ຜ່າຕັດເກີດລູກກ່ອນກຳນົດຍ້ອນເປັນເນື້ອງອກໃນສະໝອງ ແລະ ຫລັງຈາກເສຍຊີວິດໄດ້ບໍລິຈາກອະໄວຍະວະໃຫ້ໂຮງໝໍ

ວັນທີ 12 ຕຸລາ 2023 , ເພຈເຟສບຸກ World Forum ຂ່າວສານຕ່າງປະເທດ ໂພສຂໍ້ຄວາມວ່າ: ພາບນາທີສຸດທ້າຍຂອງແມ່ ອາຍຸ 28 ປີ ທັກທາຍລູກນ້ອຍໃນຕູ້ອົບ ກ່ອນທີ່ຈະເສຍຊີວິດ ແລະ ໄດ້ບໍລິຈາກອະໄວຍະວະເພື່ອຊ່ວຍເຫລືອອີກ 6 ຊີວິດ
ວັນທີ 18 ກັນຍາຜ່ານມາ ນາງ ເອີຊເລມ ອາໄສຢູ່ໃນເມືອງອີຊມີ ປະເທດຕວກກີ ໄປໂຮງໝໍ ເພື່ອກວດສຸຂະພາບໃນອາທິດທີ 35 ຂອງການຖືພາ, ຫລັງທີ່ມີອາການເບິ່ງບໍ່ເຫັນຊັດເຈນ ແລະ ມີອາການຫູດັບ ເຊິ່ງທ່ານໝໍໄດ້ກວດຫລາຍວິທີ ຈຶ່ງພົບວ່າມີເນື້ອງອກໃນສະໝອງຕ້ອງຜ່າຕັດຢ່າງຮີບດ່ວນ ໂດຍໄດ້ວາງແຜນຜ່າຕັດເອົາລູກອອກກ່ອນກຳນົດ 1 ເດືອນ ເຊິ່ງເດັກນ້ອຍມີຄວາມປອດໄພ, ແລະ ຜູ້ເປັນແມ່ໄດ້ທັກທາຍລູກຂະນະທີ່ເຂົ້າຕູ້ອົບ, ຫລັງຈາກນັ້ນ ນາງກໍໄດ້ເຂົ້າຜ່າຕັດເນື້ອງອກໃນສະໝອງ ແລະ ຜ່ານໄປ 7 ວັນ ລາວໄດ້ເສຍຊີວິດ, ກ່ອນຈະເສຍຊີວິດ ລາວໄດ້ ບໍລິຈາກອະໄວຍະວະ ເພື່ອຕໍ່ຊີວິດໃຫ້ອີກ 6 ຄົນ.
ທ່ານໝໍກ່າວວ່າ ເປັນການກະທຳທີ່ມີກຽດແລະສົມຄວນໄດ້ຮັບການຍ້ອງຍໍຊົມເຊີຍ, ລູກນ້ອຍແມ່ນປອດໄພດີ ເຖິງຈະເກີດກ່ອນກຳນົດກໍຕາມ ສ່ວນແມ່ ບໍ່ສາມາດຊ່ວຍຊີວິດຫລັງຜ່າຕັດໄດ້ ເພາະເນື້ອງອກມີຂະໜາດໃຫຍ່ ແລະ ຊັບຊ້ອນຫລາຍ.
ຜົວຂອງລາວໃຫ້ຂໍ້ມູນວ່າ: ທັງສອງແຕ່ງງານກັນມາໄດ້ 2 ປີ ແລະ ເມຍໄດ້ເກີດລູກຊາຍໃຫ້, ເບື້ອງຕົ້ນ ເມຍມີອາການເຈັບຫົວ ແລະ ປວດຮາກຢ່າງຮຸນແຮງ ເລີຍບໍ່ສົງໄສ ຄິດວ່າມາຈາກການຖືພາ, ພໍມາໄລຍະໜຶ່ງຈຶ່ງມີອາການເສຍການຊົງຕົວຢືນບໍ່ຢູ່, ຫູເບື້ອງຂວາບໍ່ໄດ້ຍິນ ຈຶ່ງໄດ້ເຂົ້າໄປໂຮງໝໍ, ແລະ ໄດ້ເຂົ້າຜ່າຕັດສະໝອງ ໃນວັນທີ 19 ກັນຍາ ແລະ ເອົາເນື້ອງອກອອກສຳເລັດ, ຈາກນັ້ນຢູ່ຫ້ອງ ໄອຊີຢູ 7 ວັນ ໃນທີ່ສຸດກໍ່ເສຍຊີວິດ. https://www.facebook.com/WorldForumTh/posts/pfbid0Xh2uJXjwVQDjxJqdGVhS4hafBYTquSvTekPqHWdAERCFQBit7rWkoyAYRTigkDPCl