ຍ້ອນຄວາມຫຶງຫວງເມຍເກົ່າ ຈຶ່ງລົງມີໃຊ້ປືນແກັບຍິງຊາຍໜຸ່ມຜູ່ມາພົວພັນກັບເມຍເກົ່າຈົນເສຍຊີວິດ
ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງຈຳປາສັກ ລາຍງານວ່າ: ວັນທີ 20 ກັນຍາ 2023 ນີ້, ມີເຫດຍິງກັນຢູ່ບ້ານໜອງຫີນ ເມືອງປາກຊ່ອງ ແຂວງຈຳປາສັກ ຈົນມີຜູ້ເສຍຊີວິດໜຶ່ງຄົນ, ຜູ້ກໍ່ເຫດ ຊື່ ທ້າວ ພະຍຸ ອາຍຸ 37 ປີ ຊາວສວນ ຢູ່ບ້ານໜອງຫີນ ເມືອງປາກຊ່ອງ ແຂວງຈຳປາສັກ ໂດຍໃຊ້ປືນແກັບຍິງ ຜູ້ບ່າວ ທີ່ນັ່ງກິນດື່ມກັບເມຍເກົ່າ ຍ້ອນຄວາມຫຶງຫວງ.ຜູ້ເສຍຊີວິດຊື່ ທ້າວ ພູຊົງ ສັນຊາດໄທ ອາຍຸ 39 ປີ ກຳມະກອນເຝົ້າສວນຖົ່ວລຽນ
ຜ່ານການສືບສວນ-ສອບສວນຂອງເຈົ້າໜ້າທີ່ ທ້າວ ພະຍຸ ຮັບສາລະພາບວ່າ: ເວລາປະມານ 19:00 ຂອງວັນທີ 20 ກັນຍາຜ່ານມາ ຕົນໄດ້ນັ່ງຢູ່ຖຽງສວນ ແລະ ໄດ້ຍິນສຽງລູກຮ້ອງໄຫ້ຢູ່ສວນຖົ່ວລຽນ ເຂດໃກ້ຄຽງກັນ ຈຶ່ງຍ່າງໄປເບິ່ງ ເຊິ່ງເຫັນເມຍເກົ່ານັ່ງກິນດື່ມສິ່ງມຶນເມົາ ກັບທ້າວ ພູຊົງ ສັນຊາດໄທ ອາຍຸ 39 ປີ ກຳມະກອນເຝົ້າສວນຖົ່ວລຽນ ແລະ ກຳມະກອນອີກປະມານ 10 ຄົນ ຢູ່ສວນ ໃກ້ກັນ, ເມື່ອເປັນແນວນັ້ນຈຶ່ງໄດ້ບອກເມຍເກົ່າເອົາລູກເມືອນອນ, ແຕ່ເມຍເກົ່າກໍບໍ່ຍອມເມືອ ຍັງນັ່ງກິນນັ່ງດື່ມຢູ່ຕໍ່ໄປອີກ, ຍ້ອນຄວາມໃຈຮ້າຍ ແລະ ຫຶງຫວງ ເມຍເກົາ ທ້າວ ພະຍຸ ຈຶ່ງດຶງຜົມເມຍເກົ່າມາ ແລ້ວໃຊ້ມືຕົບຫົວ 1 ບາດ ຈາກນັ້ນກໍ ຍ່າງກັບຖຽງສວນ.
ຂະນະດຽວກັນ ທ້າວ ພູຊົງ ເກີດຄວາມບໍ່ພໍໃຈ ຈຶ່ງຊວນໝູ່ທີ່ນັ່ງດື່ມນຳກັນ 4-5 ຄົນ ຍ່າງໄປຫາ ທ້າວ ພະຍຸ ຢູ່ເທິງຖຽງ ແລະ ເກີດຜິດຖຽງກັນ, ເມື່ອເຫັນແນວນັ້ນ ທ້າວ ພະຍຸ ຈຶ່ງຈັບປືນແກັບອອກມາ ເມື່ອທ້າວ ພູຊົງ ກໍພະຍາຍາມແລ່ນໜີ ແຕ່ກໍຖືກທ້າວ ພະຍຸ ຍິງປຶນໃສ່ຖືກບໍລິເວນສັນຫລັງໄດ້ຮັບບາດເຈັບສົມຄວນ ແລະ ເສຍຊີວິດໃນເວລາຕໍ່ມາ.
