ຈອງຄິວອອນລາຍ ເຮັດໜັງສືຜ່ານແດນ ອາດບໍ່ແມ່ນທາງອອກຂອງບັນຫາ

ການຈອງຄິວຜ່ານອອນລາຍເພື່ອຍື່ນເອກະສານເຮັດໜັງສືຜ່ານແດນ ຢູ່ນະຄອນຫລວງວຽງຈັນ ເລີ່ມແຕ່ວັນທີ 20 ກຸມພາ 2023 ເປັນຕົ້ນມາ ເຊິ່ງຫລາຍຄົນກໍຄາດຫວັງວ່ານັ້ນອາດເປັນມາດຕະການແກ້ໄຂບັນຫາແອອັດຢູ່ໜ້າກົງສຸນ ແລະ ອາດຈະເຮັດໃຫ້ການເຮັດໜັງສືຜ່ານແດນວ່ອງໄວຂຶ້ນ ແຕ່ໃນຄວາມຈິງການເຮັດໜັງສືຜ່ານແດນຍັງໄດ້ລໍຖ້າຍືດເຍື້ອ ແກ່ຍາວເວລາ ອອກໄປອີກຈົນເຖິງຕົ້ນປີ 2024, ໄລຍະຫລາຍເດືອນຜ່ານມາ ໜັງສືພິມລາວພັດທະນາໄດ້ຮັບການສ່ອງແສງຈາກປະຊາຊົນເປັນຈຳນວນຫລາຍ ມາຕະຫລອດ ເພື່ອຈະຫາຄຳຕອບໃນ ການແກ້ໄຂບັນຫາ ເລື່ອງການຈອງຄິວຜ່ານອອນລາຍທີ່ຍືດເຍື້ອຍາວນານ ຈາກພາກສ່ວນກ່ຽວຂ້ອງ.

ທີມຂ່າວໜັງສືພິມລາວພັດທະນາ ໄດ້ສັງລວມບັນຫາຕ່າງໆທີ່ເກີດຂຶ້ນ ໃນໄລຍະຕັ້ງແຕ່ມີການເປີດລະບົບຈອງຄິວອອນລາຍ ເພື່ອຍື່ນເອກະສານສຳພາດ ເປັນຕົ້ນມາ ປະກອບມີ 5 ຢ່າງທີ່ໜ້າສົນໃຈຄື:
1.ພົບເຫັນມີຊື່ ແລະ ນາມສະກຸນຜູ້ຈອງຄິວສຳພາດທີ່ເປັນຄົນໆດຽວ ຊໍ້າໆກັນ ໃນມື້ດຽວ ຫລື ວັນຕ່າງກັນຈຳນວນຫລາຍ ເຮັດໃຫ້ຕົວເລກໃນລະບົບເພີ່ມຂຶ້ນ.
2. ມີການຈອງຄິວແລ້ວ ແຕ່ບໍ່ມີການສຳພາດ ກໍລະນີດັ່ງກ່າວນີ້ ຊີ້ໃຫ້ເຫັນໃນລະບົບ ຫາກມີການນຳເອົາຄິວອາໂຄດໄປຍື່ນຈະໄດ້ຮັບການຢືນຢັນ ແລະ ຂຶ້ນສະຖານະວ່າ “ເຂົ້າສຳພາດແລ້ວ” ແຕ່ຊື່ຈອງຈຳນວນຫລາຍບໍ່ໄດ້ຮັບສະຖານະຢືນຢັນ.
3. ມີການຈອງຄິວສຳເລັດ ແຕ່ບໍ່ສາມາດນຳເອົາຄິວອາໂຄດເຂົ້າໄປຢືນຢັນ ສຳພາດໄດ້ ກໍລະນີດັ່ງນີ້ ເກີດຂຶ້ນເມື່ອຕົ້ນເດືອນຕຸລາ 2023 ນີ້ ເຊິ່ງໄດ້ຮັບການສ່ອງແສງວ່າ ໄດ້ມີການຈອງຄິວຕັ້ງແຕ່ເດືອນສິງຫາ ແລະ ໄດ້ຄິວນັດໃນຕົ້ນເດືອນຕຸລາ ເມື່ອຮອດມື້ນັດຍື່ນເອກະສານ ກໍໄດ້ນຳເອົາຄິວອາໂຄດທີ່ໄດ້ຮັບໄປຍື່ນ ແຕ່ຖືກປະຕິເສດຈາກລະບົບ ກາຍເປັນບັດຕາຍ ຕ້ອງໄດ້ຈອງໃໝ່.
4. ມີນາຍໜ້າຮັບລັດຄິວ ເພື່ອຍື່ນເອກະສານນອກລະບົບຈອງຄິວ ໂດຍສະເພາະມີການໂພສຜ່ານເຟສບຸກ ແລະ ນອກກົງສຸນຈຳນວນຫລາຍ ແຕ່ຕ້ອງຈ່າຍເພີ່ມຢ່າງຕໍ່າ 2.000.000 ກີບ
5. ມີການຈອງຄິວເຕັມແລ້ວ ຮອດເດືອນມີນາ 2024 ຈາກການກວດເຊັກໃນລະບົບເວັບໄຊຂອງກົງສຸນ ວັນທີ 27 ຕຸລາ 2023 ພົບວ່າ ມີປະຊາຊົນເຂົ້າຈອງຄິວໃນລະບົບເຕັມຈົນເຖິງຕົ້ນເດືອນມີນາ 2024.
ເຫດຜົນທງັໝົດທີ່ກ່າວມາ ຊີ້ໃຫ້ເຫັນວ່າ ບັນຫາການເຮັດໜັງສືຜ່ານແດນຍັງຊັກຊ້າ ຍືດເຍື້ອຍາວນານ ແລະ ການເປີດລະບົບໃຫ້ມີການຈອງຄິວຜ່ານອອນລາຍເພື່ອຍື່ນເອກະສານເຂົ້າສຳພາດນັ້ນ ອາດບໍ່ແມ່ນທາງອອກຂອງບັນຫາ ເຊິ່ງພາກສ່ວນກ່ຽວຂ້ອງຄວນພິຈາລະນາ ຫາວິທີທາງອອກໃໝ່ທີ່ເໝາະສົມ ເພື່ອໃຫ້ມີຄວາມສະດວກສະບາຍ ແລະ ວ່ອງໄວຂຶ້ນກວ່າເກົ່າ.