ຄະນະຜູ້ແທນ ຫົວໜ້າຕໍາຫລວດອາຊຽນ ເຂົ້າຢ້ຽມຂໍ່ານັບ ນາຍົກລັດຖະມົນຕີ ພ້ອມລາຍງານການດຳເນີນກອງປະຊຸມ  ຄັ້ງທີ 41

ວັນທີ 19 ຕຸລາ 2023 ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ, ຫົວໜ້າກົມໃຫຍ່ຕໍາຫຼຼວດ, ຫົວໜ້າຕໍາຫຼວດລາວ ໄດ້ນຳພາຄະນະຜູ້ແທນ ຫົວໜ້າຕໍາຫຼວດອາຊຽນ ທີ່ເດີນທາງເຂົ້າມາຮ່ວມກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41 ຢູ່ນະຄອນຫຼວງວຽງຈັນແຕ່ວັນທີ 17-19 ຕຸລາ 2023ນີ້, ເຂົ້າຢ້ຽມຂໍ່ານັບ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ເພື່ອລາຍງານກ່ຽວກັບການເຂົ້າຮ່ວມກອງປະຊຸມ ຂອງບັນດາຄະນະຜູ້ແທນຫົວໜ້າຕໍາຫຼວດອາຊຽນ.

ໂອກາດນີ້, ພົນຕີ ຄໍາກິ່ງ ຜຸຍຫຼ້າມະນີວົງ ໄດ້ຕາງໜ້າໃຫ້ຄະນະຜູ້ແທນ ຫົວໜ້າຕໍາຫຼວດອາຊຽນ ລາຍງານກ່ຽວກັບການດໍາເນີນກອງປະຊຸມຫົວໜ້າຕໍາຫຼວດອາຊຽນ ຄັ້ງນີ້ ເປັນການສືບຕໍ່ເຈດຕະນາລົມ ແຫ່ງການຮ່ວມມືດ້ານວຽກງານຕໍາຫຼວດ ລະຫວ່າງ ບັນດາປະເທດສະມາຊິກ ຕໍາຫຼວດອາຊຽນ, ຄູ່ເຈລະຈາ ແລະ ປະເທດສັງເກດການ ເພື່ອແກ້ໄຂບັນຫາອາຊະຍາກໍາຂ້າມຊາດ ເປັນຕົ້ນແມ່ນ: ການລັກລອບ ຄ້າ-ຂາຍ ຢາເສບຕິດ, ການກໍ່ການຮ້າຍ, ການຄ້າມະນຸດ, ການຄ້າຂາຍອາວຸດ, ການຄ້າຂາຍສັດປ່າທີ່ຜິດກົດໝາຍ, ອາຊະຍາກໍາທາງທະເລ, ອາຊະຍາກໍາທາງດ້ານການຄ້າ ແລະ ການປອມແປງບັດເຄຼດິດ, ການສໍ້ໂກງຂ້າມຊາດ, ການປອມແປງເອກະສານເດີນທາງອາຊະຍາກໍາທາງຄອມພິວເຕີ ແລະ ອາຊະຍາກໍາອື່ນໆ ທີ່ເປັນໄພຂົ່ມຂູ່ຕໍ່ສະຖຽນລະພາບທາງດ້ານການເມືອງ, ຄວາມໝັ້ນຄົງທາງດ້ານເສດຖະກິດ ແລະ ການພັດທະນາທາງດ້ານວັດທະນະທໍາ-ສັງຄົມ ຂອງພາກພື້ນ ແລະ ສາກົນ.

ດັ່ງນັ້ນ ກອງປະຊຸມຄັ້ງນີ້ ແມ່ນມີຄວາມສໍາຄັນຢ່າງຍິ່ງຕໍ່ກັບການເພີ່ມທະວີການຮ່ວມມືທັງໃນລະດັບພາກພື້ນ ແລະ ສາກົນ ໃນການຕອບຕ້ານຄືນບັນຫາອາຊະຍາກໍາຕ່າງໆ ເພື່ອແນໃສ່ເຮັດໃຫ້ພາກພື້ນ, ກໍຄື ປະຊາຄົມໃນທົ່ວໂລກ ມີສັນຕິພາບ, ຄວາມສະຫງົບ ແລະ ໝັ້ນຄົງ.

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ຕໍ່ບັນດາຄະນະຜູ້ແທນຫົວໜ້າຕໍາຫຼວດອາຊຽນ ຄັ້ງນີ້, ພ້ອມທັງອວຍພອນໃຫ້ກອງປະຊຸມຄັ້ງນີ້ ດໍາເນີນໄປດ້ວຍຜົນສໍາເລັດ ພາຍໃຕ້ ຂອບການຮ່ວມມືທາງດ້ານວຽກງານຕໍາຫຼວດ ໃນຂົງເຂດອາຊຽນ ເຮັດໃຫ້ກໍາລັງຕໍາຫຼວດມີຄວາມເຕີບໃຫຍ່ເຂັ້ມແຂງ ຂື້ນເປັນກ້າວໆ.