ(QLA) ແລະ ກ່າວຮັບໂດຍທ່ານ ນ. ດວງ ແກ້ວອຸ່ນຄຳ ກຳມະການພັກເມືອງ ຫົວໜ້າຫ້ອງການ ຮສສ ເມືອງແອດ, ງົວທີ່ມອບຄັ້ງນີ້ມີ 38 ໂຕ ລວມມູນຄ່າ 95.000.000 ກີບ.

ນອກນັ້ນ, ທ່ານ ອົມ ພົມບຸນມີໄຊ ໄດ້ເນັ້ນໃຫ້ປະຊາຊົນຜູ້ທີ່ໄດ້ຮັບງົວ ນຳເອົາງົວໄປລ້ຽງໃຫ້ເກີດແມ່ແພ່ລູກ ພ້ອມທັງນຳໃຊ້ໃຫ້ເປັນປະໂຫຍດແກ່ຄອບຄົວສູງສຸດ ແລະ ຍາວນານ ພ້ອມນີ້ຍັງມອບໃຫ້ຫ້ອງການ ຮສສ ເມືອງ ລົງຊຸກຍູ້ຕິດຕາມຢ່າງໃກ້ຊິດຕື່ມອີກ.