ຮ່ວມມືຄຸ້ມຄອງການໂອນເງິນຂ້າມແດນຂອງແຮງງານລາວຢູ່ຕ່າງປະເທດ ໂດຍເລືອກເອົາ ສ. ເກົາຫລີ ເປັນປະເທດລິເລີ່ມ
ວັນທີ 25 ຕຸລາ 2023, ກົມຄຸ້ມຄອງລະບົບຊໍາລະສະສາງ, ທະນາຄານແຫ່ງ ສປປ ລາວ (ທຫລ) ແລະ ກົມການຈັດຫາງານ, ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ລົງນາມກ່ຽວກັບ “ການຮ່ວມມືຈັດຕັ້ງປະຕິບັດວຽກງານຄຸ້ມຄອງການໂອນເງິນຂ້າມແດນຂອງແຮງງານລາວຢູ່ຕ່າງປະເທດ ແລະ ແຮງງານຕ່າງປະເທດຢູ່ ສປປ ລາວ” ລະຫວ່າງທ່ານ ມະໂນລິດ ຊຸມພົນພັກດີ, ວ່າການຫົວໜ້າກົມຄຸ້ມຄອງລະບົບຊໍາລະສະສາງ ແລະ ທ່ານ ນາງ ອານຸສອນ ຄຳສິງສະຫວັດ, ຫົວໜ້າກົມການຈັດຫາງານ.
ປັດຈຸບັນການໂອນເງິນຂ້າມແດນ ແມ່ນຍັງມີບາງຂໍ້ຈໍາກັດ ເປັນຕົ້ນ: ການເປີດບັນຊີກັບສະຖາບັນການເງິນທີ່ຢູ່ຕ່າງປະເທດ ຄ່ອນຂ້າງມີຄວາມຫຍຸ້ງຍາກ, ການດຳເນີນເອກະສານການໂອນເງິນກັບປະເທດມີຂັ້ນຕອນຫລາກຫລາຍ ແລະ ຕົ້ນທຶນໃນການໂອນ ສູງ ຊຶ່ງເຮັດໃຫ້ເກີດມີຊ່ອງວ່າງ ແລະ ບັນຫາ ຄື: ການໂອນເງິນກັບຄືນປະເທດ ໂດຍຜ່ານຊ່ອງທາງທີ່ບໍ່ຖືກກົດໝາຍ, ອັດຕາແລກປ່ຽນທີ່ສູງກວ່າອັດຕາແລກປ່ຽນຂອງທະນາຄານ ເມື່ອໂອນຜ່ານບຸກຄົນ ຫລື ຕົວແທນນາຍຫນ້າທີ່ບໍ່ຖືກຕ້ອງ ເຮັດໃຫ້ກະທົບຕໍ່ຜົນປະໂຫຍດຂອງແຮງງານລາວຢູ່ຕ່າງປະເທດ. ເພື່ອເປັນການແກ້ໄຂບັນຫາ ແລະ ຂໍ້ຫຍຸ້ງຍາກດັ່ງກ່າວ, ທຫລ ແລະ ຮສສ ໄດ້ຮ່ວມກັນຄົ້ນຄວ້າກົນໄກ, ເຄື່ອງມື ແລະ ຊ່ອງທາງການຊໍາລະ ເພື່ອສ້າງເງື່ອນໄຂສະດວກໃຫ້ແກ່ຜູ້ອອກແຮງງານທີ່ເຮັດວຽກຢູ່ຕ່າງປະເທດ ສາມາດສົ່ງເງິນກັບຄືນປະເທດໂດຍຜ່ານລະບົບທະນາຄານ ຊຶ່ງຈະຊ່ວຍໃຫ້ລັດຖະບານສາມາດຕິດຕາມ, ເກັບກຳຂໍ້ມູນ ແລະ ກຳນົດນະໂຍບາຍ ແລະ ກົນໄກໃນການຄຸ້ມຄອງທີ່ເໝາະສົມໃນແຕ່ລະໄລຍະ ໂດຍໄດ້ເຫັນດີເຮັດໂຄງການຕົວແບບ (Pilot Project) ຊຶ່ງເບື້ອງຕົ້ນໄດ້ເລືອກເອົາ ສ. ເກົາຫລີ ເປັນປະເທດລິເລີ່ມ ແລະ ໃນອະນາຄົດອາດຂະຫຍາຍໂຄງການໄປປະເທດອື່ນອີກທີ່ມີແຮງງານລາວຈຳນວນຫລາຍ ເຊັ່ນ: ປະເທດໄທ ຫລື ຍີ່ປຸ່ນ.
ທັງນີ້ກໍເປັນຂີດໝາຍ ແລະ ບາດກ້າວສໍາຄັນໃນການແລກປ່ຽນຂໍ້ມູນ ແລະ ຮ່ວມກັນຄຸ້ມຄອງການໂອນເງິນຂອງແຮງງານລາວຢູ່ຕ່າງປະເທດ ແລະ ລິເລີ່ມໂຄງການກັບບັນດາປະເທດທີ່ສົ່ງແຮງງານລາວໄປເຮັດວຽກ ເພື່ອອໍານວຍຄວາມສະດວກໃຫ້ແກ່ແຮງງານລາວທີ່ຢູ່ຕ່າງປະເທດ ແລະ ແຮງງານຕ່າງປະເທດທີ່ຢູ່ ສປປ ລາວ ໃນການໂອນເງິນຄ່າແຮງງານກັບປະເທດຂອງຕົນ, ທັງເປັນການຊຸກຍູ້ການຊໍາລະຜ່ານລະບົບທະນາຄານ, ຄຸ້ມຄອງສະຖຽນລະພາບດ້ານເງິນຕາ ແລະ ຫຼຸດຊ່ອງວ່າງໃນການຄຸ້ມຄອງຂອງພາກລັດ ທີ່ອາດສົ່ງຜົນກະທົບຕໍ່ລະບົບເສດຖະກິດຂອງຊາດ.
ນອກນີ້, ຍັງມີການເປີດໂຕ “ໂຄງການຕົວແບບການໃຫ້ບໍລິການໂອນເງິນສຳລັບແຮງງານລາວຢູ່ ສ.ເກົາຫລີ” ຜ່ານລະບົບໂອນເງິນຂ້າມແດນຂອງທະນາຄານການຄ້າຕ່າງປະເທດລາວ ມະຫາຊົນ ຮ່ວມກັບ ບໍລິສັດ GLN ຂອງ ສ.ເກົາຫລີ.
