IMF ຄາດຄະເນເສດຖະກິດໂລກ ອ່ອນກໍາລັງໃນປີ 2023
ວັນທີ 10 ຕຸລາ, ລາຍງານທ່າອ່ຽງເສດຖະກິດໂລກສະບັບໃໝ່ຈາກກອງທຶນການເງິນສາກົນ (IMF) ຫົວຂໍ້ “ເນວິເກຕິງ ໂກລບອລ ໄດເວີເຈນ” (Navigating Global Divergences) ທີ່ເຜີຍແພ່ລະຫວ່າງກອງປະຊຸມທະນາຄານໂລກ-ກອງທຶນການເງິນສາກົນ ປະຈໍາປີ 2023 ຢູ່ເມືອງມາຣາເກ ຂອງໂມຣ໊ອກໂກ ຄາດຄະເນວ່າການເຕີບໃຫຍ່ທົ່ວໂລກຈະຊ້າລົງຈາກ 3,5% ໃນປີ 2022 ເຫລືອ 3% ໃນປີນີ້.
ລາຍງານລະບຸວ່າ: ເສດຖະກິດໂລກກໍາລັງອ່ອນກໍາລັງ ແລະ ບໍ່ໄດ້ເຕີບໃຫຍ່ແບບກ້າວກະໂດດ, ພ້ອມຄາດຄະເນການເຕີບໃຫຍ່ຢູ່ລະດັບ 2,9% ສໍາລັບປີ 2024 ຫລຸດລົງຈາກ 3% ທີ່ຄາດຄະເນໄວ້ໃນເດືອນກໍລະກົດ ເນື່ອງຈາກການຟື້ນຕົວທີ່ຊັກຊ້າກວ່າຄາດຄະເນຈາກຜົນກະທົບຂອງການແພ່ລະບາດໂຄວິດ-19 ແລະ ວິກິດຢູ່ອູແກຣນ.
ຢ້ອນກັບໄປ, ເສດຖະກິດໂລກມີຄວາມຢືດຢຸ່ນຕໍ່ການຢຸດສະງັກໃນຕະຫລາດພະລັງງານ ແລະ ອາຫານ ອັນເປັນຜົນມາຈາກສົງຄາມ ຕະຫລອດຈົນສະພາບການເງິນໂລກທີ່ເຄັ່ງຕຶງແບບບໍ່ເຄີຍເປັນມາກ່ອນ ເພື່ອຕໍ່ສູ້ກັບສະພາບເງິນເຟີ້ທີ່ສູງຫລາຍທົດສະວັດ, ແຕ່ມີຄວາມກັງວົນວ່າການເຕີບໃຫຍ່ຈະຍັງຊັກຊ້າ ແລະ ບໍ່ສົມດູນ, ຂະນະທີ່ສັນຍານຄວາມບໍ່ສອດຄ່ອງລະດັບໂລກເພີ່ມສູງຂຶ້ນ.
ການຂະຫຍາຍຕົວຊ້າເກີດຂຶ້ນຢ່າງໂດດເດັ່ນໃນກຸ່ມປະເທດພັດທະນາແລ້ວຫລາຍກວ່າກຸ່ມປະເທດຕະຫລາດເກີດໃໝ່ ຫລື ກໍາລັງພັດທະນາ ໂດຍສໍາລັບປະເທດທີ່ພັດທະນາແລ້ວ ຄາດວ່າຈະຂະຫຍາຍຕົວຊ້າຈາກ 2,6% ໃນປີ 2022 ເຫລືອ 1,5% ໃນປີ 2023 ແລະ 1,4% ໃນປີ 2024 ທ່າມກາງແຮງກະຕຸ້ນທີ່ແຂງແຮງກວ່າການຄາດຄະເນຂອງອາເມລິກາ ແລະ ການເຕີບໃຫຍ່ອ່ອນກໍາລັງກວ່າການຄາດຄະເນໃນພື້ນທີ່ເອີຣົບ.
ສ່ວນປະເທດຕະຫລາດເກີດໃໝ່ ແລະ ປະເທດກໍາລັງພັດທະນາ ຄາດວ່າອັດຕາການເຕີບໃຫຍ່ຈະຫລຸດລົງເລັກໜ້ອຍຈາກ 4,1% ໃນປີ 2022 ເຫລືອ 4% ໃນປີ 2023 ແລະ 2024 ໂດຍມີການປັບຫລຸດລົງ 0,1 ຈຸດໃນປີ 2024.
ຂະນະດຽວກັນ, ກອງທຶນການເງິນສາກົນເຕືອນວ່າການແຍກສ່ວນທາງພູມສາດທີ່ທະວີຄວາມຮຸນແຮງຂຶ້ນບໍ່ພຽງໝາຍເຖິງຕົ້ນທຶນທີ່ສູງຂຶ້ນສໍາລັບຄວາມຈະເລີນຮຸ່ງເຮືອງລະດັບໂລກ, ແຕ່ຍັງຂັດຂວາງການຮ່ວມມືພະຫຸພາຄີໃນການຈັດຫາສິນຄ້າສາທາລະນະທີ່ສໍາຄັນເຊັ່ນ: ການຕໍ່ສູ້ກັບການປ່ຽນແປງຂອງສະພາບອາກາດ ແລະ ພະຍາດລະບາດໃຫຍ່ຕ່າງໆໃນອະນາຄົດ ລວມທັງການຮັບປະກັນຄວາມໝັ້ນຄົງດ້ານພະລັງງານ ແລະ ອາຫານ.
