ຄັ້ງທໍາອິດໃນຮອບ 50 ປີ IMF-World Bank ປະຊຸມໃຫຍ່ຢູ່ອາຟຣິກາ
IMF ແລະ ທະນາຄານໂລກ ຈັດກອງປະຊຸມປະຈໍາປີຢູ່ທະວີບອາຟຣິກາ ເປັນຄັ້ງທໍາອິດໃນຮອບເຄິ່ງສະຕະວັດ ໂດຍໜຶ່ງໃນວາລະສໍາຄັນ ຄືການແກ້ໄຂພາລະໜີ້ສິນຂອງກຸ່ມປະເທດທຸກຍາກ.
ວັນທີ 10 ຕຸລາ, ສໍານັກຂ່າວຕ່າງປະເທດລາຍງານວ່າ: ທ່ານ ນາງ ຄຣິສຕາເລຍນາ ຈໍເຈຍວາ ຜູ້ອໍານວຍການໃຫຍ່ກອງທຶນການເງິນສາກົນ (IMF) ຖະແຫລງຕໍ່ກອງປະຊຸມປະຈໍາປີ ກັບທະນາຄານໂລກ (World Bank) ຢູ່ເມືອງມາຣາເກດ ໃນໂມຣ໊ອກໂກ ເຊິ່ງເປັນຄັ້ງທໍາອິດໃນຮອບ 50 ປີ ທີ່ IMF ແລະ ທະນາຄານໂລກ ຈັດການຫາລືໃນອາຟຣິກາ ນັບແຕ່ກອງປະຊຸມຢູ່ເກນຢາ ໃນປີ 1973 ຮຽກຮ້ອງກຸ່ມປະເທດຮັ່ງມີເພີ່ມການມອບການສະໜັບສະໜູນໃຫ້ກຸ່ມປະເທດກໍາລັງພັດທະນາເຊິ່ງມີພາລະໜີ້ສິນ.
ທັງນີ້, ນາງ ຈໍເຈຍວາ ເນັ້ນແຜນການປະຕິຮູບໂຄງສ້າງຂອງ IMF ເພື່ອນໍາໄປສູ່ການກໍານົດໂກຕ້າໃຫ້ແຕ່ລະປະເທດໃນການມອບການສະໜັບສະໜູນກຸ່ມປະເທດທີ່ມີຖານະທາງເສດຖະກິດດ້ອຍກວ່າ ຜ່ານການດໍາເນີນງານຂອງ IMF.
ຂະນະທີ່ທ່ານ ອາເຈ ບັງກາ ປະທານທະນາຄານໂລກ ກຽມຂະຫຍາຍຂອບເຂດໂກຕ້າການກູ້ຢືມອີກ 50.000 ລ້ານໂດລາສະຫະລັດ ພາຍໃນໄລຍະ 1 ທົດສະວັດຕໍ່ຈາກນີ້ ແລະ ອາດເພີ່ມອີກລະຫວ່າງ 100.000-125.000 ລ້ານໂດລາສະຫະລັດ ສະເພາະຈາກກຸ່ມປະເທດເສດຖະກິດຮັ່ງມີ.
ເຖິງວ່າຄໍາກ່າວທັງໝົດຂອງຜູ້ບໍລິຫານລະດັບສູງຂອງ IMF ແລະ ທະນາຄານໂລກ ຍັງບໍ່ອາດໄດ້ຂໍ້ສະຫລຸບຈາກກອງປະຊຸມຄັ້ງນີ້. ເຖິງຢ່າງໃດກໍຕາມ, ມີລາຍງານວ່າ: ອົງການທັງສອງແຫ່ງຈະສະແດງອອກທາງສັນຍາລັກ “ເພື່ອປານີປານອມ” ກຸ່ມປະເທດໃນອາຟຣິກາ ດ້ວຍການໃຫ້ອັດຕາສ່ວນຕົວແທນຈາກທະວີບແຫ່ງນີ້ໃນບອດບໍລິຫານຂອງໜ່ວຍງານແຕ່ລະແຫ່ງ.
ໃນປີ 2020 ກອງປະຊຸມສຸດຍອດຜູ້ນໍາກຸ່ມປະເທດເສດຖະກິດຂະໜາດໃຫຍ່ G20 ມີມະຕິຂະຫຍາຍໂຄງການພັກຊໍາລະໜີ້ໃຫ້ກຸ່ມປະເທດທຸກຍາກອອກໄປໃນປີ 2021 ເນື່ອງຈາກສະຖານະການການແພ່ລະບາດຂອງພະຍາດໂຄວິດ-19 ເຊິ່ງສ້າງແຮງກົດດັນຢ່າງໜັກໃຫ້ລະບົບເສດຖະກິດຂອງທຸກປະເທດ.
