ຜູ້ນໍາໂລກຮຽກຮ້ອງອິດສະລາແອນ-ຮາມັດຢຸດການຕໍ່ສູ້ ເປີດທາງສົ່ງການຊ່ວຍເຫລືອເຂົ້າເຂດກາຊາ
ອາເມລິກາ, ຣັດເຊຍ ຕະຫລອດຮອດຜູ້ນໍາຈາກອີກຫລາຍປະເທດທົ່ວໂລກ ຮຽກຮ້ອງໃຫ້ອິດສະລາແອນ ແລະ ກຸ່ມຮາມັດຢຸດການສູ້ຮົບ ຫລື ຢຸດຍິງຊົ່ວຄາວ ເພື່ອເປີດທາງໃຫ້ສາມາດສົ່ງການຊ່ວຍເຫລືອດ້ານມະນຸດສະທໍາເຂົ້າໄປໃນເຂດກາຊາ ເຊິ່ງເວລານີ້ຖືກກອງທັບອິດສະລາແອນປິດລ້ອມໄວ້ຢ່າງສົມບູນ. ອີກທັງຍັງມີການຖິ້ມລະເບີດໂຈມຕີຢ່າງຕໍ່ເນື່ອງ ທ່າມກາງສະພາບການເປັນຢູ່ທີ່ບໍ່ຄ່ອຍດີຂອງປະຊາຊົນ.
ວັນທີ 24 ຕຸລາ, ລົດບັນທຸກ 8 ຄັນພ້ອມນໍ້າ, ອາຫານ ແລະ ຢາ ໄດ້ເດີນທາງຈາກອີຢິບເຂົ້າສູ່ເຂດກາຊາ ເພື່ອນໍາເອົາການຊ່ວຍເຫລືອໄປມອບໃຫ້ປະຊາຊົນ ໂດຍການຕໍ່ສູ້ລະຫວ່າງຮາມັດ ແລະ ອິດສະລາແອນເປັນເວລາເກືອບ 3 ອາທິດແລ້ວ. ຂະນະທີ່ມີຜູ້ເສຍຊີວິດຈໍານວນຫລາຍ ສົ່ງຜົນໃຫ້ບັນດາຜູ້ນໍາໂລກພະຍາຍາມຫາວິທີເພື່ອປ້ອງບໍ່ໃຫ້ເຫດການຄວາມຂັດແຍ່ງໃນຄັ້ງນີ້ຂະຫຍາຍວົງກວ້າງໃນພາກພື້ນ ເຊິ່ງເປັນແຫລ່ງສະໜອງພະລັງງານສໍາຄັນຂອງໂລກ.
ທໍານຽບຂາວເປີດເຜີຍວ່າ: ປະທານາທິບໍດີ ໂຈ ໄບເດນ ຂອງອາເມລິກາ ແລະ ມົງກຸດຣາດຊະກຸມມານ ໂມຮຳເໝັດ ບິນ ຊັລມານ ແຫ່ງຊາອຸດິອາຣະບີ ໄດ້ສົນທະນາກັນທາງໂທລະສັບໃນວັນທີ 24 ກຸມພາ ໂດຍທັງສອງເຫັນພ້ອມຈະຂະຫຍາຍການໃຊ້ແນວທາງການທູດ “ເພື່ອຮັກສາສະຖຽນລະພາບໃນພາກພື້ນ ແລະ ເພື່ອປ້ອງກັນບໍ່ໃຫ້ຄວາມຂັດແຍ່ງຂະຫຍາຍວົງກວ້າງອອກໄປ”.
ສໍານັກຂ່າວ Reuters ລາຍງານວ່າ: ນອກຈາກສະຖານະການຢູ່ເຂດກາຊາແລ້ວ, ການປະທະກັນລະຫວ່າງກອງທັບອິດສະລາແອນ ແລະ ຊາວປາແລັສຕິນໃນເຂດເວສແບງກໍທະວີຄວາມຮຸນແຮງຂຶ້ນເຊັ່ນກັນ. ຂະນະທີ່ກອງທັບອິດສະລາແອນຍັງຕ້ອງຮັບມືກັບເສິກອີກໜ້າໜຶ່ງ ຄືກຸ່ມຮິບບອນເລາະທີ່ຍິງຈະຫລວດຂ້າມມາຈາກເລບານອນ ແລະ ຕໍ່ສູ້ກັນຢູ່ທາງຊາຍແດນຕອນເໜືອຂອງປະເທດ. ຂະນະທີ່ອີຣານ ເຊິ່ງເປັນປະເທດທີ່ໃຫ້ການສະໜັບສະໜູນກຸ່ມຮິດບອນເລາະ ແລະ ຮາມັດ ກ່າວເຕືອນອິດສະລາແອນໃຫ້ຢຸດການໂຈມຕີເຂດກາຊາ.
ນອກຈາກນີ້, ກອງທັບອິດສະລາແອນຍັງລະບຸອີກວ່າ: ມີຈະຫລວດຖືກຍິງມາຈາກຝັ່ງຂອງຊີເຣຍ ເຊິ່ງເປັນປະເທດພັນທະມິດຂອງອີຣານ, ແຕ່ຍັງບໍ່ແນ່ນອນວ່າເປັນຝີມືຂອງຝ່າຍໃດ ສົ່ງຜົນໃຫ້ອິດສະລາແອນສົ່ງເຮືອບິນເຂົ້າໂຈມຕີໂຄງລ່າງພື້ນຖານຂອງກອງທັບຊີເຣຍໃນວັນທີ 25 ກຸມພາ ເພື່ອເປັນການຕອບໂຕ້.
ທັງນີ້, ອາເມລິກາ ແນະນໍາໃຫ້ອິດສະລາແອນຢຸດການໂຈມຕີພາກພື້ນດິນທີ່ເຄີຍວາງແຜນໄວ້ ໂດຍອາເມລິກາພະຍາຍາມຈະຫາວິທີໃຫ້ຮາມັດຍອມປ່ອຍຕົວປະກັນ 200 ກວ່າຄົນທີ່ຍັງຖືກກັກຂັງຢູ່ເຂດກາຊາ.
ສ່ວນຣັດເຊຍຮຽກຮ້ອງໃຫ້ມີການຢຸດຍິງເພື່ອເປີດທາງສູ່ການຊ່ວຍເຫລືອດ້ານມະນຸດສະທໍາ ໂດຍທ່ານ ວາສຊິລີ ເນເບນເຊຍ ເອກອັກຄະລັດຖະທູດຣັດເຊຍປະຈໍາສະຫະປະຊາຊາດ (UN) ກ່າວຕໍ່ສະພາຄວາມໝັ້ນຄົງວ່າ: “ທົ່ວໂລກຄາດຫວັງຈາກສະພາຄວາມໝັ້ນຄົງໃຫ້ຮຽກຮ້ອງໃຫ້ມີການຢຸດຍິງຢ່າງວ່ອງໄວ ແລະ ບໍ່ມີເງື່ອນໄຂ”.
ກະຊວງສາທາລະນະສຸກ ເຊິ່ງຮາມັດເປັນຜູ້ດໍາເນີນງານລະບຸວ່າ: ນັບແຕ່ເຫດການຄວາມຂັດແຍ່ງເກີດຂຶ້ນໃນວັນທີ 7 ຕຸລາຈົນຮອດປັດຈຸບັນ ມີຊາວປາແລັສຕິນເສຍຊີວິດແລ້ວເກືອບ 5.800 ຄົນ. ຂະນະທີ່ອິດສະລາແອນລາຍງານວ່າ: ອິດສະລາແອນມີຜູ້ເສຍຊີວິດປະມານ 1.400 ຄົນ.
ອ້າງອີງ:
- https://www.reuters.com/world/middle-east/world-leaders-seek-suspend-israel-hamas-fighting-gaza-aid-2023-10-24/
- https://www.bbc.com/news/live/world-middle-east-67201465
