ຊີ້ນຳໃຫ້ເມືອງສີສັດຕະນາກ ປັບປຸງສ້ອມແປງເສັ້ນທາງສາຍຫລັກ ແລະ ແກ້ໄຂຄວາມບໍ່ເປັນລະບຽບຮຽບຮ້ອຍ

ວັນທີ 27 ກັນຍາ 2023, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ (ນວ) ລົງພົບປະເຮັດວຽກຊຸກຍູ້ແຜນພັດທະນາເສດຖະກິດ-ສັງຄົມ ຢູ່ເມືອງສີສັດຕະນາກ ນວ, ໂດຍ ໄດ້ໂອ້ລົມ ແລະ ໃຫ້ທິດຊີ້ນຳ ອົງການປົກຄອງເມືອງ ເອົາໃຈໃສ່ນຳພາ-ຊີ້ນຳວຽກງານແຕ່ລະດ້ານໃຫ້ໄດ້ຮັບໝາກຜົນຕົວຈິງ, ເປັນຕົ້ນການສ້າງເມືອງໃຫ້ເຂັ້ມແຂງ ແລະ ກຸ້ມຕົນເອງທາງດ້ານງົບປະມານ, ໃຫ້ມີກົນໄກການດຳເນີນງານທີ່ເປັນເອກະພາບລວມສູນ ແລະ ມີການວາງແຜນຄັກແນ່ ຫລື ອາດຈະເຮັດທົດລອງຈຸດໃດຈຸດໜຶ່ງກ່ອນ ເພື່ອເຮັດແນວໃດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດເປັນຮູບປະທຳ ພ້ອມທັງເນັ້ນໃຫ້ເອົາໃຈໃສ່ສືບຕໍ່ປະຕິບັດແຜນການປັບປຸງສ້ອມແປງເສັ້ນທາງສາຍຫລັກ ຂອງເມືອງໃຫ້ສຳເລັດ, ສຸມໃສ່ແກ້ໄຂບັນຫາຄວາມບໍ່ເປັນລະບຽບຮຽບຮ້ອຍພາຍໃນເມືອງ ແລະ ປະຕິບັດຕາມລະບຽບຢ່າງເຂັ້ມງວດ, ໃຫ້ດຳເນີນໄປຕາມມາດຕະການ, ຂັ້ນຕອນ ແລະ ຜ່ານຄະນະກຳມະການກວດກາຄັກແນ່ ແລະ ເປັນເອກະພາບ ເພື່ອລີກລ່ຽງຫາງສຽງຈົ່ມວ່າຂອງສັງຄົມ, ສືບຕໍ່ເອົາໃຈໃສ່ຈັດຕັ້ງຜັນຂະຫຍາຍ 2 ວາລະແຫ່ງຊາດ ໂດຍສະເພາະວຽກງານກໍ່ສ້າງຮາກຖານການເມືອງພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານ 3 ສ້າງໃຫ້ເຂົ້າສູ່ລວງເລິກ ແລະ ທົ່ວເຖິງທຸກເປົ້າໝາຍ.

ສຳລັບທິດທາງແຜນພັດທະນາເສດຖະກິດ-ສັງຄົມ 3 ເດືອນສຸດທ້າຍຂອງປີ 2023, ເມືອງສີສັດຕະນາກ ຈະສືບຕໍ່ສູ້ຊົນຈັດເກັບລາຍຮັບເຂົ້າງົບປະມານຕາມແຜນໃຫ້ໄດ້ 74 ຕື້ກີບ, ສຸມໃສ່ກວດກາບັນຊີແບບຄົບຊຸດ ແລະ ກວດກາແບບໄວໃຫ້ສຳເລັດ, ພ້ອມລົງຊຸກຍູ້ຫົວໜ່ວຍທີ່ບໍ່ມາແຈ້ງການເສຍພາສີທີ່ດິນ, ຄ່າທຳນຽມທາງ ແລະ ລາຍຮັບວິຊາການໃຫ້ໄດ້ຕາມແຜນ, ສືບຕໍ່ຈັດສັນຄວາມບໍ່ເປັນລະບຽບຮຽບຮ້ອຍຕາມ 5 ເສັ້ນທາງຫລັກຂອງເມືອງເຊັ່ນ: ເສັ້ນທາງລາວ-ໄທ, ທ່າເດື່ອ, ໜອງບອນ, ຖະໜົນເຈົ້າຟ້າງຸ່ມ-ແຄມຂອງ, ຖະໜົນກຳແພງເມືອງ, ສືບຕໍ່ປະຕິບັດແຜນການສ້ອມແປງເສັ້ນທາງສຸກເສີນຂອງເມືອງ 11 ເສັ້ນມູນຄ່າ 4,17 ຕື້ກີບ ແລະ ອື່ນໆໃຫ້ສຳເລັດຕາມແຜນການທີ່ວາງໄວ້.