ອັດຕະປື – ຊຽງແຕງ ສືບຕໍ່ຮ່ວມມືກັນໃນຫລາຍຂົງເຂດ ໂດຍສະເພາະ ການສະກັດກັ້ນ ແລະ ປາບປາມຢາເສບຕິດຕາມ ບໍລິເວນຊາຍແດນ

ກອງປະຊຸມຮອບວຽນ ຄັ້ງທີ VI ກ່ຽວກັບການສາຍພົວພັນ ແລະ ການຮ່ວມມືຮອບດ້ານ ລະຫວ່າງ ແຂວງ ອັດຕະປື ແຫ່ງ ສປປ ລາວ ກັບແຂວງ ຊຽງແຕງ ແຫ່ງ ລາຊະອານາຈັກກຳປູເຈຍ ໃນວັນທີ 26 ກັນຍາ 2023 ທີ່ແຂວງ ອັດຕະປື.

ໃນກອງປະຊຸມທັງສອງຝ່າຍ,ໄດ້ທົບທວນຄືນຜົນການຮ່ວມມືໄລຍະຜ່ານມາທີ່ທັງສອງແຂວງໄດ້ມີການພົວພັນຮ່ວມມືກັນຕະຫລອດມາ, ມີຫລາຍວຽກງານໄດ້ຮັບຜົນສຳເລັດທີ່ເປັນຮູບປະທຳຕົວຈິງຫລາຍດ້ານ ເຮັດໃຫ້ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອຖານບ້ານໃກ້ເຮືອນຄຽງ, ບ້ານແກ່ວເມືອງດອງ ທີ່ມີມາແຕ່ດົນນານ ລະຫວ່າງ ປະຊາຊົນສອງຊາດລາວ – ກໍາປູເຈຍ ນັບມື້ນັບໄດ້ຮັບການເສີມຂະຫຍາຍ ໃຫ້ແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ.

ທັງສອງຝ່າຍ ເຫັນດີເປັນເອກະພາບກັນລົງນາມໃນບົດບັນທຶກ,ໂດຍຈະສືບຕໍ່ຊຸກຍູ້,ຮັດແໜ້ນ ແລະ ເສີມຂະຫຍາຍສາຍພົວພັນການຮ່ວມມື ລະຫວ່າງສອງແຂວງ, ໃຫ້ນັບມື້ດີຂຶ້ນເລື້ອຍໆ, ເຫັນດີເປັນເອກະພາບປະຕິບັດການຮ່ວມມືວຽກງານປ້ອງກັນຄວາມສະຫງົບເຂດບໍລິເວນຊາຍແດນ, ຮ່ວມມືກັນສະກັດກັ້ນ ແລະ ປາບປາມຢາເສບຕິດຕາມຂອບເຂດບໍລິເວນຊາຍແດນ, ຮ່ວມມືຈັດຕັ້ງອໍານວຍຄວາມສະດວກວຽກງານຕາມບໍລິເວນຊາຍແດນ ແລະ ການເຂົ້າ-ອອກເມືອງ,ຮ່ວມມືດ້ານເສດຖະກິດ-ສັງຄົມ,ວຽກງານກະສິກຳ-ປ່າໄມ້, ການປະມົງ ແລະ ສິ່ງແວດລ້ອມ,ວຽກງານອຸຕຸນິຍົມ, ວຽກງານຄົມມະນາຄົມແລະຂົນສົ່ງ, ວຽກງານອຸດສະຫະກຳ ແລະ ການຄ້າ, ວຽກງານວັດທະນະທຳ-ສັງຄົມ, ວຽກງານຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ດ້ານວຽກງານສຶກສາທິການ ແລະ ກິລາ, ດ້ານວຽກງານຊາວໝຸ່ມ ແລະ ສະຫະພັນແມ່ຍິງ, ດ້ານວຽກງານສາທາລະນະສຸກ ແລະ ວຽກງານອື່ນໆ.,

ກອງປະຊຸມຄັ້ງນີ້ ຄະນະຜູ້ແທນ ແຂວງ ອັດຕະປື ນຳໂດຍ ທ່ານ ເລັດ ໄຊຍະພອນ ເຈົ້າແຂວງ ອັດຕະປື, ຄະນະຜູ້ແທນ ແຂວງຊຽງແຕງ ຣາຊະອານາຈັກກຳປູເຈຍ ນຳໂດຍທ່ານ ສະຫວ່າຍ ຊ່ອມອຽງ ເຈົ້າແຂວງ ຊຽງແຕງ ຣາຊະອານາຈັກກຳປູເຈຍ ພ້ອມຄະນະຜູ້ແທນທັງສອງແຂວງເຂົ້າຮ່ວມ.