ເປີດນຳໃຊ້ສູນຮັບແຈ້ງເຫດ-ສັ່ງການ ສາຍດ່ວນ 1195 ນະຄອນຫລວງວຽງຈັນ ຕະຫລອດ 24 ຊົ່ວໂມງ
ວັນທີ 20 ຕຸລາ 2023, ນະຄອນຫລວງວຽງຈັນໄດ້ເປີດ ນຳໃຊ້ ສູນຮັບແຈ້ງເຫດ-ສັ່ງການ (ສູນ CCC) ເປັນຄັ້ງທຳອິດ ໃນລາວ ເພື່ອປະສານງານ ແລະ ອໍານວຍຄວາມສະດວກໃນການນຳສົ່ງຄົນເຈັບໃຫ້ມີປະສິດທິພາບເຊິ່ງໄດ້ຮັບການສະໜັບສະໜູນຈາກອົງການຮ່ວມມືສາກົນຍີ່ປຸ່ນ (JICA) ແລະ ໂຮງໝໍມິດຕະພາບ. ປັດຈຸບັນໄດ້ເປີດໃຫ້ປະຊາຊົນສາມາດໂທເຂົ້າສາຍດ່ວນ 1195 ເພື່ອແຈ້ງເຫດການສຸກເສີນ ໄດ້ຕະຫລອດ 24 ຊົ່ວໂມງ ຂອງທຸກໆວັນ.
ສູນ CCC ເປັນສູນຮັບແຈ້ງເຫດການສຸກເສີນ ຂຶ້ນກັບໂຮງໝໍມິດຕະພາບໂດຍກົງ ແລະ ຕັ້ງຢູ່ໂຮງໝໍມິດຕະພາບ, ມີພາລະບົດບາດສາມາດສັ່ງການໃຫ້ລົດກູ້ໄພຂອງ 5 ໜ່ວຍງານ ອອກຮັບເຫດຄື: ໜ່ວຍກູ້ໄພຊ່ວຍເຫລືອຄົນທຸກຍາກ 1623; ໜ່ວຍກູ້ໄພນະຄອນຫລວງວຽງຈັນ 1624; ໜ່ວຍກູ້ໄພກາແດງ 1625; ໜ່ວຍກູ້ໄພມູນນິທິຈີນ 1628 ແລະ ໜ່ວຍກູ້ໄພຮ່ວມໃຈ 1630.
ການເອົາລະບົບສະໜັບສະໜູນວຽກງານການແພດສຸກເສີນ ເຂົ້າມານຳໃຊ້ໃນສູນ CCC ສາມາດຊ່ວຍໃຫ້ໂຮງໝໍສູນກາງ 3 ແຫ່ງ (ໂຮງໝໍມິດຕະພາບ, ໂຮງໝໍເຊດຖາທິຣາດ, ໂຮງໝໍມະໂຫສົດ) ແລະ ໜ່ວຍກູ້ໄພ 5 ໜ່ວຍ ສາມາດສົ່ງຕໍ່ ຂໍ້ມູນຜູ້ບາດເຈັບ ແລະ ຜູ້ເຈັບປ່ວຍ, ທີ່ຕັ້ງຂອງລົດກູ້ໄພ ພ້ອມທັງສາມາດອອກມາດຕະການທີ່ມີປະສິດທິພາບໂດຍການວິເຄາະຂໍ້ມູນທີ່ສະສົມໃນລະບົບໄດ້.
