UNSC ອະນຸມັດກອງກໍາລັງປະສົມນາໆຊາດ ຊ່ວຍເຮຕິປາບອາດຊະຍາກໍາ
ສະພາຄວາມໝັ້ນຄົງແຫ່ງສະຫະປະຊາຊາດ ອະນຸມັດການຈັດຕັ້ງກອງກໍາລັງປະສົມນາໆຊາດ ເພື່ອສະໜັບສະໜູນພາລະກິດດ້ານຄວາມໝັ້ນຄົງຂອງເຮຕິແກ້ໄຂບັນຫາອາດຊະຍາກໍາພາຍໃນປະເທດ.
ວັນທີ 3 ຕຸລາ, ສໍານັກຂ່າວຕ່າງປະເທດລາຍງານວ່າ: ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ມີມະຕິສຽງສ່ວນຫລາຍ 13 ສຽງ ຮັບຮອງກອງກໍາລັງປະສົມນາໆຊາດ ນໍາໂດຍເກນຢາ ເພື່ອສະໜັບສະໜູນພາລະກິດຂອງເຈົ້າໜ້າທີ່ຝ່າຍຄວາມໝັ້ນຄົງຂອງເຮຕິໃນການປາບປາມແກ້ງອາດຊະຍາກໍາ.
ທັງນີ້, ກອງກໍາລັງປະສົມດັ່ງກ່າວ “ເຊິ່ງບໍ່ແມ່ນກອງກໍາລັງ UN ຢ່າງເປັນທາງການ”, ແຕ່ເປັນ “ການມີປະເທດໜຶ່ງເປັນຫົວເຮືອໃຫຍ່ໃນການປະສານງານນໍາລັດຖະບານເຮຕິ” ຈະປະຕິບັດໜ້າທີ່ຢ່າງໜ້ອຍ 1 ປີ ໂດຍລະຫວ່າງນັ້ນຈະມີການປະເມີນສະຖານະການຫລັງຄົບ 9 ເດືອນ ວ່າສົມຄວນຂະຫຍາຍໄລຍະເວລາປະຈໍາການ ຫລື ບໍ່.
ສ່ວນຈີນ ແລະ ຣັດເຊຍ ເຊິ່ງເປັນສະມາຊິກຖາວອນຂອງ UNSC ງົດອອກສຽງ ໂດຍໃຫ້ເຫດຜົນກ່ຽວກັບ “ສະຖຽນລະພາບການເມືອງພາຍໃນ” ຂອງເຮຕິ ແລະ ຕັ້ງຂໍ້ສັງເກດກ່ຽວກັບ “ເຈດຕະນາ” ຂອງອາເມລິກາ ທັງທີ່ຍັງບໍ່ສາມາດຄວບຄຸມບັນຫາອາດຊະຍາກໍາໃນລັດຟໍຣິດາ ເຊິ່ງມີພົນລະເມືອງເຊື້ອສາຍແຄຣິບບຽນອາໄສຢູ່ຫລາຍ.
ຂະນະທີ່ຂໍ້ມູນໂດຍສໍານັກງານຂ້າຫລວງໃຫຍ່ເພື່ອສິດທິມະນຸດແຫ່ງສະຫະປະຊາຊາດ (OHCAR) ບັນທຶກສະຖິຕິການເກີດອາດຊະຍາກໍາຢູ່ເຮຕິເກືອບ 2.800 ຄະດີ ລະຫວ່າງເດືອນຕຸລາປີຜ່ານມາຫາເດືອນມິຖຸນາປີນີ້ ແລະ ມີຜູ້ເສຍຊີວິດເປັນເດັກຢ່າງໜ້ອຍ 80 ຄົນ.
ປັດຈຸບັນ ເຮຕິມີປະຊາກອນປະມານ 5,2 ລ້ານຄົນ ເປັນປະເທດທີ່ຂາດສະຖຽນລະພາບທຸກດ້ານ ນັບແຕ່ເກີດແຜ່ນດິນໄຫວຄັ້ງໃຫຍ່ໃນປີ 2010 ສົ່ງຜົນເຮັດໃຫ້ມີຜູ້ເສຍຊີວິດຫລາຍກວ່າ 100.000 ຄົນ.
ເຖິງຢ່າງໃດກໍຕາມ, ສະຖານະການຍິ່ງທະວີຄວາມຮຸນແຮງ ເມື່ອເກີດເຫດກຸ່ມທະຫານຮັບຈ້າງຊາວໂຄລອມເບຍບຸກກໍ່ເຫດສັງຫານປະທານາທິບໍດີ ໂຊເວເນລ ໂມອິສ ຢູ່ເຮືອນ ໃນນະຄອນຫລວງປໍໂຕແປງ ປີ 2021 ສົ່ງຜົນເຮັດໃຫ້ເກີດຄວາມວຸ້ນວາຍທາງການເມືອງ ແລະ ເປີດໂອກາດໃຫ້ບັນດາແກ້ງອາດຊະຍາກໍາກ້າວຂຶ້ນມາມີອິດທິພົນ.
