ອິດສະລາແອນໂຈມຕີມັດສະຢິດໃນຄ້າຍຜູ້ລີ້ໄພເວສແບງ ເຊື່ອເປັນແຫລ່ງລີ້ຊ້ອນຂອງກຸ່ມຮາມັດ ພ້ອມຖະຫລົ່ມເຂດກາຊາຕໍ່ເນື່ອງ
ສໍານັກຂ່າວຕ່າງປະເທດລາຍງານວ່າ: ກອງທັບອິດສະລາແອນໂຈມຕີທາງອາກາດໃສ່ມັດສະຢິດໃນຄ້າຍຜູ້ລີ້ໄພເຈນິນ ເຂດເວສແບງຂອງປາແລັສຕິນ ໃນວັນທີ 22 ຕຸລາ, ເບື້ອງຕົ້ນມີຜູ້ເສຍຊີວິດແລ້ວຢ່າງໜ້ອຍ 1 ຄົນ ແລະ ໄດ້ຮັບບາດເຈັບອີກຈໍານວນໜຶ່ງ.
ສ່ວນກອງທັບອິດສະລາແອນລະບຸວ່າ: ໄດ້ຕັ້ງເປົ້າໂຈມຕີພື້ນທີ່ເຂດມັດສະຢິດອັລ-ອັນຊາ ທີ່ຕັ້ງຢູ່ໃນຄ້າຍຜູ້ລີ້ໄພດັ່ງກ່າວ ເຊິ່ງເຊື່ອວ່າເປັນແຫລ່ງລີ້ຊ້ອນຂອງກຸ່ມຮາມັດ ແລະ ກຸ່ມຍິຮາດອິດສະລາມປາແລັສຕິນ (PIJ) ທີ່ໃຊ້ວາງແຜນກໍ່ການຮ້າຍ ແລະ ໂຈມຕີຫລາຍພື້ນທີ່ຂອງອິດສະລາແອນ.
ຂະນະທີ່ການສູ້ຮົບກັນລະຫວ່າງກອງທັບອິດສະລາແອນກັບກຸ່ມຮາມັດໃນເຂດກາຊາຍັງເປັນໄປຢ່າງດຸເດືອດ, ກອງທັບອິດສະລາແອນຍັງເດີນໜ້າໂຈມຕີທາງອາກາດໃສ່ຫລາຍພື້ນທີ່ໃນກາຊາ ໂດຍສະເພາະຢູ່ຂ່ານຍູນິສໃນເຊົ້າວັນທີ 22 ຕຸລາ ເຮັດໃຫ້ມີຜູ້ເສຍຊີວິດເພີ່ມຢ່າງໜ້ອຍ 11 ຄົນ ທ່າມກາງການຊ່ວຍເຫລືອດ້ານມະນຸດສະທໍາທີ່ເລີ່ມທະຍອຍລໍາລຽງເຂົ້າໄປໃນເຂດກາຊາ ຜ່ານທາງຈຸດຜ່ານແດນຣາຟາທີ່ເຊື່ອມຕໍ່ເຂດກາຊາເຂົ້າກັບພື້ນທີ່ທາງຕອນເໜືອຂອງອີຢິບ.
ຫລ້າສຸດ, ຈໍານວນຜູ້ເສຍຊີວິດລວມທັງສອງຝ່າຍສູງກວ່າ 5.800 ຄົນແລ້ວ ໂດຍເຂດກາຊາມີຜູ້ເສຍຊີວິດ 4.385 ຄົນ ແລະ ເຂດເວສແບງມີຜູ້ເສຍຊີວິດ 84 ຄົນ. ຂະນະທີ່ອິດສລາແອນມີຜູ້ເສຍຊີວິດ 1.400 ກວ່າຄົນ. ຫລາຍຝ່າຍຄາດວ່າຈໍານວນຜູ້ເສຍຊີວິດຈະຍັງເພີ່ມສູງຂຶ້ນຢ່າງຕໍ່ເນື່ອງ.
ໂດຍໃນທ້າຍອາທິດຜ່ານມາ, ກຸ່ມຮາມັດໄດ້ປ່ອຍສອງແມ່ລູກຊາວອາເມລິກາທີ່ຖືກຄວບຄຸມໄວ້ເກືອບ 2 ອາທິດ ໃຫ້ກັບມາພົບໜ້າກັບຄອບຄົວອີກຢ່າງປອດໄພ ຖືເປັນຕົວປະກັນກຸ່ມທໍາອິດທີ່ຖືກປ່ອຍອອກມາ.
ອ້າງອີງ:
- https://www.aljazeera.com/news/liveblog/2023/10/21/israel-gaza-war-hamas-and-israel-spar-over-hostage-release
- https://reliefweb.int/report/occupied-palestinian-territory/hostilities-gaza-strip-and-israel-flash-update-15
- https://www.mfa.go.th/th/content/statement-first-hostage-releases?cate=5d5bcb4e15e39c306000683d
