ທ່ານ ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດອາຊຽນ-ສະພາການຮ່ວມມືເຂດອ່າວ ທີ່ ນະຄອນຫລວງຣີຢາດ ຣາຊະອານາຈັກ ຊາອູດິດ ອາຣັບບີ
ວັນທີ 20 ຕຸລາ ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດອາຊຽນ-ສະພາການຮ່ວມມືເຂດອ່າວ (ອາຊຽນ-ຈີຊີຊີ) ທີ່ ນະຄອນຫຼວງຣີຢາດ ຣາຊະອານາຈັກ ຊາອູດິດ ອາຣັບບີ, ພາຍໃຕ້ການເປັນປະທານຮ່ວມຂອງ ອິນໂດເນເຊຍ ແລະ ຊາອູດິດ ອາຣັບບີ.
ບັນດາຜູ້ນໍາອາຊຽນ ແລະ ປະເທດສະມາຊິກ ຈີຊີຊີ (ບາເຣນ, ກູເວດ, ໂອມານ, ກາຕາ, ຊາອູດິດ ອາຣັບບີ ແລະ ເອເມຣັດ ອາຣັບ) ໄດ້ສະແດງຄວາມຊົມເຊີຍຕໍ່ການຈັດກອງປະຊຸມສຸດຍອດອາຊຽນ-ຈີຊີຊີ ໃນຄັ້ງນີ້ ຊຶ່ງເປັນຂີດໝາຍອັນສໍາຄັນໃນການເພີ່ມທະວີການຮ່ວມມື ລະຫວ່າງສອງພາກພື້ນ. ກອງປະຊຸມໄດ້ຊຸກຍູ້ໃຫ້ສອງພາກພື້ນຮັດແໜ້ນການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງ ເປັນຕົ້ນແມ່ນການສົ່ງເສີມການຮ່ວມມືດ້ານເສດຖະກິດ ໂດຍການຊອກຫາຊ່ອງທາງໃນການສົ່ງເສີມການຮ່ວມມືດ້ານການຄ້າ ແລະ ການລົງທຶນ ໂດຍສະເພາະດ້ານພະລັງງານ. ພ້ອມນີ້, ກອງປະຊຸມ ຍັງໄດ້ເນັ້ນຢໍ້າເຖິງຄວາມສໍາຄັນໃນການສົ່ງເສີມການທ່ອງທ່ຽວ ແລະ ການໄປມາຫາສູ່ລະຫວ່າງປະຊາຊົນຂອງສອງພາກພື້ນ ໂດຍຜ່ານການແລກປ່ຽນທາງດ້ານວັດທະນະທໍາ, ການຮ່ວມມືດ້ານການພັດທະນາຊັບພະຍາກອນມະນຸດ, ການສຶກສາ, ການຝຶກອົບຮົມວິຊາຊີບ ແລະ ໂຄງການສ້າງຂີດຄວາມສາມາດອື່ນໆ.
ໃນໂອກາດນີ້, ທ່ານ ສອນໄຊ ສີພັນດອນ ໄດ້ຊຸກຍູ້ໃຫ້ອາຊຽນ ແລະ ຈີຊີຊີ ຊອກຊ່ອງທາງຮ່ວມມືກັນໃນດ້ານພະລັງງານ, ກະສິກໍາ, ການເຊື່ອມຈອດ ແລະ ການທ່ອງທ່ຽວ ແລະ ອື່ນໆ. ໃນນີ້, ທ່ານ ນາຍົກລັດຖະມົນຕີ ໄດ້ແຈ້ງໃຫ້ກອງປະຊຸມຊາບວ່າ: ປີ 2024 ແມ່ນປີ ທ່ອງທ່ຽວລາວ ແລະ ໄດ້ເຊີນຊວນໃຫ້ນັກທ່ອງທ່ຽວຈາກບັນດາປະເທດອາຊຽນ ແລະ ຈີຊີຊີ ມາທ່ອງທ່ຽວ ໃນ ສປປ ລາວ. ພ້ອມນີ້, ທ່ານ ສອນໄຊ ສີພັນດອນ ຍັງໄດ້ແຈ້ງໃຫ້ກອງປະຊຸມຊາບ ກ່ຽວກັບການເປັນປະທານອາຊຽນຂອງ ສປປ ລາວ ໃນປີ 2024 ພາຍໃຕ້ ຄໍາຂວັນ: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”, ພ້ອມທັງໃຫ້ຄວາມໝາຍໝັ້ນຈະສືບຕໍ່ເຮັດວຽກກັບບັນດາປະເທດສະມາຊິກອາຊຽນ ແລະ ຈີຊີຊີ ເພື່ອເສີມຂະຫຍາຍການຮ່ວມມືອາຊຽນ-ຈີຊີຊີ ໃຫ້ແໜ້ນແຟ້ນຂຶ້ນກວ່າເກົ່າ ແລະ ນໍາຜົນປະໂຫຍດອັນແທ້ຈິງມາສູ່ປະຊາຊົນຂອງສອງພາກພື້ນ.
ໃນຕອນທ້າຍຂອງກອງປະຊຸມ, ບັນດາຜູ້ນໍາອາຊຽນ ແລະ ຈີຊີຊີ ໄດ້ຮັບຮອງເອົາຖະແຫຼງການຮ່ວມຂອງກອງປະຊຸມສຸດຍອດອາຊຽນ-ຈີຊີຊີ ແລະ ໄດ້ຮັບຊາບຂອບວຽກການຮ່ວມມືອາຊຽນ-ຈີຊີຊີ (2024-2028) ທີ່ ຮັບຮອງໂດຍລັດຖະມົນຕີຕ່າງປະເທດອາຊຽນ-ຈີຊີຊີ ເພື່ອເປັນທິດທາງໃຫ້ແກ່ການເສີມຂະຫຍາຍການຮ່ວມມື ລະຫວ່າງ ອາຊຽນ ແລະ ຈີຊີຊີ ໃນອະນາຄົດ.
ຂ່າວ-ພາບ: ກະຊວງການຕ່າງປະເທດ
