ຍທຂ ປຶກສາຫາລື ສະເໜີເງິນກູ້ຢືມດອກເບ້ຍຕ່ຳຈາກ ທະນາຄານໂລກ ໂດຍເລັ່ງໃສ່ການປັບປຸງທາງຫລວງເມືອງ ແລະ ທາງຊົນນະບົດ ຢູ່ 3 ແຂວງເປົ້າໝາຍ

ວັນທີ 23 ຕຸລາ 2023, ສະຖາບັນໂຍທາທິການ ແລະ ຂົນສົ່ງ ກະຊວງໂຍທາທິການ ແລະ ຂົນສົ່ງ (ຍທຂ) ໄດ້ຈັດກອງປະຊຸມ ປືກສາຫາລືກັບພະແນກທີ່ກ່ຽວຂ້ອງ ເພື່ອກະກຽມຂອບການຄຸ້ມຄອງສິ່ງແວດລ້ອມ ແລະ ສັງຄົມ ສໍາລັບໂຄງການ ປັບປຸງເສັ້ນທາງໃຫ້ມີຄວາມທົນທານຕໍ່ການປ່ຽນແປງດິນຟ້າອາກາດ ເພື່ອການເຊື່ອມໂຍງເຊື່ອມຈອດ (CRRCI), ໂດຍການເປັນປະທານຂອງ ທ່ານ ບົວແພງເພັດ ໂພໄຊ ຫົວໜ້າພະແນກ ຍທຂ ແຂວງສາລະວັນ, ມີທ່ານ ທອງດອມ ຈັນທະລາ ຮອງຫົວໜ້າສະຖາບັນ ຍທຂ.

ທ່ານ ບົວແພງເພັດ ໂພໄຊ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອນຳສະເໜີເງິນກູ້ຢືມດອກເບ້ຍຕ່ຳຈາກ ທະນາຄານໂລກ (WB) ໂດຍເລັ່ງໃສ່ການປັບປຸງທາງຫຼວງເມືອງ ແລະ ທາງຊົນນະບົດ ຊຶ່ງໄດ້ຄັດເລືອກເອົາ 3 ແຂວງເປົ້າໝາຍຄື: ແຂວງຄຳມ່ວນ, ແຂວງສະຫວັນນະເຂດ ແລະ ແຂວງສາລະວັນ. ສຳລັບໂຄງການນີ້ແນໃສ່ປັບປຸງມາດຕະຖານຂອງເສັ້ນທາງໃຫ້ສາມາດສັນຈອນໄດ້ທັງສອງລະດູ, ເສີມສ້າງຄວາມສາມາດໃນການຄຸ້ມຄອງຕາໜ່າງເສັ້ນທາງ, ໃນກໍລະນີເກີດເຫດການສຸກເສີນ ໃຫ້ສາມາດຕອບສະໜອງໄດ້ທັນທີ ແລະ ມີປະສິດທິຜົນ, ລວງຍາວເສັ້ນທາງຂອງໂຄງການລວມທັງໝົດໃນ 3 ແຂວງປະມານ 300 ກິໂລແມັດ (100 ກມ ຕໍ່ແຂວງ).  ໃນປີ 2008 ຜ່ານມາ, ກະຊວງ ຍທຂ ໄດ້ປຶກສາຫາລືກັບພະແນກ ຍທຂ (DPWT) ຂອງສາມແຂວງດັ່ງກ່າວໄດ້ກຳນົດບັນຊີລາຍຊື່ເສັ້ນທາງເພື່ອນຳສະເໜີເຂົ້າໃນແຜນຂອງໂຄງການຜະລິດໃນແຂວງສາລະວັນລວມມີ: ເມືອງສາລະວັນ 1 ເສັ້ນ, ເມືອງເລົ່າງາມ 2 ເສັ້ນ, ເມືອງຕຸ້ມລານ 1 ເສັ້ນ, ເມືອງສະໝ້ວຍ 3 ເສັ້ນ ແລະ ເມືອງຕະໂອ້ຍ 1 ເສັ້ນ ເພື່ອໃຫ້ແນ່ໃຈວ່າການກະກຽມຂອບການຄຸ້ມຄອງສິ່ງແວດລ້ອມ ແລະ ສັງຄົມຂອງໂຄງ ການສອດຄ່ອງກັບລະບຽບຂອງຜູ້ໃຫ້ທຶນ ແລະ ລະບຽບການຂອງລັດຖະບານລາວ ພ້ອມທັງໃຫ້ແທດເໝາະກັບສະພາບຄວາມເປັນຈິງຂອງທ້ອງຖິ່ນ.