ຕວກກີຮຽກຮ້ອງ WHO ເພີ່ມຄວາມພະຍາຍາມຊ່ວຍເຫລືອພົນລະເມືອງຢູ່ເຂດກາຊາ
ທ່ານ ຟາເຣດຕິນ ໂຄກາ ລັດຖະມົນຕີສາທາລະນະສຸກຂອງຕວກກີ ກ່າວໃນວັນທີ 26 ຕຸລາວ່າ: ທ່ານໄດ້ຮຽກຮ້ອງໃຫ້ອົງການອະນາໄມໂລກ (WHO) ຮັບປະກັນການໃຫ້ບໍລິການທາງການແພດແກ່ພົນລະເມືອງທີ່ອາໄສຢູ່ໃນເຂດກາຊາ ເຊິ່ງໄດ້ຮັບຜົນກະທົບຈາກສົງຄາມອິດສະລາແອນ-ຮາມັດ. ພ້ອມເນັ້ນວ່າ: ຄວາມພະຍາຍາມາຮອດປັດຈຸບັນຍັງຖືວ່າບໍ່ພໍພຽງ.
ສໍານັກຂ່າວຣອຍເຕີລາຍງານວ່າ: ຕວກກີໄດ້ສົ່ງເຮືອບິນຂົນສົ່ງສິນຄ້າ 9 ລໍາໄປອີຢິບ ເພື່ອສົ່ງມອບການຊ່ວຍເຫລືອຢູ່ເຂດກາຊາ ແລະ ສະເໜີຈະຈັດຕັ້ງໂຮງໝໍພາກສະໜາມຢູ່ອີຢິບ ເພື່ອຊ່ວຍປິ່ນປົວຜູ້ບາດເຈັບ ແລະ ລໍາລຽງຜູ້ບາດເຈັບບາງສ່ວນໄປຕວກກີຖ້າຈໍາເປັນ. ອີກທັງ ຕວກກີໄດ້ປະນາມການໂຈມຕີຂອງອິດສະລາແອນຕໍ່ດິນແດນປາແລັສຕິນ ແລະ ຮຽກຮ້ອງໃຫ້ຢຸດຍິງເພື່ອມະນຸດສະທໍາໃນທັນທີ ເພື່ອນໍາເອົາການຊ່ວຍເຫລືອເຂົ້າໄປໃນເຂດກາຊາໄດ້.
ຂະນະດຽວກັນ, ທ່ານ ໂຄກາ ໄດ້ສົ່ງຈົດໝາຍເຖິງທ່ານ ເທດຣອສ ອາດານອມ ເກເບຣເຍຊຸສ ຜູ້ອໍານວຍການຂອງ WHO ໃນວັນທີ 25 ຕຸລາຜ່ານມາ ເພື່ອເນັ້ນເຕືອນເຖິງຄວາມຮັບຜິດຊອບທາງວິຊາຊີບຂອງ WHO ໃນການຊ່ວຍເຫລືອພົນລະເຮືອນທີ່ຕ້ອງການການຊ່ວຍເຫລືອ. ພ້ອມຊີ້ວ່າ: WHO ຄວນຈະພະຍາຍາມໃຫ້ຫລາຍກວ່ານີ້.
ທັງນີ້, ພັນທະມິດຂອງຕວກກີໃນອົງກອນສົນທິສັນຍາອັດລັງຕິກເໜືອ (ນາໂຕ) ແລະ ສະຫະພາບເອີຣົບ (EU) ຈໍານວນຫລາຍເບິ່ງວ່າ: ກຸ່ມຕິດອາວຸດຮາມັດທີ່ຄວບຄຸມເຂດກາຊາຢູ່ນັ້ນ ເປັນອົງກອນກໍ່ການຮ້າຍ, ແຕ່ປະທານາທິບໍດີ ເຣເຊບ ຕອຍຍິບ ເອີໂດກັນ ຜູ້ນໍາຕວກກີ ກ່າວວ່າ: ກຸ່ມຮາມັດເປັນກຸ່ມປົດປ່ອຍທີ່ຕໍ່ສູ້ເພື່ອປົກປ້ອງດິນແດນ ແລະ ຊາວປາແລັສຕິນ. ຂະນະດຽວກັນຍັງໄດ້ຕໍາໜິປະເທດຕາເວັນຕົກທີ່ສະໜັບສະໜູນອິດສະລາແອນ.
