ກອງປະຊຸມເຈົ້າໜ້າທີ່ອາວຸໂສ ວັດທະນະທຳ ແລະ ສິລະປະອາຊຽນ ຄັ້ງທີ 19
ວັນທີ 24 ຕຸລາ 2023, ເປີດກອງປະຊຸມເຈົ້າໜ້າທີ່ອາວຸໂສວັດທະນະທຳ ແລະ ສິລະປະອາຊຽນ ຄັ້ງທີ 19 ແລະ ບັນດາກອງປະຊຸມປິ່ນອ້ອມ ພາຍໃຕ້ຫົວ ຂໍ້ ສົ່ງເສີມບົດບາດວັດທະນະທຳ ແລະ ສິລະປະອາຊຽນ ຫລັງການລະບາດຂອງພະຍາດໂຄວິດ ເພື່ອການພັດທະນາແບບຍືນຍົງ” ທີ່ເມືອງ ວັງວຽງ, ແຂວງວຽງຈັນ ໂດຍມີທ່ານ ນາງ ສວນສະຫັວນ ວິຍະເກດ, ລັດຖະມົນຕີກະຊວງຖະ ແຫລງຂ່າວ, ວັດທະນະທຳ ແລະ ທ່ອງ ທ່ຽວ, ທ່ານ ດາວເຮືອງ ນັນທະວົງ, ຮອງເຈົ້າແຂວງວຽງຈັນ ທ່ານ ເອກອັກຄະພັນ ພັນທະວົງ, ຮອງເລຂາທິການໃຫຍ່ປະຊາ ຄົມວັດທະນະທຳສັງຄົມອາຊຽນ ມີເອກອັກຄະລັດຖະທູດ ຈາກປະ ເທດສະມາ ຊິກອາຊຽນ, ຕິມໍ ເລສເຕ ແລະ ປະເທດສະມາຊິກອາຊຽນບວກສາມ ເຊັ່ນ: ຈີນ, ຍີ່ປຸ່ນ ແລະ ສ.ເກົາຫຼີ, ພ້ອມດ້ວຍເຈົ້າໜ້າ ທີ່ອາວຸໂສວັດທະນະທໍາ ແລະ ສິລະປະ ຈາກປະເທດສະມາຊິກອາຊຽນ ແລະ ຕິມໍ ເລສເຕເຂົ້າຮ່ວມ.
ໃນໂອກາດກ່າວໄຂກອງປະຊຸມຢ່າງເປັນທາງການທ່ານ ນາງ ສວນສະຫວັນ ວິຍະເກດ ມີຄໍາເຫັນວ່າ: ຂະແໜງວັດທະ ນະທຳ-ສິລະປະ ເປັນໜຶ່ງໃນຂະແໜງການໜຶ່ງທີ່ສຳຄັນພາຍໃຕ້ເສົາຄ້ຳປະຊາຄົມວັດ ທະນະທຳ-ສັງຄົມອາຊຽນ ເປັນໜຶ່ງໃນຕົວຂັບເຄື່ອນທີ່ສຳຄັນໃຫ້ແກ່ການເຕີບໂຕທາງດ້ານເສດຖະກິດ, ການພັດທະນາແບບຍືນຍົງ ກໍ່ຄືການຮັດແໜ້ນສາຍພົວພັນມິດຕະພາບ ແລະການຮ່ວມມືທີ່ແໜ້ນແຟ້ນ ຍິ່ງຂຶ້ນ. ອາຊຽນມີເອກະລັກສະເພາະ, ຄວາມຫຼາກຫຼາຍດ້ານວັດ ທະນະທຳ, ສິລະປະ, ຮີດຄອງປະເພນີ, ພາສາ ແລະ ສາສະໜາ ເຖິງວ່າຈະມີຄວາມແຕກ ຕ່າງກັນກໍ່ຕາມ, ແຕ່ປະຊາຊົນອາຊຽນຍັງຄົງຢູ່ຮ່ວມກັນຢ່າງສະຫງົບສຸກ ແລະ ປອງ ດອງກັນ, ຊຸກຍູ້ການຊ່ວຍເຫຼືອເຊິ່ງກັນ ແລະ ກັນ ແລະ ການເຊື່ອມໂຍງຂອງປະຊາຊົນໂດຍຜ່ານກົນໄກຮ່ວມມືອາຊຽນຢ່າງມີປະສິດທິຜົນ, ໂດຍສະເພາະແມ່ນການຮ່ວມມືປົກປັກຮັກສາ ແລະ ສົ່ງເສີມມໍລະດົກວັດທະນະທຳ ຮີດຄອງປະເພນີຂອງຕົນ ເພື່ອບັນລຸການພັດ ທະນາແບບຍືນຍົງ ແລະ ຄວາມຈະເລີນຮຸ່ງເຮືອງຂອງແຕ່ລະປະເທດອາຊຽນ.
ສປປ ລາວ ຮັບຮູ້ເຖິງບົດບາດອັນສຳຄັນຂອງຂອບເຂດວຽກງານວັດທະນະທຳ ແລະ ສິລະປະຂອງອາຊຽນ ໂດຍສະເພາະການສືບຕໍ່ເສີມຂະຫຍາຍບົດບາດຂອງວັດທະນະທຳ ແລະສິລະປະຂອງບັນກາປະເທດສະມາຊິກອາຊຽນ ເພື່ອການລວມຕົວ ແລະ ຍືນຍົງ. ດັ່ງນັ້ນ, ກອງປະຊຸມຄັ້ງນີ້ຈຶ່ງມີຄວາມ ໝາຍສໍາຄັນໃນການທົບທວນ ແລະ ປຶກສາຫາລືການຈັດຕັ້ງປະຕິບັດແຜນຍຸດທະສາດດ້ານວັດທະນະທໍາ ແລະ ສິລະປະອາຊຽນ 2016-2025, ແຜນງານກ່ຽວກັບການຮ່ວມມືດ້ານວັດທະນະທໍາ ແລະສິລະປະກັບຄູ່ເຈລະຈາ 2022-2025, ຂໍ້ລິເລີ່ມໃໝ່ ແລະ ບັນຫາອື່ນໆ ທີ່ກ່ຽວຂ້ອງເຖິງການຮ່ວມມືດ້ານວັດທະນະທຳ ແລະສິລະປະ ພິເສດແມ່ນການຮັບຮອງເອົາເອກະສານສຳຄັນຂອງອາຊຽນຂອງຖະແຫຼງການວັງວຽງກ່ຽວກັບການຊຸກ ຍູ້ວິສາຫະກິດວັດທະນະທຳຂະໜາດນ້ອຍ ແລະ ຂະໜາດກາງ ໃຫ້ສອດຄ່ອງກັບການເຕີບໂຕສີຂຽວ ເພື່ອການພັດທະນາແບບຍືນຍົງ ເພື່ອໃຫ້ຜູ້ນຳປະເທດສະມາຊິກອາຊຽນຮັບຮອງເອົາໃນກອງປະຊຸມສຸດຍອດອາຊຽນຄັ້ງທີ 44 ຊື່ງຈະຈັດຂື້ນໃນເດືອນຕຸລາ 2024 ທີ່ລາວເປັນປະທານອາຊຽນ 2024, ຄຽງຄູ່ກັບການເປີດປີທ່ອງທ່ຽວລາວ 2024 ເຊິ່ງເປັນການໂຄສະນາສົ່ງ ເສີມການທ່ອງທ່ຽວ ໂດຍຈະຈັດກິດຈະກໍາທ່ອງທ່ຽວທີ່ຫຼາກຫຼາຍຕະຫຼອດປີ 2024.
ກອງປະຊຸມເຈົ້າໜ້າທີ່ອາວຸໂສວັດທະນະທຳ ແລະ ສິລະປະອາຊຽນ ຄັ້ງທີ 19 ຍັງຈະມີກອງປະຊຸມກ່ຽວຂ້ອງປີ່ນອ້ອມຫລາຍກອງປະຊຸມສໍາຄັນ ທີ່ຈັດຂື້ນໃນລະຫວ່າງວັນທີ 24-25 ຕຸລາ 2023 ນີ້.
#ຂ່າວພາຍໃນລາວພັດທະນາ #ກອງປະຊຸມ #ເຈົ້າໜ້າທີ່ອາວຸໂສວັດທະນະທຳແລະສິລະປະອາຊຽນ
