ຊາວອາເຈນຕິນາກຽມປ່ອນບັດເລືອກຕັ້ງມື້ນີ້ ທ່າມກາງວິກິດເສດຖະກິດ ຄາດວ່າຜົນອາດສູສີ
ຊາວອາເຈນຕິນາກຽມອອກໄປໃຊ້ສິດລົງຄະແນນສຽງໃນການເລືອກຕັ້ງທົ່ວໄປໃນວັນທີ 22 ຕຸລາ ທ່າມກາງວິກິດເສດຖະກິດທີ່ສາຫັດໃນຮອບສອງທົດສະວັດ ເຊິ່ງຊຸກດັນໃຫ້ຜູ້ສະໝັກກຸ່ມເສລີນິຍົມຂວາຈັດທີ່ເຄີຍເປັນມ້ານອກສາຍຕາກາຍມາເປັນໜຶ່ງໃນຕົວເຕັງ ແລະ ອາດໄດ້ຮັບໄຊຊະນະໄປຄອງ.
ໜ່ວຍເລືອກຕັ້ງຈະເລີ່ມເປີດໃຫ້ປະຊາຊົນໃຊ້ສິດໃນເວລາ 8:00 ໂມງ (18:00 ໂມງ ຕາມເວລາປະເທດລາວ) ໂດຍມີຜູ້ສະໝັກທີ່ເປັນຕົວເຕັງ 3 ຄົນ ໄດ້ແກ່ Javier Milei ນັກເສດຖະສາດ, Sergio Massa ລັດຖະມົນຕີເສດຖະກິດສາຍກາງຜູ້ສະໜັບສະໜູນລັດທິເປຣອນຂອງອະດີດປະທານາທິບໍດີ ຂວນ ເປຣອນ ແລະ Patricia Bullrich ນັກການເມືອງສາຍອະນຸລັກນິຍົມ.
Milei ອະດີດຜູ້ດໍາເນີນລາຍການໂທລະພາບທີ່ມີບຸກຄະລິກໂຜງຜາງຈົນໄດ້ຮັບການປຽບທຽບກັບອະດີດປະທານາທິບໍດີ ໂດນັລ ທຣໍາ ຂອງອາເມລິກາ ສ້າງຄວາມປະຫລາດໃຈດ້ວຍການຄວ້າໄຊຊະນະໃນການເລືອກຕັ້ງຂັ້ນຕົ້ນໃນເດືອນສິງຫາ, ທ່ານໄດ້ຮັບສຽງສະໜັບສະໜູນຈາກຜູ້ມີສິດເລືອກຕັ້ງທີ່ບໍ່ພໍໃຈຕໍ່ສະພາບເສດຖະກິດ-ສັງຄົມທີ່ເປັນຢູ່ໃນປັດຈຸບັນ ດ້ວຍອັດຕາເງິນເຟີ້ເພີ່ມຂຶ້ນເຖິງ 138% ແລະ ຄວາມທຸກຍາກທີ່ສົ່ງຜົນກະທົບຕໍ່ປະຊາກອນເຖິງສອງໃນຫ້າຂອງປະເທດ.
ເຖິງຢ່າງໃດກໍດີ, ໃນການເລືອກຕັ້ງຂັ້ນຕົ້ນດັ່ງກ່າວ Milei ຊະນະດ້ວຍຄະແນນສຽງທີ່ບໍ່ຫ່າງກັນຫລາຍ. ຂະນະທີ່ Massa ແລະ Bullrich ກໍໄດ້ຄະແນນຕາມຫລັງມາຕິດໆ. ບັນຫາຜົນສໍາຫລວດຄວາມຄິດເຫັນຂອງສໍານັກຕ່າງໆຈຶ່ງຄາດວ່າ ຜົນການເລືອກຕັ້ງຄັ້ງນີ້ຈະອອກມາສູສີ ໂດຍຜູ້ສະໝັກທັງ 3 ຄົນຈະແບ່ງຄະແນນກັນໄປ ແລະ ອາດຕ້ອງໄປຕັດສິນກັນອີກໃນການເລືອກຕັ້ງຮອບ 2.
ທັງນີ້, ໜ່ວຍເລືອກຕັ້ງຈະເລີ່ມປິດຫີບໃນເວລາ 18:00 ໂມງ (4:00 ໂມງ ຂອງວັນທີ 23 ຕຸລາ ຕາມເວລາປະເທດ) ແລະ ຄາດວ່າຈະປະກາດຜົນການນັບຄະແນນເບື້ອງຕົ້ນໄດ້ໃນເວລາ 21:00 ໂມງ (7:00 ໂມງ ຂອງວັນທີ 23 ຕຸລາ ຕາມເວລາປະເທດລາວ) ໂດຍຜູ້ຊະນະຈະຕ້ອງໄດ້ຄະແນນສຽງຫລາຍກວ່າ 45% ຫລື 40% ບວກຄະແນນນໍາ 10 ຄະແນນ, ແຕ່ຖ້າບໍ່ມີຜູ້ສະໝັກຄົນໃດເຮັດໄດ້ ຈະຕ້ອງໄປວັດດວງກັນອີກໃນການເລືອກຕັ້ງຮອບ 2 ເຊິ່ງຈະຈັດຂຶ້ນໃນວັນທີ 19 ພະຈິກ.
ອ້າງອີງ:
- https://www.reuters.com/world/americas/argentina-heads-polls-grip-fierce-economic-crisis-2023-10-22/
