ຮອງນາຍົກ ເນັ້ນໃຫ້ກຳແໜ້ນວຽກງານຈຸດສຸມທ້າຍສະໄໝທີ XI ທີ່ພົວພັນເຖິງກໍາລັງປະກອບອາວຸດ
ພົອ ວິໄລ ຫລ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ ໂອ້ລົມຕໍ່ກອງປະຊຸມເຜີຍແຜ່ເຊື່ອມຊຶມ ແລະ ຜັນຂະຫຍາຍຜົນສຳເລັດ ຂອງກອງປະຊຸມຄົບຄະນະກາງສະໄໝຂອງຄະນະບໍລິຫານງານສູນກາງພັກ ຄັ້ງທີ XI ໃນວັນທີ 13 ຕຸລາ 2023 ໂດຍເນັ້ນໃຫ້ບັນດາສະຫາຍໃນຄະນະປະຈຳພັກ, ຄະນະພັກກະຊວງ, ຄະນະບໍລິຫານງານພັກກົມໃຫຍ່, ຫ້ອງວ່າການ, ກົມ, ກອງບັນຊາການ, ວິທະຍາຄານ ຈົ່ງກຳແໜ້ນວຽກງານຈຸດສຸມຈໍານວນໜຶ່ງ ໃນທ້າຍສະໄໝທີ XI ໃນນັ້ນ, ໃຫ້ເອົາໃຈໃສ່ບາງວຽກທີ່ກ່ຽວຂ້ອງ, ພົວພັນເຖິງກໍາລັງປະກອບອາວຸດ ເປັນຕົ້ນແມ່ນ: ກ້າຫານໃນການແກ້ໄຂບັນຫາພະນັກງານທີ່ເວົ້າແລ້ວບໍ່ເຮັດ, ສົ່ງເສີມພະນັກງານເຮັດແທ້ທຳຈິງ.
ພ້ອມທັງເພີ່ມທະວີ ແລະ ຍົກສູງປະສິດທິພາບການຄຸ້ມຄອງລັດ, ຄຸ້ມຄອງສັງຄົມ, ເຄື່ອນໄຫວວຽກງານ, ດຳລົງຊີວິດໃຫ້ຖືກຕາມກົດໝາຍ ແລະ ເດັດດ່ຽວແກ້ໄຂສິ່ງຫຍໍ້ທໍ້ຕ່າງໆໃນສັງຄົມ; ຫັນລົງກໍ່ສ້າງຮາກຖານການເມືອງ, ປັບປຸງລະບົບການເມືອງຢູ່ຮາກຖານໃຫ້ໜັກແໜ້ນ, ເຂັ້ມແຂງ; ແກ້ໄຂກົນໄກປະສານງານ ລະຫວ່າງຂະແໜງການດ້ວຍກັນ, ລະຫວ່າງສູນກາງ ແລະ ທ້ອງຖິ່ນ, ເຮັດໃຫ້ທ້ອງຖິ່ນມີຄວາມຮັບຜິດຊອບ, ມີຄວາມເປັນເຈົ້າການຫລາຍຂຶ້ນ.
ຂ່າວ: ຄວາມສະຫງົບ
