ລັດນິວຢອກປະກາດສະຖານະການສຸກເສີນ ຝົນຕົກໜັກ-ນ້ຳຖ້ວມ

ທາງການລັດນິວຢອກຂອງອາເມລິກາປະກາດສະຖານະການສຸກເສີນ ເນື່ອງຈາກເກີດນໍ້າຖ້ວມກະທັນຫັນຈາກຝົນຕົກໜັກ.

ວັນທີ 30 ກັນຍາ, ສໍານັກຂ່າວຕ່າງປະເທດລາຍງານວ່າ: ນາງ ເຄທີ ໂຮຊຸລ ເຈົ້າຄອງລັດນິວຢອກ ປະກາດສະຖານະການສຸກເສີນຄວບຄຸມນະຄອນນິວຢອກ ເຊິ່ງເປັນເມືອງໃຫຍ່ທີ່ສຸດ ແລະ ພື້ນທີ່ໃກ້ຄຽງບາງສ່ວນ ເນື່ອງຈາກນໍ້າຖ້ວມກະທັນຫັນ ໂດຍເປັນຜົນມາຈາກຝົນທີ່ຕົກຢ່າງໜັກ ເຮັດໃຫ້ຫລາຍພື້ນທີ່ມີປະລິມານນໍ້າຝົນສະສົມສູງປະມານ 20 ຊັງຕີແມັດ ສົ່ງຜົນກະທົບຢ່າງໜັກຕໍ່ການຈະລາຈອນ ແລະ ການດໍາລົງຊີວິດຂອງປະຊາຊົນ.

ເບື້ອງຕົ້ນຍັງບໍ່ມີລາຍງານຜູ້ເສຍຊີວິດ ຫລື ຜູ້ໄດ້ຮັບບາດເຈັບ. ຂະນະທີ່ຂໍ້ມູນຈາກກົມອຸຕຸນິຍົມວິທະຍາແຫ່ງຊາດຂອງອາເມລິກາ (NWS) ລະບຸວ່າ: ລັດນິວຢອກມີປະລິມານນໍ້າຝົນສະສົມຫລາຍກວ່າ 35 ຊັງຕີແມັດແລ້ວ ນັບແຕ່ຕົ້ນເດືອນນີ້ ເປັນສະຖິຕິສູງທີ່ສຸດນັບແຕ່ປີ 1882.