ກຳນົດເສັ້ນທາງເຂົ້າ-ອອກ ງານບຸນຊ່ວງເຮືອທ່າວັດຈັນ ປະຈໍາປີ 2023

ພັທ ຄໍາພູ ສົມແພງພັນ ຮອງຫົວໜ້າພະແນກຕໍາຫລວດຈະລາຈອນ ປກສ ນະຄອນຫລວງວຽງຈັນ ໄດ້ກໍານົດເສັ້ນທາງສັນຈອນ ແລະ ບ່ອນຈອດລົດປະເພດຕ່າງໆ ໃຫ້ປະຕິບັດໃນໄລຍະບຸນອອກພັນສາປະວໍລະນາ ແລະ ບຸນຊ່ວງເຮືອປະເພນີ ທີ່ທ່າວັດຈັນ ປະຈໍາປີ 2023 ດັ່ງນີ້:

ສຳລັບຜູ້ສັນຈອນມາຈາກທິດເໜືອ ທີ່ມີຈຸດປະສົງມາທ່ຽວງານບຸນຊ່ວງເຮືອ ແມ່ນອະນຸຍາດໃຫ້ເຂົ້າຈອດສະຖານທີ່ຈອດລົດ ທີ່ອະນຸກໍາມະການອະນຸຍາດ ຫລື ຈອດຕາມແຄມຖະໜົນສຸພານຸວົງ ແລະ ທາງຮ່ອມອື່ນໆ ທີ່ເຫັນວ່າມີຄວາມປອດໄພ ແລະ ບໍ່ເປັນການກີດຂວາງການສັນຈອນຂອງຍານພາຫະນະອື່ນ.

ສ່ວນຜູ້ສັນຈອນ ມາຈາກທິດໃຕ້ ອະນຸຍາດໃຫ້ຈອດລົດ ຢູ່ສະຖານທີ່ຈອດລົດຂອງພະແນກໂຍທາທິການ ແລະ ທາງຮ່ອມໂຮງຮຽນ ມສ ເພຍວັດ ຫລື ຈອດຕາມແຄມທາງຮ່ອມອື່ນໆ ທີ່ເຫັນວ່າມີຄວາມປອດໄພ ແລະ ບໍ່ເປັນການກີດຂວາງການສັນຈອນຂອງຍານພາຫະນະອື່ນ.

ຜູ້ສັນຈອນ ມາຈາກຖະໜົນ 13 ໃຕ້ ອະນຸຍາດໃຫ້ຈອດຕາມສະຖານທີ່ຈອດລົດ ຕໍ່ໜ້າສະໜາມກິລາເຈົ້າອານຸວົງ, ຫໍວັດທະນະທໍາແຫ່ງຊາດ, ຕາມແຄມທາງຮ່ອມອື່ນໆ ທີ່ເຫັນວ່າມີຄວາມປອດໄພ ແລະ ບໍ່ເປັນການກີດຂວາງການສັນຈອນຂອງຍານພາຫະນະອື່ນ.

ບັນດາລົດເກັງ, ລົດກະບະ, ລົດຕຸກໆ, ຈໍາໂບ້ ໃຫ້ຈອດຕາມສະຖານທີ່ຈອດລົດ ທີ່ອະນຸກໍາມະການຈັດງານໄດ້ກໍານົດ ແລະ ປະຕິບັດຕາມການແນະນໍາຂອງເຈົ້າໜ້າທີ່ຕໍາຫລວດຈະລາຈອນ ທີ່ກໍາລັງປະຕິບັດໜ້າທີ່ຢູ່ແຕ່ລະຈຸດ, ຕາມປ້ອມຕ່າງໆ ແລະ ບັນດາລົດຈັກ, ລົດຖີບ ອະນຸຍາດໃຫ້ຈອດຕາມສະຖານທີ່ຈອດລົດ ທີ່ອະນຸກໍາມະການຈັດງານໄດ້ກໍານົດໄວ້.