ເຈົ້າແຂວງໆຫລວງພະບາງ ລົງຊຸກຍູ້ການປູກ-ການລ້ຽງຂອງປະຊາຊົນ ຢູ່ ເມືອງວຽງຄຳ

ວັນທີ 11-12 ຕຸລາ 2023, ທ່ານ ຄໍາຂັນ ຈັນທະວີສຸກ ເຈົ້າແຂວງໆຫລວງພະບາງ ພ້ອມດ້ວຍຄະນະ ໄດ້ລົງຕິດຕາມ, ຊູກຍູ້ການປູກ-ການລ້ຽງ ຂອງປະຊາຊົນຢູ່ບ້ານພູຜັກແພວ ເມືອງວຽງຄຳ ເຊິ່ງໄດ້ໂອຢ້ຽມຊົມການທົດລອງປູກຕົ້ນໝາກ ກາດີເມຍ ຂອງຄອບຄົວ ທ້າວ ຫຸມເພັງ ສີບຸນເຮືອງ ທີ່ໄດ້ທົດລອງປູກມາແຕ່ຕົ້ນປີ 2023 ຈໍານວນ 700 ຕົ້ນ ໃນເນື້ອທີ 3 ກວ່າເຮັກຕ່າ ຍ້ອນເຫັນວ່າເປັນຕົ້ນໄມ້ທີ່ສາມາດໃຫ້ຜົນຜະລິດດີ ແລະເປັນທີ່ຕ້ອງການຂອງຕະຫລາດຕ່າງປະເທດ, ໄດ້ທົດລອງປູກ 2 ແບບຄື: ປູກໃນສວນປູກຫຍ້າອາຫານສັດ ແລະ ປູກໃນສວນພືດລົ້ມລຸກ ມາເຖິງປັດຈຸບັນເຫັນນວ່າ ຕົ້ນໝາກກາດີເມຍ ແມ່ນມີການຈະເລີນເຕີບໂຕໃນລະດັບໜຶ່ງ, ພ້ອມທັງ ໄດ້ລົງຊຸກຍູ້ການລ້ຽງງົວພັນປະສົມ ຂອງຄົວຄອບ ທ້າວ ບຸນມີ ເຊິ່ງໄດ້ເລີມປູກຫຍ້າ ແລະລ້ຽງສັດ ແຕ່ປີ 2016 ຜ່ານມາໄດ້ຂາຍງົວອອກ ຈໍານວນ 17 ໂຕສ້າງ ລາຍຮັບໃຫ້ຄອບຄົວໄດ້ 200 ລ້ານກວ່າກີບ, ປັດຈຸບັນມີງົວ 46 ໂຕ ແລະ ມີແບ້ອີກຈໍານວນໜຶ່ງ, ພ້ອມທັງສືບຕໍ່ລົງຕິດຕາມ, ຊູກຍູ້ການປູກກາເຟໃນຮົ່ມໄມ້ທໍາມະຊາດ ຂອງປະຊາຊົນຢູ່ບ້ານຫ້ວຍທອງ ຕື່ມອີກ.

ທ່ານເຈົ້າແຂວງໆຫລວງພະບາງ ໄດ້ເນັ້ນໃຫ້ອົງການປົກຄອງບ້ານ ສືບຕໍ່ເສີມຂະຫຍາຍມູນເຊື້ອຜະລິດເປັນສິນຄ້າ ຕິດພັນກັບການຮັກສາປ່າໄມ້ທໍາມະຊາດ ແນ່ໃສ່ເຮັດໃຫ້ປະຊາຊົນ ຫລຸດພົ້ນອອກຈາກທຸກຍາກໄດ້ເທື່ອລະກ້າວ, ເນັ້ນໃຫ້ວິຊາການ ແລະ ຜູ້ລ້ຽງສັດ ສຸມໃສ່ການຄັດເລືອກແນວພັນສັດ ຕິດພັນການດູແລຮັກສາສຸຂະພາບຂອງສັດ ເພື່ອໃຫ້ສັດຈະເລີນເຕີບໂຕ ສາມາດຕອບສະໜອງສັດເປັນສິນຄ້າ ທີ່ຕະຫຼາດມີຄວາມຕ້ອງການຫລາຍໃນປັດຈຸບັນ.

ຂ່າວ: ບຸນທັນ ໄຊຍະວົງ ຖວທ ເມືອງວຽງຄໍາ