ເປີດຂາຍແລ້ວ!! ສິນຄ້າອຸປະໂພກ-ບໍລິໂພກ ຫລຸດລາຄາ ຢູ່ 5 ເມືອງໃນ ນະຄອນຫລວງ

ວັນທີ 26 ກັນຍາ 2023, ກົມການຄ້າພາຍໃນ ກະຊວງອຸດສາຫະກໍາ ແລະ ການຄ້າ ຮ່ວມກັບ ບັນດາຫົວໜ່ວຍທຸລະກິດຄ້າຂາຍ ເປີດກິດຈະກໍາຂາຍສິນຄ້າອຸປະໂພກ-ບໍລິໂພກຫລຸດລາຄາ ຢູ່ນະ ຄອນຫລວງວຽງຈັນ (ນວ) ຕາມນະໂຍບາຍຂອງຄະນະ 19/ກມສພ ເປັນເວລາ 5 ວັນ ເລີ່ມແຕ່ວັນທີ 26-30 ກັນຍາ 2023 ນີ້, ໂດຍການເຂົ້າຮ່ວມ ຂອງທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ນີ້ເພື່ແກ້ໄຂສະພາບເຄັ່ງຮ້ອນ ໃນປັດຈຸບັນ ກໍຄືສະພາບເງິນກີບອ່ອນຄ່າລົງ, ອັດຕາເງິນເຟີ້ເພີ່ມຂຶ້ນ ແລະ ເຮັດໃຫ້ລາຄາສິນຄ້າ ຫລາຍລາຍການ ໄດ້ປັບຕົວສູງຂຶ້ນໄປຕາມກັນ, ເຊິ່ງໄດ້ແບ່ງຈຸດຂາຍ 17 ຈຸດ ໃນ 5 ເມືອງ ຄື: ໄຊເສດຖາ, ສີສັດຕະນາກ, ຈັນທະບູລີ, ນາຊາຍທອງ ແລະ ເມືອງປາກງື່ມ.   ສິນຄ້າທີ່ນຳໄປຂາຍ ໃນແຕ່ລະຈຸດ ມີ 108 ຊຸດ ປະກອບມີ: ໝີ່ໄວໆ ຫໍ່ລະ 3.300 ກີບ, ນ້ຳປາກາປາໝຶກ 700 ຊີຊີ ຕຸກລະ 16.000 ກີບ, ນ້ຳມັນພືດຄົວທິບ 900 ຊີຊີ ຕຸກລະ 24.500 ກີບ, ສະອິ້ວ 600 ຊີຊີ ແກ້ວລະ 16.000 ກີບ, ນ້ຳມັນຫອຍ 1.000 ກຣາມ ຕຸກລະ 18.000 ກີບ, ແປ້ງນົວ 250 ກຣາມ ຫໍ່ລະ 14.000ກີບ ແລະ ນ້ຳຢາລ້າງຈານ 780 ມີລີລິດ ຕຸກລະ 11.500 ກີບ.

–    ວັນທີ 26 ກັນຍາ 2023, ໄດ້ວາງຂາຍຢູ່ 4 ຈຸດຄື: ຈຸດກະຊວງອຸດສາຫະກໍາ ແລະ ການຄ້າ (ບ້ານໂພນໄຊ ເມືອງໄຊເສດຖາ) ແລະ ຈຸດເດີ່ນຈອດລົດ ຫ້າງສັບພະສິນຄ້າ ບາຊາບີ ບ້ານດອນກອຍ ເມືອງສີສັດຕະນາກ ເລີ່ມເວລາ 9:00-14:00 ໂມງ; ຈຸດຫ້ອງການບ້ານ ໂພນສະຫວ່າງ ເມືອງສີສັດຕະນາກ ແລະ ຈຸດເດີ່ນຈອດລົດ ຫ້າງຊຸບເປີສະຕໍ ບ້ານຫົວຂົວ ເມືອງໄຊເສດຖາ ເລີ່ມເວລາ 15:00-18:00 ໂມງ.

–    ວັນທີ 27 ກັນຍາ ວາງຂາຍຢູ່ 4 ຈຸດ ຄື: ຫ້ອງການບ້ານໂພນປ່າເປົ້າ ເມືອງສີສັດຕະນາກ; ຫ້ອງການ ບ້ານໂຊກນ້ອຍ ເມືອງໄຊເສດຖາ ເລີ່ມເວລາ 9:00-14:00 ໂມງ; ຫ້ອງການບ້ານ ສ້າງເຫວີຍ ເມືອງສີສັດຕະນາກ; ຫ້ອງການ ບ້ານໄຮຄຳ ເມືອງໄຊເສດຖາ ເລີ່ມເວລາ 15:00-18:00 ໂມງ.

–    ວັນທີ 28 ກັນຍາ ວາງຂາຍຢູ່ 4 ຈຸດ ຄື: ເດີ່ນຈອດລົດສູນການຄ້າໂລກໃໝ່ ແຫ່ງວຽງຈັນ ເມືອງສີສັດຕະນາກ; ຫ້ອງການ ບ້ານຫ້ວຍຫົງ ເມືອງຈັນທະບູລີ ເລີ່ມເວລາ 9:00-14:00 ໂມງ; ຫ້ອງການ ບ້ານໜອງທາເໜືອ ເມືອງຈັນທະບູລີ; ໂຮງງານຕັດຫຍິບ ລາວສະກາວີ ບ້ານໜອງປີງ ເມືອງຈັນທະບູລີ ເລີ່ມເວລາ 15:00-18:00 ໂມງ.

–    ວັນທີ 29 ກັນຍາ ວາງຂາຍຢູ່ 3 ຈຸດ ຄື: ຫ້ອງການ ບ້ານຫົວຂົວ ເມືອງນາຊາຍທອງ ເລີ່ມເວລາ 9:00-14:00 ໂມງ; ຫ້ອງການບ້ານດົງຫລວງ ເມືອງນາຊາຍທອງ ເລີ່ມເວລາ 15:00-18:00 ໂມງ; ເດີ່ນຫ້ອງການອຸດສາຫະກໍາ ແລະ ການຄ້າ ເມືອງປາກງື່ມ ເລີ່ມເວລາ 9:00-17:00 ໂມງ.

–    ວັນທີ 30 ກັນຍາ 2023 ຈະວາງຂາຍຢູ່ 2 ຈຸດຄື: ຫ້ອງການບ້ານໂນນຫວາຍ ເມືອງໄຊເສດຖາ ເລີ່ມເວລາ 9:00-14:00 ໂມງ ແລະ ຈຸດຫ້ອງການ ບ້ານນາໄຫ ເມືອງໄຊເສດຖາ ເລີ່ມເວລາ 15:00-18:00 ໂມງ.

ສຳລັບ ເງື່ອນໄຂຂອງຜູ້ທີ່ຈະຊື້ສິນຄ້າ ຕ້ອງໄດ້ລົງທະບຽນລາຍຊື່ ກ່ອນຊື້ສິນຄ້າ ເພື່ອໃຫ້ຮູ້ກຸ່ມອາຊີບຂອງຜູ້ຊື້ ແລະ ສາມາດຊື້ສິນຄ້າ ແຕ່ລະລາຍການໄດ້ຕາມປະລິມານທີ່ໄດ້ກຳນົດໄວ້. ກິດຈະກຳດນີ້ ແມ່ນການຂາຍແບບເຄື່ອນທີ່ (ເອົາສິນຄ້າໃສ່ລົດໄປຂາຍໃນແຕ່ລະຈຸດ).