ທະນາຄານໂລກຮັກສາການຄາດຄະເນເສດຖະກິດກໍາປູເຈຍປີນີ້ເຕີບໃຫຍ່ 5,5%

ລາຍງານອັບເດດເສດຖະກິດອາຊີຕາເວັນອອກ ແລະ ປາຊີຟິກສະບັບຫລ້າສຸດຂອງທະນາຄານໂລກ (World Bank) ຍັງການຄາດຄະເນການເຕີບໃຫຍ່ທາງເສດຖະກິດຂອງກໍາປູເຈຍ ຢູ່ລະດັບ 5,5% ໃນປີ 2023 ແລະ ເພີ່ມຂຶ້ນເປັນ 6,1% ໃນປີ 2024 ໂດຍເສດຖະກິດຂອງກໍາປູເຈຍຂັບເຄື່ອນດ້ວຍການສົ່ງອອກເສື້ອຜ້າ, ການທ່ອງທ່ຽວ, ກະສິກໍາ, ການກໍ່ສ້າງ ແລະ ອະສັງຫາລິມະສັບ.

ວັນທີ 3 ຕຸລາ, ສໍານັກຂ່າວຊິນຮົວລາຍງານວ່າ: ລາຍງານຂອງທະນາຄານໂລກລະບຸວ່າ: ທ່າອ່ຽງທາງເສດຖະກິດຂອງກໍາປູເຈຍຍັງເປັນໄປໃນທາງບວກ ສ່ວນຫລາຍໄດ້ຮັບແຮງກະຕຸ້ນຈາກການຟື້ນຕົວຂອງຂະແໜງບໍລິໂພກ ໂດຍສະເພາະການທ່ອງທ່ຽວ ແລະ ການພັດທະນາດ້ານການຜະລິດກະສິກໍາ.

ທັງນີ້, ທະນາຄານໂລກຄາດຄະເນວ່າ: ເສດຖະກິດຂອງກໍາປູເຈຍຈະພັດທະນາຕໍ່ໄປ ໂດຍຂະຫຍາຍໃນລະດັບ 6,1% ໃນປີໜ້າ ໂດຍການສົ່ງອອກສິນຄ້າຈະມີການປັບປຸງ ແລະ ຫລາກຫລາຍຂຶ້ນແບບຄ່ອຍເປັນຄ່ອຍໄປ.

ຂະນະດຽວກັນ, ກະແສການລົງທຶນໂດຍກົງຈາກຕ່າງປະເທດ ມີທ່າອ່ຽງໄດ້ຮັບການກະຕຸ້ນໂດຍກົດໝາຍໃໝ່ວ່າດ້ວຍການລົງທຶນ ແລະ ຂໍ້ຕົກລົງການຄ້າເສລີ ເຊິ່ງມີການໃຫ້ສັດຕະຍາບັນເມື່ອບໍ່ດົນມານີ້.