ຮັບຈ້າງຂົນສົ່ງຢາບ້າ 243.000 ເມັດ ມາແຕ່ແຂວງບໍ່ແກ້ວ ຍັງບໍ່ຮອດປາຍທາງ ຖືກເຈົ້າໜ້າທີ່ກັກຕົວກ່ອນ
ປກສ ແຂວງວຽງຈັນລາຍງານວັນທີ 29 ກັນຍາ 2023 ນີ້ວ່າ: ມີພົນລະເມືອງດີແຈ້ງຕໍ່ເຈົ້າໜ້າທີ່ຕໍາຫລວດວ່າ ມີລົດຂົນສົ່ງສິນຄ້າມາຈອດປະໄວ້ຢູ່ແຄມທາງເຂດບ້ານຖໍ້າໃຕ້ ເມືອງກາສີ ຈາກນັ້ນເຈົ້າໜ້າທີ່ຕໍາຫລວດ ຈຶ່ງລົງກວດກາຢູ່ສະຖານທີ່ ພ້ອມທັງກວດກາລົດຄັນດັ່ງກ່າວ ຈຶ່ງຮູ້ວ່າແມ່ນ ຂອງ ທ້າວ ຄຳສອນ ອາຍຸ 38 ປີ, ອາຊີບກຳມະກອນ ຢູ່ບ້ານ ທົ່ງແສງຈັນ ເມືອງຫ້ວຍຊາຍ ແຂວງບໍ່ແກ້ວ ແລະພົບເຫັນຢາບ້າຈຳນວນ 1 ເປົາ ເທົ່າກັບ 243.800 ເມັດ ຊຸກເຊື່ອງຢູ່ໃນລົດຄັນດັ່ງກ່າວ, ເຈົ້າໜ້າທີ່ຈຶ່ງໄດ້ກັກຕົວ ຜູ້ກ່ຽວ ພ້ອມດ້ວຍລົດຂົນສົ່ງ ແລະ ຢາບ້າຈຳນວນນີ້ ມາສືບສວນ – ສອບສວນຕາມຂັ້ນຕອນຂອງກົດໝາຍ.
ຜ່ານການສືບສວນ-ສອບສວນ ທ້າວ ຄຳສອນ ໃຫ້ການຮັບສາລະພາບວ່າ: ຢາບ້າຈຳນວນ 243.800 ເມັດ ແມ່ນຜູ້ກ່ຽວໄດ້ຮັບຂົນສົ່ງແທ້ ຈຸດປະສົງແມ່ນຈະໄປສົ່ງໃຫ້ພໍ່ຄ້າຢູ່ສະຖານນີທາງດ່ວນບ້ານນາຊອນ ເມືອງນາຊາຍທອງ ນະຄອນຫລວງ ໂດຍໄດ້ຮັບຄ້າຈ້າງ 20.000 ບາດ, ຜູ້ກ່ຽວໄດ້ ຂັບລົດຂົນສົ່ງສິນຄ້າ ທີ່ມີຢາບ້າຈຳນວນ 20 ເປົາ ອອກຈາກບ້ານໃໝ່ພູຄໍາ ເມືອງຫ້ວຍຊາຍ ແຂວງບໍ່ແກ້ວ ແຕ່ ວັນທີ 18 ສິງຫາ 2023 ພໍຂັບຂີ່ລົດມາຮອດເສັ້ນທາງຂອບເຂດບ້ານດັ່ງກ່າວ ຈຶ່ງຖືກເຈົ້າໜ້າທີ່ກັກຕົວ
ປັດຈຸບັນເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕຳຫຼວດ ປກສ ແຂວງວຽງຈັນ ພວມດໍາເນີນການສືບສວນ-ສອບສວນຜູ້ກ່ຽວ ເພື່ອຂະຫຍາຍຜົນຫາກຸ່ມແກ້ງ ເຄືອຂ່າຍ ແລະ ຜູ້ຮ່ວມຂະບວນການມາລົງໂທດຕາມລະບຽບກົດໝາຍ.
