ເປີດຕະຫລາດນັດແຮງງານ ເພື່ອສົ່ງເສີມສ້າງວຽກເຮັດງານທຳໃຫ້ຜູ້ວ່າງງານເຂົ້າເຖິງຕະຫລາດແຮງງານຫລາຍຂຶ້ນ

ກະຊວງ ແຮງງານ ແລະ ສະຫວັດດີການສັງຄົມ ເປີດຕະຫລາດນັດແຮງງານ 2023 ໃນວັນທີ 27-29 ຕຸລາ 2023, ທີ່ສູນວາງສະແດງສິນຄ້າລາວ-ໄອເຕັກ (ຕຶກເກົ່າ) ນະຄອນຫລວງວຽງຈັນ, ເພື່ອສົ່ງເສີມໃຫ້ປະຊາຊົນທີ່ວ່າງງານເຂົ້າເຖິງຕະຫລາດນັດແຮງງານຫລາຍຂຶ້ນ. ພ້ອມ​ນັ້ນ, ກໍມີຫລາຍກິດຈະກຳທີ່ໜ້າສົນໃຈ ເປັນຕົ້ນ ແມ່ນການລົງທະບຽນຮັບສະໝັກງານ, ການໃຫ້ຂໍ້ມູນຂ່າວສານຕະຫລາດແຮງງານ, ຂໍ້ມູນກ່ຽວກັບການຝຶກອົບຮົມວິຊາຊີບ ແລະ ການແນະນຳສາຍການຮຽນ, ການເຜີຍແຜ່ເວບໄຊບໍລິການຈັດຫາງານ ສາທາລະນະຊົນ ແລະ ກົດໝາຍແຮງງານ.

ທ່ານ ນາງ ຄຳໃບ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ກ່າວວ່າ: ງານຕະຫລາດນັດແຮງງານ ແມ່ນໜຶ່ງໃນກິດຈະກຳສົ່ງເສີມການມີວຽກເຮັດງານທຳ ແລະ ການເຂົ້າສູ່ຕຳແໜ່ງງານທັງພາຍໃນ ແລະ ຕ່າງປະເທດ, ເພື່ອເຮັດໃຫ້ຜູ້ຕ້ອງການແຮງງານ ແລະ ຜູ້ຢາກເຮັດວຽກມາພົບກັນ, ຂຶ້ນທະບຽນ, ສຳພາດ, ຕົກລົງ ແລະ ບັນຈຸເຂົ້າສູ່ຕຳແໜ່ງງານ ເພື່ອເກີດການຈ້າງງານ, ເພື່ອເປັນການໂຄສະນາປະຊາສຳພັນຕຳແໜ່ງງານທີ່ກຳລັງວ່າງ ແລະ ຕຳແໜ່ງງານທີ່ຈະເກີດຂຶ້ນໃໝ່ໃນປັດຈຸບັນ ແລະ ອະນາຄົດຂອງບັນດາຫົວໜ່ວຍແຮງງານ, ເພື່ອສ້າງຄວາມເຂົ້າໃຈໃຫ້ແກ່ກຳລັງແຮງງານ ແລະ ຜູ້ໃຊ້ແຮງງານຕື່ມທາງດ້ານນິຕິກຳວ່າດ້ວຍແຮງງານ ແລະ ປະກັນສັງຄົມ, ຮັບຮູ້ຂໍ້ມູນຂ່າວສານຕະຫລາດແຮງງານເພື່ອເປັນຂໍ້ມູນໃຫ້ແກ່ສັງຄົມໃນການຮຽນວິຊາຊີບ ແລະ ຮຽນລະດັບຕ່າງໆ ຕາມຄວາມຕ້ອງການຂອງຕະຫລາດແຮງງານ, ທັງເປັນການປັບປຸງກົນໄກການປະສານງານລະຫວ່າງພາກລັດ, ພາກທຸລະກິດ, ສັງຄົມ ໃຫ້ມີຄວາມກົມກຽວ, ຮ່ວມມື ແລະ ຊຸກຍູ້ສົ່ງເສີມ​ເຊິ່ງກັນ ແລະ ກັນດ້ານແຮງງານ ແລະ ສະຫວັດດີການສັງຄົມ​. ໃນງານຄັ້ງນີ້ໂດ​ຍງານຕະຫລາດນັດແຮງງານ ຄັ້ງນີ້, ມີທັງໝົດ 97 ຫ້ອງ, ມີບໍລິສັດຫ້າງຮ້ານ 75 ພາກສ່ວນ​ເຂົ້າ​ຮ່ວມ .

ດັ່ງນັ້ນ, ໃຫ້ຜູ້ປະກອບການ, ກຳລັງແຮງງານ ແລະ ມວນຊົນ​ເຂົ້າ​ຮ່ວມ ເພື່ອສະໝັກເຂົ້າສູ່ຕຳແໜ່ງງານໃຫ້ຫລາຍຂຶ້ນເພື່ອແກ້ໄຂບັນຫາການຂາດແຄນແຮງງານພາຍໃນ.