ກໍາປູເຈຍພົບຜູ້ຕິດເຊື້ອໄວຣັສ “ຊິກາ” ຄົນທໍາອິດໃນຮອບ 7 ປີ
ກະຊວງສາທາລະນະສຸກກໍາປູເຈຍ ຖະແຫລງຂ່າວຢືນຢັນການກວດພົບຜູ້ຕິດເຊື້ອໄວຣັສຊິກາ (Zika Virus) ຄົນທໍາອິດໃນຮອບ 7 ປີ ນັບແຕ່ປີ 2016.
ຜູ້ຕິດເຊື້ອຄົນດັ່ງກ່າວເປັນເດັກນ້ອຍຜູ້ຍິງອາຍຸ 7 ປີ ຈາກແຂວງກໍປົງທໍາຕອນກາງ ເຊິ່ງເຂົ້າຮັບການປິ່ນປົວຢູ່ໂຮງໝໍແຫ່ງໜຶ່ງໃນກໍາປູເຈຍໃນທ້າຍອາທິດຜ່ານມາ ໂດຍທີມແພດສັນນິຖານເບື້ອງຕົ້ນວ່າອາດເປັນພະຍາດໄຂ້ເລືອດອອກ ກ່ອນຜົນກວດໃນວັນທີ 21 ກັນຍາຈະຢືນຢັນວ່ານາງມີຜົນກວດໄວຣັສຊິກາເປັນບວກ.
ຖະແຫລງການຈາກກະຊວງສາທາລະນະສຸກກໍາປູເຈຍ ລະບຸວ່າ: ຊິກາເປັນໄວຣັສໃນຕະກູນຟລາວິໄວຣັສ (Flavivirus) ທີ່ແພ່ກະຈາຍໂດຍຍຸງລາຍເປັນສ່ວນຫລາຍ, ແຕ່ຍັງສາມາດແພ່ເຊື້ອຜ່ານການສໍາຜັດທາງເພດ, ການໃຫ້ເລືອດ ແລະ ຖ່າຍທອດຈາກແມ່ສູ່ລູກໂດຍກໍາເນີດ ໂດຍມີກຸ່ມອາການຕ່າງໆ ໄດ້ແກ່ ເປັນໄຂ້, ເຈັບຫົວ, ຜື່ນຂຶ້ນ, ຕາແດງ ແລະ ປວດຕາມຂໍ້. ຜູ້ຕິດເຊື້ອສ່ວນຫລາຍມັກອາການດີຂຶ້ນພາຍໃນ 2-7 ວັນ. ຂະນະທີ່ອັດຕາການເສຍຊີວິດຈາກພະຍາດນີ້ຢູ່ໃນລະດັບຕໍ່າ, ແຕ່ໃນກໍລະນີທີ່ແພ່ສູ່ແມ່ຍິງຖືພາ ອາດເຮັດໃຫ້ເດັກໃນທ້ອງເສຍຊີວິດໄດ້.
ທັງນີ້, ກະຊວງສາທາລະນະສຸກກໍາປູເຈຍໄດ້ຂໍການຮ່ວມມືນໍາພີ່ນ້ອງປະຊາຊົນ ໂດຍສະເພາະກຸ່ມແມ່ຍິງຖືພາໃຫ້ລະມັດລະວັງ ແລະ ປ້ອງກັນຕົນເອງຈາກການຖືກຍຸງລາຍກັດ ແລະ ເດີນທາງໄປພົບແພດຖ້າສົງໄສວ່າມີອາການຄ້າຍຄືຕິດເຊື້ອໄວຣັສດັ່ງກ່າວ.
ອ້າງອີງຈາກ:
https://www.xinhuathai.com/inter/387092_20230925
https://www.dailynews.co.th/news/2751287/
