ການເຮັດສັນຍາໃຫ້ຄົນຕ່າງປະເທດ ພັກເຊົາ, ເຊົ່າເຮືອນ, ຫ້ອງແຖວ ຢູ່ແຂວງອຸດົມໄຊ ຕ້ອງຜ່ານອົງການປົກຄອງບ້ານ, ເຈົ້າໜ້າທີ່ຕຳຫລວດຄຸ້ມຄອງຄົນຕ່າງປະເທດ

ວັນທີ 25 ກັນຍາ 2023, ກອງບັນຊາການ ປກສ ແຂວງອຸດົມໄຊ ອອກແຈ້ງການ ເລື່ອງ: ເປັນເຈົ້າການສະກັດກັ້ນສະພາບປາກົດການຫຍໍ້ທໍ້ໃນສັງຄົມ ແລະ ການເຮັດສັນຍາ ຫລື ອະນຸຍາດໃຫ້ຄົນຕ່າງປະເທດເຊົ່າເຮືອນ,ຫ້ອງແຖວ ແລະ ສະຖານທີ່ຕ່າງໆຂອງພົນລະເມືອງລາວ.

ປັດຈຸບັນ ມີສະພາບປາກົດການຫຍໍ້ທໍ້ຕ່າງໆ ໃນສັງຄົມ ເປັນຕົ້ນ ການມາພັກເຊົາ, ສັນຍາເຊົ່າເຮືອນ, ຫ້ອງແຖວ, ສະຖານທີ່ຕ່າງໆ ຂອງປະຊາຊົນລາວ ແບບບໍ່ຖືກຕ້ອງ ແລະ ສົມທົບກັບກຸ່ມຄົນບໍ່ດີຈໍານວນໜຶ່ງ ຢູ່ ແຂວງອຸດົມໄຊ ເຄື່ອນໄຫວກະທໍາຜິດ ເຊັ່ນ: ການຄ້າມະນຸດ, ຄ້າຂາຍໂສເພນີ, ລັກແຕ່ງດອງ, ມາລີ້ຊ່ອນ, ລັກປະກອບອາຊີບ, ນໍາໃຊ້ແຮງງານບໍ່ຖືກຕ້ອງ ແລະ ກະທໍາຜິດອື່ນໆ ທີ່ເປັນການລະເມີດລະບຽບ ກົດຫມາຍ ຂອງ ສປປ ລາວ;

ບັນຫາພົ້ນເດັ່ນແມ່ນ ການຕົວະຍົວະ-ຫຼອກລວງ ຊາວໜຸ່ມ-ແມ່ຍິງລາວ ບໍ່ເຖິງກະສຽນອາຍຸ 18 ປີ ເພື່ອເຂົ້າຮ່ວມ ຖ່າຍຮູບພາບ-ສ້າງເປັນຄິບວີດີໂອ ແລ້ວເຜີຍແຜ່ ເຊິ່ງມີຫລາຍເນື້ອຫາ ເຊັ່ນ: ການສະເໜີກ່ຽວກັບການຊອກວຽກເຮັດງານທໍາ, ການສ້າງຄອບຄົວ, ສະແດງເຕັ້ນໂຊໄລສົດໂປ້ເປືອຍ ແລະ ຮ່ວມເພດສໍາພັນຕາມສະຖານທີ່ຕ່າງໆ ຜ່ານສື່ອອນລາຍ (ແອັບ,ຕິກຕ໋ອກ TiKToK, ຢູ່ທູບ YouTube, ເຟດບຸກ Facebook, ລາຍ Line…) ເພື່ອແລກຍອດວີວ, ແລກເງິນ, ຊື້ເຄື່ອງມີຄ່າໃຫ້, ແຈກເງິນໃຫ້ຍິງສາວ ແລະ ເດັກຍິງລາວ ຢູ່ຕາມເຂດຕົວເມືອງ, ຊານເມືອງ, ຊົນນະບົດ ແລະ ມີຫລາຍຄິບວີດີໂອ ທີ່ມີ ລັກສະນະ ແຕະຕ້ອງເຖິງກຽດສັກສີ, ຮີດຄອງປະເພນີ, ວັດທະນະທໍາ ອັນດີງາມ ຂອງຊາດ ແລະ ປະຊາຊົນລາວບັນດາເຜົ່າ.

ສະນັ້ນ, ການເຮັດສັນຍາໃຫ້ຄົນຕ່າງປະເທດ ພັກເຊົາ, ເຊົ່າເຮືອນ, ຫ້ອງແຖວ, ສະຖານທີ່ຕ່າງໆ ຕ້ອງຜ່ານອົງການປົກຄອງບ້ານ, ເຈົ້າໜ້າທີ່ຕໍາຫຼວດຄຸ້ມຄອງຄົນຕ່າງປະເທດ ປກສ ແຂວງ, ປກສ ກຸ່ມບ້ານ ແລະ ຂະແໜງການທີ່ກ່ຽວຂ້ອງ ໃຫ້ຖືກຕ້ອງຕາມ ລະບຽບ, ກົດໝາຍ ຂອງ ສປປ ລາວ ເພື່ອຮັບປະກັນເຮັດໃຫ້ແຂວງອຸດົມໄຊ ມີຄວາມສະຫງົບ, ເປັນລະບຽບຮຽບຮ້ອຍ, ປອດໄພ ແລະ ບັນຫາປາກົດການຫຍໍ້ທໍ້ຕ່າງໆ ຫລຸດລົງເທື່ອລະກ້າວ.

ເພື່ອເຮັດໃຫ້ ບັນຫາປາກົດການຫຍໍ້ທໍ້ ຫລຸດລົງເທື່ອລະກ້າວ