ເລັ່ງຈັດສັນຄວາມເປັນລະບຽບຮຽບຮ້ອຍຕາມ 5 ເສັ້ນທາງຫລັກ ຢູ່ເມືອງໄຊທານີ ໂດຍສະເພາະ ລົດແກ່ໝາກໄມ້, ຜັກ ມາຂາຍຢູ່ຕາມແຄມທາງ
ທ່ານ ໜູກີ ສີຫາລາດ, ຮັກສາການເຈົ້າເມືອງໄຊທານີ ນະຄອນຫລວງວຽງຈັນ ລາຍງານ ໃນວັນທີ 30 ກັນຍາ 2023 ວ່າ: ອົງການປົກຄອງເມືອງໄຊທານີ ໄດ້ອອກແຈ້ງການກ່ຽວກັບການຈັດສັນຄວາມເປັນລະບຽບຮຽບຮ້ອຍຫາ 104 ບ້ານ ພາຍໃນເມືອງໄດ້ຮັບຮູ້, ຈາກນັ້ນ ໄດ້ສຸມໃສ່ຈັດຕັ້ງປະຕິບັດວຽກງານຕົວຈິງ ໂດຍໄດ້ແຕ່ງຕັ້ງຄະນະຮັບຜິດຊອບຢ່າງລະອຽດ, ໃນນີ້ ວຽກຈັດສັນທີ່ໄດ້ຈັດຕັ້ງປະຕິບັດເລີ່ມຈາກການກວດກາບັນດາຊາວຄ້າຂາຍທີ່ນໍາໃຊ້ລົດແກ່ໝາກໄມ້, ຜັກ ຫລື ສັດຊະນິດຕ່າງໆ ມາຂາຍຢູ່ຕາມແຄມທາງ ໂດຍໄດ້ມີການກ່າວເຕືອນ ແລະ ເຮັດບົດບັນທຶກຮ່ວມກັນ, ໄດ້ສົມທົບກັບອົງການຈັດຕັ້ງບ້ານ ແລະ ກຸ່ມເພື່ອເຄື່ອນໄຫວຈັດສັນ ໂດຍສະເພາະບັນດາຮ້ານທີ່ປຸກກວມເອົາທາງຄົນຍ່າງຕາມແຄມທາງ ໂດຍໄດ້ເຮັດບົດບັນທຶກ ແລະ ໃຫ້ເຈົ້າຂອງກິດຈະການມ້າງ ແລະ ຍົກຍ້າຍອອກ. ນອກຈາກນີ້, ໄດ້ກວດ ກາປ້າຍບໍ່ຖືກຕ້ອງ ໂດຍສະເພາະປ້າຍທີ່ຂຽນໜັງສືບໍ່ຖືກຕ້ອງຕາມວັດທະນະທໍາລາວ, ລວມເຖິງຮື້ຖອນປ້າຍທີ່ບໍ່ຈົບງາມອອກ.
ນອກນັ້ນ, ທ່ານຍັງກ່າວຕື່ມວ່າ: ການຈັດຕັ້ງປະຕິບັດວຽກງານຕົວຈິງ ລວມມີ 5 ບາດກ້າວ ຫລື 5 ແຜນວຽກ ຄື: ບາດກ້າວທີໜຶ່ງ ໄດ້ຈັັດຕັ້ງປະຕິບັດແລ້ວໂດຍເລີ່ມຈາກການກວດກາແຕ່ວົງວຽນດອນໜູນໄປຮອດຂົວທ່າງ່ອນ. ຜ່ານການຈັດຕັ້ງປະຕິບັດເຫັນວ່າ ທັງຊາວຄ້າຂາຍ ແລະ ຜູ້ມາຊື້ສິນຄ້າຍັງບໍ່ທັນເຂົ້າໃຈຕໍ່ລະບຽບກົດໝາຍທີ່ຂັ້ນເທິງວາງອອກ, ຢ່າງໃດກໍຕາມ ຫລັງຈາກຈັດຕັ້ງປະຕິບັດວຽກງານໃນບາດກ້າວທີໜຶ່ງເຫັນວ່າສະພາບຄວາມເປັນລະບຽບຮຽບຮ້ອຍພາຍໃນເສັ້ນທາງດັ່ງກ່າວດີຂຶ້ນກວ່າເກົ່າ, ແລະ ອົງການປົກຄອງເມືອງໄດ້ມອບໃຫ້ອົງການປົກຄອງບ້ານ ແລະ ກຸ່ມບ້ານສືບຕໍ່ຕິດຕາມບັນດາຊາວຄ້າຂາຍທີ່ໄດ້ເຮັດບົດບັນທຶກຮ່ວມກັນ ເພື່ອບໍ່ໃຫ້ເຂົາເຈົ້າຂາຍເຄື່ອງແບບບໍ່ຖືກຕ້ອງຕາມແຄມທາງອີກ, ແຕ່ຖ້າບໍ່ປະຕິບັດໃຫ້ນໍາໃຊ້ມາດຕະການປັບໃໝຕາມລະບຽບກົດໝາຍ.
ສ່ວນບາດກ້າວທີສອງ ແມ່ນຈາກວົງວຽນດອນໜູນຫາຫໍປະຊຸມແຫ່ງຊາດ, ບາດກ້າວທີສາມ ແຕ່ສີ່ແຍກໄຟແດງດົງໂດກໄປຕາມເສັ້ນທາງ 450 ປີ ຫາເຂດເຊື່ອມຕໍ່ກັບເມືອງໄຊເສດຖາ, ບາດກ້າວທີ 4 ແຕ່ສີ່ແຍກໄຟແດງດົງໂດກຫາໜອງພະຍາ ແລະ ບາດກ້າວທີຫ້າ ແຕ່ວົງວຽນດອນໜູນໄປຕາມເສັ້ນທາງເລກທີ 13 ໃຕ້ຈົນຮອດເຂດຕໍ່ໃສ່ເມືອງປາກງື່ມ ໂດຍຈະສືບຕໍ່ຈັດຕັ້ງປະຕິບັດໃຫ້ສໍາເລັດພາຍໃນທ້າຍປີນີ້, ເຊິ່ງການຈັດຕັ້ງປະຕິບັດວຽກງານຕົວຈິງຈະມີຄວາມຫຍຸ້ງຍາກຫລາຍສົມຄວນ ໂດຍສະເພາະການຈັດສັນຄວາມເປັນລະບຽບຮຽບຮ້ອຍແຕ່ສີ່ແຍກໄຟແດງດົງໂດກ ຫາ ໜອງພະຍາ ແລະ ແຕ່ວົງວຽນດອນໜູນໄປຕາມເສັ້ນທາງເລກທີ 13 ໃຕ້ຈົນຮອດເຂດຕໍ່ໃສ່ເມືອງປາກງື່ມ ເພາະມີການຂາຍເຄື່ອງເປັນຈໍານວນຫລາຍ.
ຢ່າງໃດກໍຕາມ, ທ່ານໄດ້ຮຽກຮ້ອງໃຫ້ຊາວຄ້າຂາຍ ກໍຄື ຜູ້ຊື້ສິນຄ້າພາຍໃນ 5 ເສັ້ນທາງຫຼັກ ຈົ່ງໃຫ້ການຮ່ວມມືແກ່ເຈົ້າໜ້າທີ່ກ່ຽວຂ້ອງທີ່ເຄື່ອນໄຫວກວດກາຢ່າງເຕັມທີ່, ທັ້ງນີ້ກໍເພື່ອຄວາມເປັນລະບຽບຮຽບຮ້ອຍ ແລະ ເຮັດໃຫ້ການສັນຈອນໄປ-ມາມີຄວາມສະດວກສະບາຍກວ່າເກົ່າ.
