ປະທານອົງການກວດສອບແຫ່ງລັດ ສະເໜີໃຫ້ ເອກອັກຄະລັດຖະທູດຝຣັ່ງ ປະຈຳລາວ ສືບຕໍ່ຊຸກຍູ້ໃນຂົງເຂດວຽກງານທີ່ເຫັນວ່າມີຄວາມເປັນໄປໄດ້

ວັນທີ 22 ກັນຍາ 2023, ທ່ານ ວຽງທະວີສອນ ເທບພະຈັນ ປະທານອົງການກວດສອບ ແຫ່ງລັດ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນ. ຊີບ-ແລັງ ຊູຍອອກ (Mrs. Siv-Leng Chhuor) ເອກອັກຄະລັດຖະທູດຝຣັ່ງ ປະຈຳ ສປປ ລາວ ຈຸດປະສົງແມ່ນເພື່ອກະກຽມປຶກສາຫາລືກ່ຽວກັບການຮ່ວມມືລະຫວ່າງ ອົງການກວດສອບແຫ່ງລັດ ສປປ ລາວ ກັບ ສານກວດສອບບັນຊີຝຣັ່ງ ແລະ ວຽກງານກ່ຽວຂ້ອງອື່ນໆ.
ໃນໂອກາດການຢ້ຽມຢາມໃນຄັ້ງນີ້ ທ່ານເອກອັກຄະລັດຖະທູດຝຣັ່ງ ປະຈຳ ສປປ ລາວ ໄດ້ ລາຍງານສະພາບການຈັດຕັ້ງປະຕິບັດວຽກງານຕ່າງໆໂດຍຫຍໍ້ ໃນໄລຍະດຳລົງຕຳແໜ່ງເປັນເອກອັກຄະລັດຖະທູດຝຣັ່ງ ປະຈຳ ສປປ ລາວ. ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ໄດ້ສະແດງຄວາມຊົມເຊີຍຕໍ່ການປະຕິບັດໜ້າທີ່ທາງການທູດ ຂອງ ທ່ານ ເອກອັກຄະລັດຖະທູດຝຣັ່ງ ປະຈຳ ສປປ ລາວ ທີ່ໄດ້ເອົາໃຈໃສ່ເຄື່ອນໄຫວຢ່າງຫ້າວຫັນໃນການປະກອບສ່ວນພັດທະນາເສດຖະກິດ-ສັງຄົມຂອງ ສປປ ລາວ ໃນຫລາຍຂົງເຂດ ເປັນຕົ້ນ: ຂົງເຂດການສຶກສາ, ສາທາລະນະສຸກ, ກະສິກຳ, ກົດໝາຍ-ການປົກຄອງ, ຍຸຕິທຳ, ການເງິນ, ວັດທະນະທຳ ແລະ ການຊ່ວຍເຫຼືອທາງດ້ານການພັດທະນາໃນຫຼາຍດ້ານຂອງ ສປປ ລາວ.
ບົນພື້ນຖານການພົວພັນຮ່ວມມືສອງຝ່າຍ ແລະ ເພື່ອເປັນການສືບຕໍ່ເສີມຂະຫຍາຍສາຍພົວພັນຮ່ວມມືລະຫວ່າງສອງສະຖາບັນກວດສອບສູງສຸດຂອງ ສປປ ລາວ ແລະ ຝຣັ່ງ, ປະທານອົງການກວດສອບແຫ່ງລັດ ໄດ້ສະເໜີໃຫ້ ທ່ານເອກອັກຄະລັດຖະທູດຝຣັ່ງ ປະຈຳ ລາວ ສືບຕໍ່ຊ່ວຍຊຸກຍູ້ ແລະ ໃຫ້ການສະໜັບສະໜູນແກ່ອົງການກວດສອບແຫ່ງລັດ ໃນຂົງເຂດວຽກງານທີ່ເຫັນວ່າມີຄວາມເປັນໄປໄດ້ ເປັນຕົ້ນ ການສືບຕໍ່ຊຸກຍູ້ການຮ່ວມມື ລະຫວ່າງ ອົງການກວດສອບແຫ່ງລັດ ສປປ ລາວ ແລະ ສານກວດສອບບັນຊີຝຣັ່ງ ກໍ່ຄືການຊ່ວຍຊຸກຍູ້ໃຫ້ອົງການພັດທະນາສາກົນຂອງຝຣັ່ງ ສະໜັບສະໜູນວຽກງານການກວດສອບແຫ່ງລັດ ຂອງ ລາວ ແລະ ສ້າງໂອກາດໃນການເຂົ້າເຖິງໂຄງການ ຫລື ແຫຼ່ງງົບປະມານ ໃນການຈັດຕັ້ງປະຕິບັດໂຄງການຮ່ວມກັນ ເຊິ່ງໃນໄລຍະຜ່ານມາ ການຮ່ວມມືລະຫວ່າງ ອົງການກວດສອບແຫ່ງລັດ ສປປ ລາວ ແລະ ສານກວດສອບບັນຊີຝຣັ່ງ ກໍໄດ້ມີການຮ່ວມກັນລົງນາມບົດບັນທຶກວ່າດ້ວຍການຮ່ວມມືໃນຂົງເຂດການກວດສອບແຫ່ງລັດ ແລະ ໄດ້ຈັດຕັ້ງການຝຶກອົບຮົມໂດຍຊ່ຽວຊານຈາກສານກວດສອບບັນຊີຝຣັ່ງ ກ່ຽວກັບວຽກງານການຄວບຄຸມ ແລະ ຮັບປະກັນຄຸນນະພາບການກວດສອບ ທີ່ ນະຄອນຫຼວງວຽງຈັນ ໃນເດືອນພຶດສະພາ 2023 ທີ່ຜ່ານມາ. ພ້ອມດຽວກັນ ປະທານອົງການກວດສອບແຫ່ງລັດ ໄດ້ສະແດງຄວາມຄາດຫວັງວ່າ ໝາກຜົນຂອງການເຄື່ອນໄຫວວຽກງານການຮ່ວມມື ແລະ ແລກປ່ຽນບົດຮຽນກັບສານກວດສອບຝຣັ່ງ ຈະປະກອບສ່ວນຕໍ່ການຮັດແໜ້ນສາຍພົວພັນການຮ່ວມມືຂອງສອງປະເທດ ທ່າມກາງປີແຫ່ງການສະເຫລີມສະຫລອງວັນສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ ແລະ ຝຣັ່ງ ຄົບຮອບ 70 ປີ (31 ກໍລະກົດ 1953 – 31 ກໍລະກົດ 2023).