ເນັ້ນໃຫ້ ຂະແໜງແຮງງານ ແລະ ສະຫວັດດີການສັງຄົມ ເອົາໃຈໃສ່ປະຕິບັດວຽກງານໃຫ້ດີຂຶ້ນ

ວັນທີ 4 ຕຸລາ 2023, ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ-ສະຫວັດດີການສັງຄົມ (ຮສສ) ໄດ້ເນັ້ນໃຫ້ຂະແໜງ ຮສສ ແຂວງບໍລິຄຳໄຊ ເອົາໃຈໃສ່ເພີ່ມທະວີການຫັນປຽ່ນຢ່າງເລິກເຊິງຮອບດ້ານ, ໂປ່ງໃສແບບມືອາຊີບ, ເຕົ້າໂຮມຄວາມສາມັກຄີ, ປັບປຸງແບບແຜນວິທີການເຮັດວຽກ, ແກ້ໄຂບັນຫາທີ່ຄົງຄ້າງຢ່າງເປັນລະບົບ ເປັນຕົ້ນການຄຸ້ມຄອງແຮງງານພາຍໃນ ແລະ ຕ່າງປະເທດ ໃນການເຄື່ອນຍ້າຍແຮງງານຢ່າງຖືກຕ້ອງ ແລະ ໃຫ້ໄດ້ຮັບການປົກປ້ອງສິດຜົນປະໂຫຍດເປັນຢ່າງດີ, ວຽກງານສືມືແຮງງານ ເປັນໃຈກາງໃນການປະສານສົມທົບກັບພາກສ່ວນຕ່າງໆ ໂດຍຝຶກອົບຮົມວິຊາຊີບ ໃຫ້ແກ່ປະຊາຊົນແຮງງານລາວ ເຊັ່ນ: ການປູກ-ການລ້ຽງ ຜະລິດເປັນສິນຄ້າ, ການບໍລິການ ແລະ ການຄ້າຂາຍໃຫ້ເປັນສິນຄ້າປະຈຳທ້ອງຖິ່ນຕ່າງໆ ເພື່ອພັດທະນາວິຊາຊີບ ໃຫ້ປະຊາຊົນໄດ້ມີວຽກເຮັດງານທຳ ສ້າງລາຍຮັບເຂົ້າໃນຄອບຄົວ.

ພ້ອມນີ້ ວຽກງານປະກັນສຸຂະພາບກໍຄວນໃຫ້ເປັນລະບົບການບໍລິການເພື່ອອຳນວຍຄວາມສະດວກໃຫ້ຜູ້ປະກັນຕົນ ສິ່ງສຳຄັນ ຫັນການບໍລິການພາກລັດໄປສູ່ສັງຄົມ ຊຶ່ງຕ້ອງໄດ້ຄົ້ນຄວ້າ, ເຊື່ອມຊຶມ ບັນດານິຕິກຳຕ່າງໆ ຂອງຂະແໜງ ຮສສ ແລະ ຂອງແຂວງ ຕິດພັນກັບການກຳນົດແຜນຕຳແໜ່ງງານ, ບຳລຸງສ້າງ ພະນັກງານ ເພື່ອສ້າງບຸກຄະລາກອນໃຫເມີຄວາມຮູ້ ຄວາມສາມາດ ເພື່ອຮອງຮັບກັບວຽກງານໃນຂະແໜງການຂອງຕົນ ໃຫ້ດີຂຶ້ນເປັນກ້າວໆ.

ຂໍ້ມູນ: ຮສສ