ພັກລັດຖະບານເຢຍລະມັນຊະນະເລືອກຕັ້ງ
ຜົນເບື້ອງຕົ້ນການເລືອກຕັ້ງທົ່ວໄປຂອງເຢຍລະມັນ ທີ່ມີຂຶ້ນໃນວັນທີ 24 ກັນຍາ ປາກົດວ່າພັກສະພາບປະຊາທິປະໄຕຄຣິສຕຽນ (CDU) ຂອງທ່ານນາງ ອັງເກລາ ແມຣເຄິລ ຊະນະຕາມຄວາມຄາດໝາຍຂອງການສຳຫຼວດສ່ວນຫຼາຍ ສົ່ງຜົນໃຫ້ທ່ານໄດ້ຄອງຕຳແໜ່ງນາຍົກລັດຖະມົນຕີຕໍ່ໄປເປັນສະໄໝທີ 4, ຂະນະທີ່ພັກຂວາຈັດນະໂຍບາຍຕໍ່ຕ້ານຊາວມຸດສະລິມ ແລະ ຜູ້ອົບພະຍົບໄດ້ ສສ ເຂົ້າສູ່ລັດຖະສະພາເປັນເທື່ອທຳອິດ.
ສຳນັກຂ່າວ AFP, AP ແລະ ຣອຍເຕີ ລາຍງານຈາກນະຄອນຫຼວງແບກແລງ ປະເທດເຢຍລະມັນ ໃນວັນທີ 25 ກັນຍາວ່າ: ຜົນຄະແນນບໍ່ເປັນທາງການຂອງການເລືອກຕັ້ງທົ່ວໄປເຢຍລະມັນໃນວັນທີ 25 ກັນຍານີ້ ຊີ້ວ່າ: ທ່ານນາງ ອັງເກລາ ແມຣເຄິລ ຜູ້ນຳເຢຍລະມັນ ອາຍຸ 63 ປີ ຈະໄດ້ດຳລົງຕຳແໜ່ງນາຍົກລັດຖະມົນຕີຕໍ່ເປັນສະໄໝທີ 4 ຈາກໄຊຊະນະຂອງພັກສະຫະພາບປະຊາທິປະໄຕຄຣິສຕຽນ (CDU) ຂອງທ່ານນາງ ແມຣເຄິລ ແລະ ພັນທະມິດ. ພັກສະຫະພາບສັງຄົມນິຍົມຄຣິສຕຽນ (CDU/CSU) ເຊິ່ງໄດ້ 33%, ຕໍ່ມາແມ່ນພັກປະຊາທິປະໄຕສັງຄົມ (SDP) ຂອງທ່ານ ມາຣຕິນ ຊູລ ໄດ້ 21% ແລະ ເກີນຄາດຂອງທຸກຝ່າຍຄືພັກທາງເລືອກເຢຍລະມັນ (AFD) ກຸ່ມການເມືອງຝ່າຍຂວາຈັດ ເຊິ່ງໄດ້ສູງເຖິງ 13%.
ໄຊຊະນະຄັ້ງນີ້ຈະເຮັດໃຫ້ທ່ານນາງ ແມຣເຄິລ ເປັນຜູ້ນຳເຢຍລະມັນທີ່ມີອຳນາດຕໍ່ເນື່ອງທຽບເທົ່າທ່ານ ເຮລມຸດ ໂຄລ ທີ່ຢູ່ໃນຕຳແໜ່ງດົນທີ່ສຸດ 16 ປີ ເຮັດໃຫ້ພັກລັດຖະບານຕ້ອງເຈລະຈາກັບພັກປະຊາທິປະໄຕເສລີ (FDP) ເພື່ອຈັດຕັ້ງລັດຖະບານປະສົມ. ຂະນະດຽວກັນກໍຕ້ອງກຽມຜະເຊີນອຸປະສັກໃຫຍ່ ຄືກຸ່ມການເມືອງຂວາຈັດທີ່ຈະເຂົ້າມາມີບົດບາດໃນລັດຖະສະພາ.
