ສ່ວຍສາອາກອນ ແຂວງເຊກອງ ແຈ້ງເສຍຄ່າທໍານຽມທາງ ປະຈໍາປີ 2023 ກ່ອນວັນທີ 30 ກັນຍາ ນີ້ ຖ້າບໍ່ເສຍຕາມເວລາທີ່ກໍານົດໄວ້ ຈະຖືກປັບໃໝ 0,1% ຕໍ່ວັນ

ວັນທີ 21 ກັນຍາ 2023 ສ່ວຍສາອາກອນປະຈໍາແຂວງເຊກອງ ໄດ້ອອກແຈ້ງການ ເຖິງບຸກຄົນ, ນິຕິບຸກຄົນ ຫລື ການຈັດຕັ້ງ ທີ່ເປັນເຈົ້າຂອງ ຫລື ນໍາໃຊ້ພາຫະນະທຸກປະເພດໃນຂອບເຂດທົ່ວແຂວງເຊກອງ ໃຫ້ຮີບຮ້ອນຊໍາລະຄ່າທໍານຽມທາງ ປະຈໍາປີ 2023 ຊຶ່ງສາມາດຊໍາລະຜ່ານລະບົບທະນາຄານ ໂດຍນໍາໃຊ້ແອັບພຣີເຄຊັນ (Appication) ຫລື ເຄົາເຕີ້ທະນາຄານ ຂອງທະນາຄານທີ່ເຂົ້າຮ່ວມໃນໂຄງການ ປະກອບມີ ທະນາຄານການຄ້າຕ່າງປະເທດລາວ ມະຫາຊົນ (BCEL); ທະນາຄານຮ່ວມພັດທະນາ ຈໍາກັດ (JDB); ທະນາຄານພັດທະນາລາວ ຈໍາກັດ (LDB); ທະນາຄານສົ່ງເສີມກະສິກໍາ (ABP) ແລະ ຊໍາລະຜ່ານສໍານັກ (ເຄົາເຕີ້) ຂອງສ່ວຍສາອາກອນແຂວງ ແລະ ສ່ວຍສາອາກອນເມືອງ ຊຶ່ງຜູ້ຊໍາລະຄ່າທໍານຽມທາງ ຕ້ອງມີເອກະສານຍານພາຫະນະແຈ້ງຕໍ່ພະນັກງານທະນາຄານ, ເຈົ້າໜ້າທີ່ສ່ວຍສາອາກອນ ເພື່ອດໍາເນີນການຊໍາລະໃຫ້ຖືກຕ້ອງ.

ສະນັ້ນ, ເພື່ອຫລີກລຽງບໍ່ໃຫ້ຖືກປັບໃໝ ສ່ວຍສາອາກອນປະຈໍາແຂວງ ຈຶ່ງໄດ້ແຈ້ງໃຫ້ທຸກພາກສ່ວນໄປຊໍາລະຄ່າທໍານຽມທາງ ປະຈໍາປີ 2023 ກ່ອນວັນທີ 30 ກັນຍາ 2023. ຖ້າຫາກບໍ່ເສຍຄ່າທໍານຽມທາງຕາມໄລຍະເວລາທີ່ກໍານົດໄວ້ ຫລື ກາຍວັນທີ 30 ກັນຍາ 2023 ຈະຖືກປັບໃໝ 0,1% ຕໍ່ວັນຕໍ່ຈໍານວນເງິນຕ້ອງຊໍາລະ ຫລື ປັບໃໝຕາມແຕ່ລະກໍລະນີ ຕາມທີ່ໄດ້ກໍານົດໄວ້ໃນຄໍາແນະນໍາກະຊວງການເງິນ.