ປກສ ນວ ກຽມພ້ອມຕະຫລອດ 24 ຊົ່ວໂມງ ເພື່ອສະກັດກັ້ນອັກຄີໄພ ໄລຍະບຸນອອກພັນສາ ແລະ ບຸນຊ່ວງເຮືອທ່າວັດຈັນ ປີ 2023
ພັນໂທ ອຸ້ຍເພັດ ທອງຄຳສີ ຮອງຫົວໜ້າພະແນກຕຳຫລວດ ສະກັດກັ້ນ ແລະ ຕ້ານອັກຄີໄພ ປກສ ນວ ລາຍງານວ່າ: ໃນໄລຍະງານບຸນອອກພັນສາປະວໍລະນາ ແລະ ງານບຸນຊ່ວງເຮືອທ່າວັດຈັນ ແຕ່ວັນທີ 27 – 30 ຕຸລາ 2023, ເຈົ້າໜ້າທີ່ ພະແນກຕຳຫລວດ ສະກັດກັ້ນ ແລະ ຕ້ານອັກຄີໄພ ປກສ ນວ ໄດ້ຈັດວາງກຳລັງ ເປັນ 2 ຈຸໃຫຍ່ ປະຈຳການຕະຫລອດ 24 ຊົ່ວໂມງ ກຽມພ້ອມທາງດ້ານພາຫະນະ ແລະ ກໍາລັງ ໃນແຕ່ລະມື້ ໃນການອອກປະຕິບັດໜ້າທີ່ໃຫ້ທັນການ ຫາກມີອັກຄີໄພເກີດຂຶ້ນ ຫລື ວຽກທາງການທີ່ຮີບດ່ວນ ເພື່ອຮັບໃຊ້ສັງຄົມໃຫ້ມີຄວາມສະດວກ, ວອງໄວ ແລະ ທັນການຂຶ້ນກົ່ວເກົ່າ ຫລຸດຜ່ອນຄວາມເສຍຫາຍທີ່ເກີດຂຶ້ນຈາກອັກຄີໄພ ທີ່ເກີດຈາກຄວາມຂາດສະຕິຂອງສັງຄົມໃນການນຳໃຊ້ແຫລ່ງຄວາມຮ້ອນ ເປັນຕົ້ນກະແສໄຟຟ້າແບບບໍ່ຖືກຕ້ອງຕາມຫລັກການ, ການຈູດຂີ້ເຫຍື້ອ, ຈູດທູບທຽນບູຊາ, ຈູດຫຍ້າ – ຈູດສວນ ແລະ ອື່ນໆ,
ພັນໂທ ອຸ້ຍເພັດ ທອງຄຳສີ ຮອງຫົວໜ້າພະແນກຕຳຫລວດ ສະກັດກັ້ນ ແລະ ຕ້ານອັກຄີໄພ ປກສ ນວ, ຍັງໄດ້ຮຽກຮ້ອງໃຫ້ທຸກຄົນໃນທົ່ວສັງຄົມຈົ່ງເອົາໃຈໃສ່ເຮັດວຽກງານປ້ອງກັນອັກຄີໄພໃນໄລຍະງານບຸນອອກພັນສາ ປີ 2023 ນີ້ ໃຫ້ມີຄວາມປອດໄພ ແລະ ຫ້າມຈູດໝາກກະໂພກ, ບັ້ງໄຟດອກ ຫລື ທາດແຕກອື່ນໆ ທີ່ຈະພາໃຫ້ເກີດອັກຄີໄພ ແລະ ສ້າງຄວາມບໍ່ສະຫງົບໃນສັງຄົມ ແລະ ປະເທດຊາດ; ຖ້າຫາກເກີດອັກຄີໄພ ທຸກທ່ານສາມາດແຈ້ງໄປທີ່ໝາຍເລກໂທລະສັບ 1190 ແລະ 021 212707 ແລະ 021 212708 ຕະຫລອດ 24 ຊົ່ວໂມງ.
