5 ປີຜ່ານມາມີນັກສຶກສາລາວໄດ້ຮັບທຶນການສຶກສາຕໍ່ຕ່າງປະເທດ 5 ພັນກວ່າຄົນ
ກົມກິດຈະການນັກສຶກສາກະຊວງສຶກສາທິການ ແລະ ກິລາ ໃຫ້ຮູ້ວ່າ: ນັບແຕ່ປີ 2012-2016 ມີນັກສຶກສາລາວໄດ້ຮັບທຶນການສຶກສາຕໍ່ຕ່າງປະເທດຫລາຍກວ່າ 5.000 ຄົນ, ໃນນັ້ນປະເທດຫວຽດນາມມີ 2.850 ກວ່າຄົນ, ສປຈີນ 1.650 ກວ່າຄົນ, ໄທ 230 ກວ່າຄົນ, ຍີ່ປຸ່ນ 50 ກວ່າຄົນ, ສ.ເກົາຫລີ 45 ຄົນ, ອົດສະຕາລີ 35 ຄົນ, ຣັດເຊຍ 30 ກວ່າຄົນ, ນິວຊີແລນ 21 ຄົນ, ຝຣັ່ງ 19 ຄົນ, ກຳປູເຈຍ 11 ຄົນ ແລະ ປະເທດອື່ນໆຫລາຍກວ່າ 90 ຄົນ, ສ່ວນຫລາຍແມ່ນໃນຂົງເຂດພາກວິຊາສຶກສາສາດ, ສ້າງຄູ, ສິລະປະ, ມະນຸດສາດ, ວິທະຍາສາດ, ຂ່າວສານ-ນັກຂ່າວ, ບໍລິຫານທຸລະກິດ, ກົດໝາຍ, ວິທະຍາສາດທຳມະຊາດ, ຄະນິດ, ສະຖິຕິ,ເຕັກໂນໂລຊີຂໍ້ມູນຂ່າວສານ ແລະ ການສື່ສານ, ວິສະວະກຳ-ເຕັກໂນໂລຊີການຜະລິດ ແລະ ການກໍ່ສ້າງ, ກະສິກຳ-ປ່າໄມ້, ການປະມົງ ແລະ ການປົວສັດ, ສຸຂະພາບ ແລະ ສະຫວັດດີການ ແລະ ການບໍລິການຕ່າງໆ ທີ່ສອດຄ່ອງກັບຄວາມຕ້ອງການຂອງການພັດທະ ນາເສດຖະກິດ-ສັງຄົມຂອງຊາດ ແລະ ການເຊື່ອມໂຍງກັບສາກົນ ກໍຄືສອດຄ່ອງກັບຄວາມຕ້ອງການຂອງຕະຫລາດແຮງງານໃນປັດຈຸບັນ ແລະ ໃນຕໍ່ໜ້ານີ້ ການຂໍທຶນຊ່ວຍເຫລືອພັດທະນາຊັບພະຍາກອນມະນຸດຈາກສາກົນຈະໄດ້ເນັ້ນໜັກທາງດ້ານໃນຂົງເຂດວິທະຍາສາດ ແລະ ເຕັກໂນໂລຊີເປັນຫລັກ, ເພື່ອຮອງຮັບຄວາມກ້າວໜ້າທັນສະໄໝຂອງໂລກ ກໍຄືການຫັນເປັນອຸດສະຫະກໍາ ແລະ ທັນສະໄໝ, ພ້ອມກັນນັ້ນການໄດ້ຮັບທຶນ ແລະ ໃຫ້ທຶນແຕ່ລະຄັ້ງ ກໍຕ້ອງເປີດເຜີຍໃຫ້ສັງຄົມໄດ້ຮັບຮູ້ຢ່າງກວ້າງຂວາງ.
ການລາຍງານຂໍ້ມູນດັ່ງກ່າວມີຂຶ້ນໃນກອງປະຊຸມປຶກສາຫາລືລະຫວ່າງກະຊວງສຶກສາທິການ ແລະ ຕົວແທນຈາກບັນດາປະເທດຜູ້ໃຫ້ທຶນການສຶກສາເມື່ອທ້າຍ ອາທິດຜ່ານມານີ້ຢູ່ທີ່ກະຊວງສຶກສາທິການ ແລະ ກິລາ, ໂດຍການເປັນປະທານຂອງທ່ານ ຄຳຜາຍ ສີສະຫວັນ ຮອງລັດຖະມົນຕີກະຊວງດັ່ງກ່າວ, ມີທ່ານ ແອນລິດ ເຊີເບິກ ອຸປະທູດອົດສະຕາລີປະຈຳລາວ, ມີຫົວໜ້າກົມ-ຮອງກົມ, ຜູ້ຕາງໜ້າຈາກສະຖານທູດ ແລະ ອົງການຈັດຕັ້ງສາກົນອື່ນໆເຂົ້າຮ່ວມນໍາດ້ວຍ.
