ແຂວງອັດຕະປື ເຂັ້ມງວດ ຕິດຕາມກວດກາສິນຄ້າຕາມທ້ອງຕະຫລາດ ໃນໄລຍະບຸນອອກພັນສາ ເພື່ອຫລີກເວັ້ນການສວຍໂອກາດ ຂຶ້ນລາຄາສິນຄ້າຂອງຜູ້ປະກອບການ

ວັນທີ 24 ຕຸລາ 2023, ຂະແໜງການຄ້າພາຍໃນ ຄຸ້ມຄອງລາຄາສິນຄ້າ ແລະ ຄ່າບໍລິການພະແນກອຸດສາຫະກຳ ແລະ ການຄ້າ ແຂວງອັດຕະປື ສົມທົບກັບຂະແໜງການກ່ຽວຂ້ອງໄດ້ລົງຕິດຕາມ, ກວດກາ, ຕິດຕາມ, ຄວບຄຸມ ລາຄາສິນຄ້າ ຢູ່ຕະຫຼາດ ຫຼັກ 3 ແລະ ຈຸດວາງສະແດງສິນຄ້າຢູ່ສະຖານທີ່ເດີ່ນທ່າຊ່ວງເຮືອ ເມືອງສາມັກຄີໄຊ ເພື່ອປ້ອງກັນການສວຍໂອກາດຂຶ້ນລາຄາສິນຄ້າຂອງບັນດາຜູ້ປະກອບການຄ້າຂາຍໃຫ້ເຂັ້ມງວດ.

ທ່ານ ເພັດສະໝອນ ແກ້ວພິມພອນ ຮອງຫົວໜ້າຂະແໜງ ການຄ້າພາຍໃນ ຜູ້ຊີ້ນໍາວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ພະແນກອຸດສາຫະກຳແລະ ການຄ້າແຂວງ ໃຫ້ຮູ້ວ່າ: ນີ້ແມ່ນປະຕິ ບັດຕາມແຈ້ງການຂອງພະແນກອຸດສະຫະກໍາແລະການຄ້າແຂວງ, ວ່າດ້ວຍການເອົາໃຈໃສ່ຄຸ້ມຄອງ,ຕິດຕາມ,ກວດກາ,ສະພາບການ ປັ່ນປ່ວນ,ກັກຕຸນ ແລະ ສວຍໂອກາດຂຶ້ນລາຄາສິນຄ້າ-ຄ່າບໍລິການ,ໃນໄລຍະງານບຸນອອກພັນສາ ປະຈໍາປີ 2023, ໂດຍເນັ້ນໃສ່ກວດກາ ລາຄາສິນຄ້າທີ່ຂາຍຕາມທ້ອງຕະຫຼາດ,  ກວດກາການຕິດສະຫລາກສິນຄ້າເປັນພາສາລາວ, ການຕິດລາຄາເປັນເງີນກີບ, ກວດກາແຫລ່ງທີ່ມາຂອງອາຫານ ແລະ ກວດກາສິນຄ້າເສື່ອມຄຸນ ເພື່ອສ້າງສະຕິ ແລະ ປູກຈິດສຳນຶກ ໃນການເຄົາລະບຽບກົດໝາຍ ພ້ອມທັງສະກັດກັ້ນການສໍ້ໂກງ, ແນໃສ່ສົ່ງເສີມຫົວໜ່ວຍທຸລະກິດການຄ້າ ແລະ ປົກປ້ອງສິດຜົນປະໂຫຍດຂອງຜູ້ຄ້າຂາຍ ແລະ ຜູ້ຊົມໃຊ້ໃຫ້ຕ່າງຝ່າຍຕ່າງໄດ້ຜົນປະໂຫຍດ.