ຊາຍ 44 ປີ ຫວັງມີເພດສຳພັນກັບຍິງ 75 ປີ ແຕ່ຝ່າຍຍິງຂັດຂຶນ ຈຶ່ງຖືກຄາຕະກຳ
ປກສ ແຂວງຫົວພັນ ລາຍງານວັນທີ 3 ຕຸລາ 2023: ທ້າວ ບາງພອນ ອາຍຸ 44 ປີ (ຜູ້ກໍ່ເຫດ) ແລະ ນາງ ຈາຍ ອາຍຸ 75 ປີ (ຜູ້ເສຍຊີວິດ) ທັງສອງຄົນຢູ່ ບ້ານ ແກ້ງພູນ ກຸ່ມນໍ້າຊ້າງ ເມືອງ ວຽງໄຊ ແຂວງ ຫົວພັນ, ເຊິ່ງໄລຍະຜ່ານມາພວກກ່ຽວສອງຄົນແມ່ນເຄີຍໄດ້ເສບສົມນຳກັນມາແລ້ວໜຶ່ງຄັ້ງ.
ວັນທີ 29 ກັນຍາຜ່ານມາ, ທ້າວ ບາງພອນ ໄດ້ດື່ມເຫລົ້ານຳໝູ່ຢູ່ບ້ານ, ຍ້ອນຄວາມມຶນເມົາ ແລະ ມີອາລົມທາງເພດ, ພໍຮອດເວລາປະມານ 21 ໂມງ, ຜູ້ກ່ຽວຈຶ່ງໄດ້ຍ່າງໄປຫາ ນາງ ຈາຍ ຢູ່ເຮືອນແຄມບ້ານ ຈຸດປະສົງເພື່ອໄປຂໍເສບສົມກັບ ນາງ ຈາຍ, ແຕ່ນາງ ຈາຍ ໄດ້ຂັດຂຶນບໍ່ຍິນຍອມ ແລະ ໄດ້ຕົບຕີ ທ້າວ ບາງພອນ 4 ບາດ, ຍ້ອນຄວາມໂມໂຫ ທ້າວ ບາງພອນ ຈຶ່ງໄດ້ຈັບເອົາສຽມ ຍາວປະມານ 1 ແມັດ ຕີໃສ່ໜ້າຂອງນາງ ຈາຍ 4 ບາດ, ເຮັດໃຫ້ນາງ ຈາຍ ລົ້ມລົງກັບພື້ນເຮືອນ ຈາກນັ້ນຜູ້ກໍ່ເຫດໄດ້ຈັບເອົາເອົາພ້າທີ່ວາງໄວ້ຢູ່ຂ້າງບ່ອນນອນ ມາຟັນໃສ່ຕີນ, ໃສ່ໜ້າ, ຄໍ, ງ່ອນຕໍ່ ຂອງນາງຈາຍ ອີກຫລາຍບາດ ເຮັດໃຫ້ ນາງ ຈາຍ ເສຍຊີວິດຄາທີ່, ສ່ວນຜູ້ກໍ່ເຫດ ໄດ້ຖິ້ມສຽມ ແລະ ພ້າ ລົງກ້ອງຕະລ່າງເຮືອນ ແລ້ວນອນຢູ່ຂ້າງສົບຂອງນາງ ຈາຍເຮັດແບບບໍ່ມີຫຍັງເກີດຂຶ້ນ.
ເມື່ອກອງຫຼອນ ແລະ ປກສ ບ້ານ ສັງເກດເຫັນເຮືອນຂອງນາງ ຈາຍ ຜິດປົກກະຕິ ຈຶ່ງໄດ້ເຂົ້າໄປກວດສອບເບິ່ງ ຈຶ່ງພົບເຫັນທ້າວ ບາງພອນ ນອນຢູ່ຂ້າງສົບຂອງນາງ ຈາຍຜູ້ເສຍຊີວິດ ຈຶ່ງໄດ້ກັກຕົວມາສອບຖາມ ທ້າວ ບາງພອນ ໄດ້ຮັບສາລະພາບວ່າ ຕົນເອງເປັນຄົນຄາຕະກຳນາງ ຈາຍ ແລະ ຍອມມອບຕົວກັບເຈົ້າໜ້າທີ່ ປກສ ບ້ານ.
ປັດຈຸບັນ ເຈົ້າໜ້າທີ່ກຳລັງ ສືບສວນ-ສອບສວນ ເກັບກຳຂໍ້ມູນ ຫລັກຖານ ເພື່ອດຳເນີນຄະດີຕາມລະບຽບກົດໝາຍ
