ລາວ-ເກົາຫລີ ຮ່ວມມືກັນປະຕິບັດໂຄງການຂະຫຍາຍການຄຸ້ມຄອງຂີ້ເຫຍື້ອ ແລະ ນໍ້າເປື້ອນແບບຍືນຍົງ ໃນ ສປປ ລາວ
ວັນທີ 27 ຕຸລາ 2023, ກະຊວງແຜນການ ແລະ ການລົງທຶນ ແລະ ອົງການຮ່ວມມືສາກົນ ສ ເກົາຫລີ (KOICA) ປະຈຳລາວ ໄດ້ເຊັນບົດບັນທຶກການຮ່ວມມືໂຄງການຂະຫຍາຍການຄຸ້ມຄອງຂີ້ເຫຍື້ອ ແລະ ນໍ້າເປື້ອນແບບຍືນຍົງເພື່ອປັບປຸງວຽກງານສາທາລະນະສຸກ ແລະ ສິ່ງແວດລ້ອມໃນ ສປປ ລາວ, ລະຫວ່າງ ທ່ານ ໄພເລີດ ພົນບູລົມ ຫົວໜ້າກົມແຜນການ ແລະ ການລົງທຶນ ແລະ ທ່ານ ນາງ ມີຢອງຈິນ ຄິມ ຫົວໜ້າອົງການ KOICA ປະຈຳລາວ.
ເພື່ອເປັນການຮ່ວມມືໂຄງການຂະຫຍາຍການຄຸ້ມຄອງຂີ້ເຫຍື້ອ ແລະ ນໍ້າເປື້ອນແບບຍຶືນຍົງເພື່ອປັບປຸງວຽກງານສາທາລະນະສຸກ ແລະ ສິ່ງແວດລ້ອມໃນ ສປປ ລາວ ລະຫວ່າງ ລັດຖະບານ ແຫ່ງ ສປປ ລາວ ກັບ ອົງການ KOICA ແລະ ສະຖາບັນການເຕີບໂຕສີຂຽວສາກົນ ຮອດປີ 2027, ເຊິ່ງຄາດວ່າຈະສົ່ງເສີມການວາງແຜນການເຕີບໂຕສີຂຽວ ແລະ ການພັດທະນາແຜນພັດທະນາເສດຖະກິດ-ສັງຄົມຂອງຊາດ ແລະ ແຂວງ, ໂຄງການນີ້ຈະເພີ່ມຂີດຄວາມສາມາດໃນການຄຸ້ມຄອງສິ່ງເສດເຫລືອ ຂອງນະຄອນຫລວງວຽງຈັນ ແລະ ແຂວງວຽງຈັນ ໂດຍການສ້າງລະບົບການຈັດການສິ່ງເສດເຫລືອແບບບໍ່ລວມສູນ (DEWACS) ແລະ ສ້າງໂຮງງານຜະລິດຝຸ່ນບົ່ມຈາກສິ່ງເສດເຫລືອມາເປັນຊັບພະຍາກອນ (IRRC) 2 ແຫ່ງທີ່ເມືອງສັງທອງ ນະຄອນຫລວງວຽງຈັນ ແລະ ວັງວຽງ ແຂວງວຽງຈັນ.
ໂຄງການນີ້ຍັງຈະເສີມຂະຫຍາຍການບໍາບັດ ແລະ ການຄຸ້ມຄອງນໍ້າເປື້ອນໂດຍການກໍ່ສ້າງລະບົບບໍາບັດນ້ຳເປື້ອນແບບບໍ່ລວມສູນ (DEWATS) ແລະ ໂຮງງານບຳບັດອາຈົມ (FSTP) ທີ່ນະຄອນໄກສອນ ພົມວິຫານ, ໂຄງການມີງົບປະມານທັງໝົດ 10,5 ລ້ານໂດລາສະຫະລັດ ທີ່ໄດ້ຮັບທຶນຊ່ວຍເຫລືອຈາກສາທາລະນະລັດເກົາຫລີຜ່ານ ອົງການ KOICA.
