5 ເດືອນທ້າຍປີ 2023 ພາສີ ປະຈໍາແຂວງສະຫວັນນະເຂດ ຈະສູ້ຊົນຈັດເກັບລາຍຮັບໃຫ້ໄດ້ລື່ນແຜນ ຕໍ່າສຸດໃຫ້ໄດ້ 416,271 ຕື້ກີບ

ທ່ານ ສົມຈິດ ລາດຊະວົງ ຮອງຫົວໜ້າພາສີປະຈໍາແຂວງສະຫວັນນະເຂດ ໃຫ້ຮູ້ວ່າ:  ປີ 2023 ພາສີປະຈຳແຂວງສະຫວັນນະເຂດ ຄາດຄະເນການຈັດເກັບລາຍຮັບເບື້ອງຕົ້ນ ປະມານ 1.259,467 ຕື້ກີບ  ແລະ ການຈັດຕັ້ງປະຕິບັດ 7 ເດືອນຜ່ານມາ ທົ່ວແຂວງສາມາດຈັດເກັບລາຍຮັບເຂົ້າງົບປະມານໄດ້ແລ້ວ 843,195 ຕື້ກີບ ກວມຫຼາຍກວ່າ 76% ຂອງແຜນການປີ, ໃນນັ້ນເດັ່ນກວ່າໝູ່ ແມ່ນຮັບຈາກ ນໍ້າມັນເຊື້ອໄຟ, ຄ່າທໍານຽມຕ່າງໆ, ຄັງແຮນ້ຳມັນ, ສິນຄ້ານຳເຂົ້າເພື່ອສົ່ງອອກຕໍ່, ພາຫະນະ (ເປັນຄັນ)  ແລະ ລາຍຮັບອື່ນໆ ແລະ ໃນ 5 ເດືອນທີ່ຍັງເຫລືອນີ້ ຕ້ອງສູ້ຊົນເກັບໃຫ້ໄດ້ຕໍ່າສຸດ 416,271 ຕື້ກີບ.

ເພື່ອບັນລຸໄດ້ຕາມແຜນການ ແລະ ລື່ນແຜນການຕົວເລກທີ່ຄາດຄະເນໄວ້ ແຂວງສະຫວັນນະເຂດໄດ້ກໍານົດວຽກຈຸດສຸມຈໍານວນໜຶ່ງເພື່ອຈັດຕັ້ງປະຕິບັດເປັນຕົ້ນ: ການເອົາໃຈໃສ່ຄຸ້ມຄອງ ຕິດຕາມ ກວດ ກາ ການນຳເຂົ້າ-ສົ່ງອອກສິນຄ້າ, ເຄື່ອງຂອງ ຢູ່ບັນດາດ່ານພາສີຊາຍແດນຢ່າງເຂັ້ມງວດ, ເພີ່ມທະວີວຽກງານຕ້ານ ແລະ ສະກັດກັ້ນການລັກລອບໜີພາສີທຸກຮູບແບບຢ່າງເຂັ້ມງວດ ທັງຢູ່ ໃນຂອບເຂດດ່ານ ແລະ ນອກດ່ານ ລວມທັງຈຸດອື່ນໆທີ່ຫລໍ່ແຫລມ.

ເອົາໃຈໃສ່ຄົ້ນຄວ້າກ່ຽວກັບການໃຫ້ນະໂຍບາຍ ດ້ານພາສີ-ອາກອນ ຕໍ່ບັນດາວິສາຫະກິດທີ່ໄດ້ຮັບນະໂຍບາຍສົ່ງເສີມການລົງທຶນ ພ້ອມທັງຄຸ້ມຄອງການນຳໃຊ້ວັດຖຸປະກອນທີ່ນຳເຂົ້າຕາມນະໂຍບາຍດັ່ງກ່າວໃຫ້ຖືກຕາມເປົ້າໝາຍ, ກະຕຸກຊຸກຍູ້ດ່ານພາສີຊາຍແດນທີ່ມີທີ່ຕັ້ງຕິດກັບປະເທດເພື່ອນບ້ານ, ສືບຕໍ່ແກ້ໄຂຄະດີທາງພາສີທີ່ຍັງຄ້າງສະສາງໃຫ້ສຳເລັດ ນຳໃຊ້ເຄື່ອງມືທັນສະໄໝທີ່ໄດ້ຮັບການພັດທະນາແລ້ວໃຫ້ມີປະສິດທິພາບສູງສຸດ ເພື່ອຄຸ້ມຄອງ ແລະ ຈັດເກັບລາຍຮັບເຂົ້າງົບປະມານໃຫ້ຖືກຕ້ອງ, ຄົບຖ້ວນ ແລະ ທັນເວລາ.