ຫາລື ປະເມີນຜົນກະທົບໄພພິບັດ ແລະ ການສະເໜີຂໍງົບຟື້ນຟູສຸກເສີນ

ວັນທີ 20 ຕຸລາ 2023, ຄະນະກຳມະການຄຸ້ມຄອງໄພພິບັດຂັ້ນສູນກາງ (ກຄພສ) ໄດ້ຈັດກອງປະຊຸມປຶກສາຫາລື ປະເມີນຜົນກະທົບ, ຜົນເສຍຫາຍ ແລະ ການສະເໜີຟື້ນຟູຫຼັງນໍ້າຖ້ວມໃນໄລຍະທ້າຍເດືອນກໍລະກົດ ຫາຕົ້ນເດືອນສິງຫາ 2023 ຜ່ານມາ,  ໂດຍການເປັນປະທານຂອງ ພົນເອກ ຈັນສະໝອນ ຈັນຍາລາດ  ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ; ມີທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫັວດດີການສັງຄົມ (ຮສສ) ຮອງປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ.

ໂອກາດດັ່ງກ່າວ,  ພົນເອກ ຈັນສະໝອນ ຈັນຍາລາດ ກ່າວວ່າ: ໃນໄລຍະຜ່ານມາ ກຄພສ ໄດ້ສົມທົບກັບຂະແໜງການທີ່ກ່ຽວຂ້ອງ ດຳເນີນການການລົງເຮັດວຽກຮ່ວມກັບຂັ້ນແຂວງ ເພື່ອເບິ່ງຄືນໂຕເລກການປະເມີນຜົນກະທົບ ຄວາມເສຍຫາຍ ແລະ ຄວາມຕ້ອງການ ໃນການຟື້ນຟູຫຼັງໄພພິບັດນໍ້າຖ້ວມ ຢູ່ 3 ແຂວງ ທີ່ໄດ້ຮັບຜົນເສຍຫາຍໜັກໜ່ວງ ຄື: ແຂວງບໍລິຄຳໄຊ, ຄຳມ່ວນ ແລະ ສະຫວັນນະເຂດ, ສ່ວນ ອີກ 9 ແຂວງ ແມ່ນໄດ້ມອບໃຫ້ຄະນະກຳມະການຄຸ້ມຄອງໄພພິບັດຂັ້ນແຂວງ ຮ່ວມກັບອົງການປົກຄອງທ້ອງຖິ່ນ ດຳເນີນການປະເມີນຄືນ ແລະ ຢັ້ງຢືນຂໍ້ມູນຜົນເສຍຫາຍ ແລະ ຄວາມຕ້ອງການໃນການຟື້ນຟູ ສົ່ງໃຫ້ທາງຄະນະກຳມະການຄຸ້ມຄອງໄພພິບັດຂັ້ນສູນກາງ ສັງລວມ ເພື່ອຄົ້ນຄວ້າພິຈາລະນາ ສະເໜີລັດຖະບານໃນການແກ້ໄຂສຸກເສີນ ໂດຍສະເພາະບັນດາກິດຈະກຳ ແລະ ໂຄງການທີ່ທາງແຂວງໄດ້ມີການແກ້ໄຂສຸກເສີນໄປກ່ອນ ເພື່ອການຊ່ວຍເຫຼືອສຸກເສີນທາງດ້ານມະນຸດສະທໍາໃຫ້ທັນສະພາບການ.

ທ່ານ ວົງຄຳ ວັນທານຸວົງ ຫົວໜ້າກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ ລາຍງານໃຫ້ຮູ້ວ່າ: ໃນລະຫວ່າງເດືອນກໍລະກົດ ຫາ ເດືອນສິງຫາ 2023 ຢູ່ບັນດາແຂວງພາກເໜືອ, ພາກກາງ ແລະ ພາກໃຕ້ມີຝົນຕົກທຸກມື້ຕິດຕໍ່ກັນເຮັດໃຫ້ແມ່ນໍ້າຫຼາຍສາຂາມີລະດັບນໍ້າສູງຂຶ້ນຢ່າງໄວ ແລະ ລົ້ນຕາຝັ່ງເຂົ້າຖ້ວມພື້ນທີ່ການຜະລິດ, ພື້ນຖານໂຄງລ່າງ ແລະ ທີ່ຢູ່ອາໄສຂອງປະຊາຊົນໄດ້ຮັບຜົນກະທົບຢູ່ 12 ແຂວງ ຄື: ນະຄອນຫຼວງວຽງຈັນ, ແຂວງບໍ່ແກ້ວ, ຫຼວງພະບາງ, ຫົວພັນ, ໄຊຍະບູລີ, ຊຽງຂວາງ, ວຽງຈັນ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ຈໍາປາສັກ ແລະ ແຂວງໄຊສົມບູນ ຊຶ່ງໄດ້ຮັບຜົນເສຍຫາຍ 69 ເມືອງ, 590 ບ້ານ, 29.735 ຄອບຄົວ, 134.775 ຄົນ (ຍິງ 64.050 ຄົນ), ບາດເຈັບ 2 ຄົນ, ເສຍຊີວິດ 2 ຄົນ, ຄິດເປັນມູນຄ່າເສຍຫາຍທັງໝົດ 1.037.296.678.959 ກີບ.