ປກສ ນວ ກັກຕົວເປົ້າໝາຍຊື້-ຂາຍ ອາວຸເສິກ ພ້ອມຂອງກາງປືນສັ້ນ 2 ກະບອກ ແລະ ລູກປືນ 21 ລູກ

ວັນທີ 17 ຕຸລາ 2023, ພັທ ຄຳ ທັກຂິນ ຫົວໜ້າພະແນກສືບສວນ-ສືບສວນຄະດີອາຍາ ຫ້ອງຕຳຫລວດກອງບັນຊາການ ປກສ ນະຄອນຫລວງວຽງຈັນ (ນວ) ລາຍງານຕໍ່ຂ່າວ ປກສ ນວ ວ່າ: ວັນທີ 13 ຕຸລາຜ່ານມາ ເຈົ້າໜ້າທີ່ ປກສ ນວ ໄດ້ຮັບລາຍງານຈາກພົນລະເມືອງວ່າມີການເຄື່ອນໄຫວຊື້-ຂາຍອາວຸດເສິກຢູ່ເຂດເມືອງໄຊທານີ ນວ, ຈຶ່ງມອບໝາຍໃຫ້ເຈົ້າໜ້າທີ່ວິຊາສະເພາະລົງຕິດຕາມກວດກາກຸ່ມເປົ້າໝາຍ ພ້ອມວາງແຜນເຂົ້າຈັບກຸມ, ມາຮອດເວລາ 13:00 ໂມງ ຂອງວັນດຽວກັນ ເຈົ້າໜ້າທີ່ຈຶ່ງເຂົ້າຈັບກຸມໃນຂະນະທີ່ກຳລັງຊື້-ຂາຍອາວຸດເສິກ ປະເພດປືນສັ້ນ ຢູ່ບ່ອນຈອດລົດປ້ຳນ້ຳມັນແຫ່ງໜຶ່ງ ບ້ານສີວິໄລ ເມືອງໄຊທານີ ນວ, ສາມາດກັກຕົວເປົ້າໝາຍໄດ້ 1 ຄົນ ຊື່ທ້າວ ໄຊ ອາຍຸ 38 ປີ ອາຊີບວ່າງງານ, ພັກເຊົາຢູ້ບ້ານຈອມມະນີ ເມືອງໄຊເສດຖາ ນວ ພ້ອມຂອງກາງປືນສັ້ນ 2 ກະບອກ ແລະ ລູກປືນສັ້ນ 21 ລູກ.

ປັດຈຸບັນຄະດີດັ່ງກ່າວ ເຈົ້າໜ້າທີ່ຫ້ອງຕຳຫລວດກອງບັນຊາການ ປກສ ນວ ພວມເລັ່ງສືບສວນ-ສືບສວນ ຂະຫຍາຍຜົນດຳເນີນຄະດີຕາມຂັ້ນຕອນກົດໝາຍ.