ຕົວເລກຄວາມເສຍຫາຍ ຫລັງອິດສະລາແອນ-ຮາມັດສູ້ຮົບກັນ ເປັນເວລາ 2 ອາທິດ ຍັງສູງຂຶ້ນຕໍ່ເນື່ອງ

ສະຖານະການການສູ້ຮົບກັນລະຫວ່າງກອງທັບອິດສະລາແອນ ແລະ ກຸ່ມຮາມັດຢູ່ປາແລັສຕິນຍັງຕອບໂຕ້ກັນໄປມາຢ່າງດຸເດືອດ ຫລັງການສູ້ຮົບຮອບໃໝ່ດໍາເນີນມາກວ່າ 2 ອາທິດແລ້ວ, ຂອບເຂດຄວາມສູນເສຍຍັງຂະຫຍາຍຕົວຢ່າງຕໍ່ເນື່ອງ. ຫລ້າສຸດກະຊວງສາທາລະນະສຸກປາແລັສຕິນລາຍງານ ມີຈໍານວນຜູ້ເສຍຊີວິດຢູ່ເຂດກາຊາແລ້ວ 3.785 ຄົນ ໃນຈໍານວນນີ້ເປັນເດັກນ້ອຍ 1.524 ຄົນ ແລະ ມີຜູ້ໄດ້ຮັບບາດເຈັບປະມານ 12.500 ຄົນ ໂດຍທາງການອິດສະລາແອນຄາດຄະເນວ່າ: ມີຜູ້ຖືກຄວບຄຸມຢູ່ເຂດກາຊາ ທັງຊາວອິດສະລາແອນ ແລະ ຊາວຕ່າງປະເທດຢ່າງໜ້ອຍ 203 ຄົນ.

ສ່ວນກະຊວງທີ່ເບິ່ງແຍງເລື່ອງທີ່ຢູ່ອາໄສໃນປາແລັສຕິນລະບຸວ່າ: ອາຄານທີ່ພັກອາໄສໃນເຂດກາຊາຢ່າງໜ້ອຍ 30% ໄດ້ຮັບຄວາມເສຍຫາຍຈາກການສູ້ຮົບຂອງທັງສອງຝ່າຍ ແລະ ເຮັດໃຫ້ເກີດມີຜູ້ພັດຖິ່ນພາຍໃນພື້ນທີ່ (IDPs) ໃນເຂດກາຊາປະມານ 1 ລ້ານຄົນ ເຊິ່ງລວມທັງ 527.500 ກວ່າຄົນທີ່ອາໄສຢູ່ໃນສູນພັກສຸກເສີນຈໍານວນ 147 ແຫ່ງ ຂອງອົງການບັນເທົາທຸກ ແລະ ຈັດຫາງານແຫ່ງສະຫະປະຊາຊາດສໍາລັບຜູ້ລີ້ໄພຊາວປາແລັສຕິນໃນຕາເວັນອອກໃກ້ (UNRWA).

ຂະນະທີ່ຈໍານວນຜູ້ເສຍຊີວິດຈາກເຫດປະທະ ແລະ ໃຊ້ຄວາມຮຸນແຮງຢູ່ເຂດເວສແບງມີ 79 ຄົນ ແລະ ໄດ້ຮັບບາດເຈັບ 1.434 ຄົນ.

ທັງຝັ່ງຂອງອິດສະລາແອນມີຜູ້ເສຍຊີວິດແລ້ວ 1.400 ຄົນ ແລະ ໄດ້ຮັບບາດເຈັບອີກ 4.629 ຄົນ.

ອ້າງອີງ:

• https://reliefweb.int/report/occupied-palestinian-territory/hostilities-gaza-strip-and-israel-flash-update-13
• https://www.mfa.go.th/?fbclid=IwAR1ZgJq4UD7GjKjXZeG9_Vib8916bfNhAs-AYf7x_CBkhdIN58JwzgpYq4o