ປະຊາຊົນສ່ອງແສງ!! ການປ່ອຍຄວັນ ຂອງໂຮງງານແຫ່ງໜຶ່ງ ຢູ່ເຂດບ້ານໂຄກສະອາດ-ສະພັງຄະນົງ ເມືອງໄຊທານີ

ວັນທີ 12 ຕຸລາ 2023, ປະຊາຊົນທີ່ອາໄສຢູ່ເຂດໂຄກສະອາດ-ສະພັງຄະນົງ ເມືອງໄຊທານີ ນະຄອນຫລວງວຽງຈັນ, ໄດ້ສ່ອງແສງບັນຫາການປ່ອຍຄວັນ ຂອງໂຮງງານແຫ່ງໜຶ່ງ ທີ່ຕັ້ງຢູ່ເຂດນີ້ວ່າ: ໂຮງງານດັ່ງກ່າວໄດ້ທຳການຜະລິດ ແລະ ປ່ອຍຄວັນອອກທຸກມື້ ທັງກາງເວັນ-ກາງຄືນ ບໍ່ມີມື້ຫຍຸດເຊົາ ສົ່ງຜົນກະທົບມົນລະພິດເຮັດໃຫ້ປະຊາຊົນຜູ້ທີ່ອາໄສຢູ່ບໍລິເວນໃກ້ຄຽງໄດ້ຮັບຜົນກະທົບໜັກ,  ມີອາການຫາຍໃຈຍາກ-ຫາຍໃຈຝືດ ແລະ ແສບດັງ.

ຖ້າຫາກຍັງປ່ອຍຄວັນໜັກໆແບບນີ້ຕໍ່ໄປໂດຍບໍ່ມີການແກ້ໄຂ ອາດເຮັດໃຫ້ປະຊາຊົນຜູ້ທີ່ສຸຂະພາບອ່ອນເພຍ ແລະ ເດັກນ້ອຍ ເກີດເປັນພະຍາດຫລາຍຢ່າງຕາມມາເປັນຕົ້ນ ພະຍາດທາງເດີນຫາຍໃຈ, ປອດບວມຊໍ້າເຮື້ອ; ການຕິດເຊື້ອທາງເດີນຫາຍໃຈ; ມະເຮັງປອດ; ຫົວໃຈ ແລະ ເສັ້ນເລືອດຕັນ.

ຮຽກຮ້ອງໃຫ້ເຈົ້າໜ້າທີ່ກ່ຽວຂ້ອງຊ່ວຍກວດກາ ແລະ ແກ້ໄຂດ່ວນ ເພາະຄວັນພິດຈາກໂຮງງານໄດ້ສ້າງຄວາມເດືອດຮ້ອນໃຫ້ແກ່ພໍ່ແມ່ປະຊາຊົນທີ່ອາໄສຢູ່ບໍລິເວນໃກ້ຄຽງໄດ້ຮັບຜົນກະທົບເປັນວົງກວ້າງ.